¹ Sô, ná amon un ma nga ngogô kuê nga stima ô foga wha ngosô un ku klôa, dy mora é bo ka ta fimi ku Sun, migu un ma nga ngogô kuê. ² Nga pindji Evodia ku Sintiki pa ané ka sintxi mora é mé ku Sun. ³ kua veré nga loga ô turu mêlu un buaru ri kega: zura ané mengay é punda ané taba ku an ka whanga vangelhu zuntaru ku klementxi ku ane mêlu un suvisu, ma nomi ané sa lívu vira. ⁴ Ka legela sémpli ku Sun, otô vê nga tô fa: legêla sê. ⁵ zi turu nkênu ta sê buaru. Punda Sun sa petu. ⁶ na kanha ra kuakuali kua wha. Antizi ku turu kua ma sê ka pindji Dêsu ka tê, ku lason ma sê ka pindji ku suvisu ngasa. ⁷ Sô paji Dêsu ku ka zi sê ta turu kua, ka lokê koson sê ku kua ma sê ka pensa ku Kistu Jizu. ⁸ Pa un loké ná amon, turu kua ku sa veré, turu kua ma bô ka lispeta turu kua ku sa zustu, turu kua ku sa puru, turu kua ma bô ka ngogô kuê turu kua ku sa buaru, sy ê valê whã kua sy ê tê kua ma bô ngogô kuê, ku ane kua é legulé. ⁹ Ane kua ma bô sina, tua, ndê sô bê ku an, zié sô Dêsu pazi ka sa ku sê. ¹⁰ Nga legêla ku sun foga wha, punda ayé bô loké bila turu kua novo kuyraru sê ku an ma atizi sê tá ka pensa ku an, sê na ta ku meyu pa sê ká zura un wha. ¹¹ Na ka fa kua é ma umpisiza wha. Punda un sina sa ku ngosô turu ola. ¹² Nta kua ku sa pobli, sô nta kua ku sa te turu kua. Ri turu mora sô ku turu kua, un sina segêru mora ta syaru ô ku kizi, ku turu kua ô ka pisiza. ¹³ Nga poy ku turu kua ny Nkênu sy ka ran fosa. ¹⁴ Ku turu bô zi buaru zunta ku an ku kua ku ka kusta un. ¹⁵ Sê Filipensi sê tá ma ola vangelhu komesa, ola un syê fô Masedonha, né whã ngeza na zura un supota kua ri rá ku tua sê sô. ¹⁶ Atê ola ntá Tesalónia, sê manda zura ra kua ma un mesê masi roke whã vê. ¹⁷ Na mesê ngolo pezentxi wha mazi mé ku ka motxi ra konta sê. ¹⁸ Ntua turu kua sô ntê motxi. Nsa ku ngosô. Ntua mon Epaforitu turu kua ma sê manda. Ane sa whã vumba rosi sô buaru, wha sakifisu ma un kundji sô tô ngosá ra Dêsu. ¹⁹ Dêsu un ka kundji turu kua ma sê mesê ri mora ku likeza Rê ku ngoya ny Kistu Jizu. ²⁰ Ayé ra Dêsu non ku Táta ka sa ngoya ra sekulu ri sékulu Amé. ²¹ Fa turu klentxi ku Kistu Jizu mantxa. Ane ná amon ku sa ku an ka fa sê mantxá. ²² turu klentxi ka fa sê mantxá, mási sa ane ri kay sezalu. ²³ Ngasa Sun Jizu Kistu ka sa ku supitu sê.