¹ Wafalisi na wasadusi wadauiya kaiga Djeso kumuesera, watchikumbira kuti awapangize tchidzindikiro tchakudzaulu. ² Apo Iye adawadaira: "Pako kumaulo kungauiya, imwe munalanga: 'Kutchawoneka nguwa iyamuche, thangwe kudzaulu kudachawa'. ³ Ese na tchakumatchibese munalanga: 'Nguwai nyamuntsi idanyangala, makuti adachawa futi atchiswipa'. Dziwani kuthumbudzura kagalirhe kakudzaulu, apo hamudziwi kuthumbudzura zvipangizo zvanguwa? ⁴ Dzinza lakunyangala futi latchikwachula linakumbira tchidzindikiro tchibodzi, apo hapana tchidzindikiro tchawo wanadzapasiwa kunza kwatcha Djona". Ese Djeso, adawasiya, adaenda zvatche. ⁵ Wapfunzi wadaswika kukundu linango, apo iwo wadaeha kutora pawu. ⁶ Djeso adawati: "Tetekani futi itani mhole namasoko iya mafalisi na wasadusi". ⁷ Wapfunzi wadagwengezana wogawoga watchiti: "Ndizvo thangwe hatiribe kuwisa mapawu". ⁸ Ese Djeso atchiteteka izvi adati: "Wanhu wakutenda kudoko, thangweranyi mukugwengezana pakati panu futi mutchilanga kuti nakuleka kuwisa mapawu? ⁹ Imwe hamusati mateteka futi nkabe kutsalakana pamapawu machanu kuna zvinkwi zvichanu zvawanhu ese mathengu mangasi iyanu mudakwetchaniza? ¹⁰ Ese pamapawu maomwe kuna zvikwi zvinai zvawanhu ese mathengu mangasi iyanu mudakwetchaniza? ¹¹ Ninga hamuteteki kuti handina kukuzvunzani zvamapawu? Tetekani futi itani mhole namasoko iyamafalisi nawasadusi". ¹² Napenepo iwo wadateteka kuti Iye hakalangalini isiti iyamapawu, apo kuti tiite mhole napfunziso lamafalisi namasadusi. ¹³ Patche Djeso adauiya mitunhu iriduze na Cezarea iyaFilipi, adabvunzisa kuna wapfunzi Watche: "Mbani mbumba irikulanga kuzviita Mwana Wamunhu?" ¹⁴ Iwo wadalanga: "Wenango walikulanga: 'Juwau Munyiki'; wenango walikuti: 'Elia', wenango walikuti: 'Jeremia kana kuti muprofiti mubodzi'". ¹⁵ Ese Iye adawabvunzisa: "Apo imwe munalanga kuti Ine ndine wani?". ¹⁶ Atchidaira Simawu Pedro adati: "Imwe ndimwe Kristu, Mwana waMulungu wakupenya". ¹⁷ Futi Djeso adamudaira: "Udakombolerha, Simawu Barjonasi, thangwe hazvina kuita zvanyama na gazi kuti zvidakupangiza izvi, apo Bambo Wangu kuti alikudzaulu. ¹⁸ Ese Ine basi ndirikukubvunza kuti iwe ndiwe Pedro, futi padzaulu pabuwe iri nditchadzalonza gereja Iyangu ese misuwo iyakugehena aidzagali sososo naiyo. ¹⁹ Ine nditchadzakupasa zvakuvulisa Zvaukulu Wakudzaulu. Zvako unabataniza pantsi zvinadzabataniziwawo kudzaulu ese zvako unaphudzumula pantsi zvinadzaphudzumuliwawo kudzaulu". ²⁰ Napenepo Djeso adatumira kuna wapfunzi kuti waleke kubvunza kuna wenango kuti Iye akali Kristu. ²¹ Kubudira nguwa ineyo, Djeso adatanga kubvunza wapfunzi Watche kuti Zvikamudikanira kuti aende ku Djerusalema abomere zvinhu zvizinji mumanja mwawadikoni, na wakulu wakulu na wanembi; kuti ndiulaiwe ese ndimuke pantsiku iyatchitatu. ²² Napenepo Pedro adadaidza Djeso pakundu futi Adamufoyirisa, atchiti: "Kutali Naimwe, Tchangamire, zvinhu izvi tchipo Zvinakuitikirani". ²³ Apo, Djeso atchihirira, adati: " Buda kumasure Kwangu, Sathani, iwe kuna Ine ndiwe buwe lakutsausa, thangwe haukoyi zvinhu zva Kudzaulu, apo pazvinhu zvawanhu". ²⁴ Napenepo Djeso adati kuna wapfunzi Watche: "Angati munhu alikuda Kunditewera, ngazvirambe patchatche, ngatole mutchinjikwa watche ese Nganditewere. ²⁵ Napenepo weneule kuti anada kuponesa kulalama kwatche anadzakuluza. ²⁶ Thangwe ngwanyi mubaibai unamunhu kukunda zvapadziko lense futi atchiluza kulalama kwatche? Nswanyi zvingatchinjanise munhu nakulalama kwatche? ²⁷ Thangwe Mwana Wamunhu anadzauiya mukukuza kwaBambo Watche pabodzi nangirozi Zatche. Napenepo Iye anadzapasa munhu mubodzi namubodzi ninga zvatche kuti adaita. ²⁸ Tchadiko tchadiko Ine ndirikukubvunzani wenango wanu kuti walipano awadzaeseri kufa kuswikira waona Mwana Wamunhu atchiuya Kuukulu Watche"