¹ Pa ê lokê ane ná amon un, tá ku ngosô ku Sun. Ra un, nga sisika ra sê dingi ku na sa siriga wha. Ané ku é sa seguru ra sê. ² Kuiraru ku ane katsô, kuiraru ku nkênu ku ka zi suvisu mali, kuiraru ku nkênu ku ka porá. ³ Punda non sa poraru za. Yé sa, nón ku ka sivi ku sivi ku Supitu Dêsu ka gaba ku Kistu Jizu, sô na kunfia ny kani wha. ⁴ Mora é mé, amplopi ka poy kunfia ny kani. Sy nkênu ka pensa ma ê ka kunfia kani nga pô tê masi anda: ⁵ Nfô poraru náke ría, unsa povô Israeli ri lasa Benjami êbleu ri êbleu, ku ka fa ri alê whã fariseu. ⁶ Punda vonté un ta ka kolê ku ngeza. Ku ka fa ri zusita alê sê lepensó. ⁷ Mazi ra kua ma ntá ka kunfia né ra luku un pié mora kua sê luku punda kistu. ⁸ Sô ayé é un pié turê mora kua ma un pendê, punda porê ri ta kua Kistu Jizu, Sumun. Punda Êlê un pendê turu kua. Nga pié mora kua suzu pa nganha Kistu. ⁹ sô ka bê Né, na ta ku zusista un plopi ku ka bi ri alê wha. Envez ri kua é ntê zusista ku sa punda afé ku Kistu, zusista ku ka bi ri Dêsu kosi afé. ¹⁰ Ra kua é un mesê té, ta porê ma Ê ka tô kora sô zuntaru ku afison Rê. Un mesê mura mora motxi Rê. ¹¹ Pa ri mora é nga poy nganha ola motxi ka tô kora. ¹² Né punda un tua ane kua é za ô ma un bila buaru za wha. Mazi nga kolê pa ntué, punda ra kua é ma Kistu Jizu tua un. ¹³ Ane ná amon, na kunda ma an mé tué za mazi whã kua nga zi: nga kêsê kua ku fika mema sô nga zi fosa ra kua ku sa whê. ¹⁴ nga kolê ba lelê kua pa nganha pémê ma a ka sama buaru ri Dêsu ku Kistu Jizu. ¹⁵ Turu nón ku sa bobôru ka pensa mora é mé. Sô si sê pensa otô mora ra kuakuali kua, Dêsu turu ka musa sê kua é. ¹⁶ ku turu, nón ka sa fimi ny kua ma non tá tua. ¹⁷ Ná amon ka mindji un, ka pia petu ane ku ka nda mora zempu ma bô bê ku non. ¹⁸ Punda ê tê yô ma nfá sê za sô ayé nga tô fé ku awha whê, ma ane sa numigu kusú Kistu. ¹⁹ distinu ane sa muê sô. Punda dêsu ané sa bega sô goia ma ane tê sa pa vegonha ané, bê ma ane ka pensa kua tia sô. ²⁰ Mazi tia non sa onsé ku nga ma non ka whara Savarô, Sun Jizu Kistu. ²¹ Ê ka mura ongê non sosegaru mora ongê Rê di goia ku porê Rê pê ngênta turu kua.