¹ येशुये तिया चेलान एक गोठ आखी एक मालदार माहु आथो तीया एक कारभारी आथो माहाये मालीकुल आख्यो तो पोयरा मोज्या मारीन खोरची टाके हे. ² तियाल त्या मालदार माहाये तीया कारभाऱ्याले होद्यो आण आख्यो तो बदल माय काय ई काय काय ऊनाय रीयो हो तीयाल तु मान तो कामु हिसाब दे काहाका माय तुल ईया आगला कारभारी नाहा थोऊला हाय. ³ ताहा तीया कारभारीय मोनाने विचार केयोमा मालीक मावेने कारभार मागी लेणारो हाय ता माय आमी काय किवु खेतुम काम केरुला ओती मा डीलाम शक्ती नाहा आणे भीक मागुला मान लाज आवे. ⁴ मान कारभाऱ्या कामापेने मान काडी टाकी तेबी माहाय मान तीया कोमे ला जोजे तीया वाटो मान काय केरा पोडी तो मान माहीती हाय. ⁵ पाचे कारभाण्याये तीया मालकावेने जीयाय कौरजो लेदोहो तीयान आखान हादे पहीलाल तीयाय आख्यो तुयू मा मालीकावेने कोतो कौरजो लेदाहो तो तुल फेडुणू हाय ⁶ तीयाय आख्यो तीन हजार लिटर तेल तीयाय तीयाल आख्यो ई तो हिशाबा वोही आणे माहरी बोटीन ईयावे दीड हजार लिख. ⁷ नंतर बीहराल आख्यो तुल कोता देऊला हाय तीयाय आख्यो वीस हजार किलो गोव तीयाय तीयाल आख्यो तो हिशोब तिही ले आणे सोला हाजार लिख. ⁸ खोटो काम केणाऱ्या कारभाण्याये ओकली की काम केयो इ तोवीन तीया मालीकाय वा वा केई काहाका या जोगामने लोक आपु सारखा बोदोल होरो आखनारा लोका हेने खुपे शाहाने रेताहा. ⁹ पासे येशुये आख्यो माय तुमान आखु तुमा वाटो तुमाहा कामावली मालकती तुमा हेगात्या होदी काडजा ईया खातोर का जाहा ती मिलकत पारवाय ताहा तीयाय तुमाने तीऊला खातो तीया गावुम रा हादी ली. ¹⁰ एखाधापे थोवो भोरुसो थोऊला शक्य रेहे आणे जो केडो थोड्या गोठीम बी मुरखो रेहे तो जास्ती गोठीय बी मुरखो रेहे. ¹¹ इयाखातोर तुमा दुनीयामेने कामावली मिलकत खातोर विश्वासु नाहा ताजह खेरी मिलकत खातोर तुमापे केडो भोरुसाे थोवी ¹² जो बिहरा हाय तिया खातोर तुमा विश्वासु नाहा ता जो तुमा हाय तो तुमाल केडो दी? ¹³ केलला बी मोजऱ्याल बेन मालका सेवा केता आपली नाहा एकाल तो रोग की आणे बीहरापे तो माया की नेता एकाल तो मानीन चाली आणे बीहराल हारो मानीन नाय चाली तुमा एकाच टाईमुल तुमा देवा आणे पोईसा सेवा की नाहा साकता. ¹⁴ परुशी लोक जे पोइसा लोबी आथा तीयाय ये आख्या गोठ्या ऊनाय ने तीयाय येशु निंदाकेरा लाग्या. ¹⁵ येशु तियाय आख्यो तुमा सोताल लोका हुबूर धर्मी काय ऐहकी देखावता पेन देव तुमा मोने ओखेहे जीया लोकाहान तीया नोजरीम मोडो मानेहे ते देवा नजरेम बाटालो हाय. ¹⁶ योहानालुग नियमशास्त्र आणे संदेष्टे आथे आणे तेहेन देवा राज्या गोठ्या आखतेहे आण बादेमाहे तीया विहुला जोरमे प्रयत्न केताहा. ¹⁷ नियमशास्त्र एक बी कानो नेता मात्रो नाहीसो वेरुलापेक्षा आकाश आणे पृथ्वी ताहीसो वेरला सोपो हाय. ¹⁸ जो केडो आपु थेईल सोडी देहे आणे बीहरी आरी वोराड केहे तो व्याभिचार केहे आणे जो केडो माहाय तीया सोडली आरी वोराड केहे तो व्यभिचार केहे ¹⁹ एक मालदार माहु आथो तो जाभंळा रोगा माेजाम ने मोगे कोपडे वापरुतलो रोज दिही तो माेजा मारीन आरामा की रेतलो ²⁰ तीया बाना जागे लाजर नावु एक गरीब माहु पोडी रेतलो आणे तीया डीलापे फोड आलला आथा. ²¹ तीया मालदार माहा माडो खाऊला टेबलापेने जो कावी नीचे पोडी तो तेबी मान खा मिली ऐहकी अरखा केतजाम वोतोज नाहा पेन कुत्रे आवीन तीया फोड चाटतले. ²² पासे ऐहकी वेयो का तो गरीब माहु मोई गियो आ देवादुताय तीयाह अब्राहामा उगाम लावीन थोव्यो, पाये मालदार माहु बी मोई गीयो आणे तीयाल पुरी देदो. ²³ मालदार माहु नाेरकाम दु: ख भोगा लाग्यो तीहीने तीयाय ऊचे वेयो आणे तियाय आब्राहामाल आणे लाजराल तिया उंगाम वेयो. ²⁴ तो बोबालीन आखा लाग्यो हे आब्राहामा बाहाका मापे दया के आणे लाजराल मोकले ईया वातो का तो तीया आकड्या पायाम बुडवीन मा जीभ हेली की काहाका या आगीम माय खुबुजे दु:ख भोगी रीयो हो. ²⁵ मावे आब्राहामाय आख्यो मा पोयरा ध्यानुम ले की तो जीवनाम जेहकी तुल हाण्या गोठ्या मिल्या तेहकी लाजराल खाराब गोट्या तिल्या तीयाल आमी तीयाल आराम मिली रीयो हो आणे तु दु:खाम हाय ²⁶ आणे या आख वाटो तुमच्या आणे आमा वोच्चे एक माेडो उडो खाडो थोव्यो हो यावाटो का ईहीने तुमा जागे केडाल जाता आवा नाय जोजे आणे तुमायने केढाल आतालूग आवता आवे नाय ²⁷ तिया श्रीमंत माहाय आख्यों, फाचे आय तुल विनंती किहु,ओबा लाजराल ता बाहाका को मोकले ²⁸ लाजराल मा पाच पावुय जाईन सावध केरा दे म्हणजे ते तेभी ईया दु:खा जागाप नाय आवे ²⁹ अब्राहामाय आख्यो तो पाऊहू जागे मोशे आणे संदेष्टे हाय तीयाहा तियाय ऊनाया जोजे ³⁰ तीया मालदार माहु आख्यो नाहा हे पित्या आब्राहाम मोई गीयोहो ने केडो मा पाऊला जागे गीयो ता ते पायमावो की ³¹ अब्राहामाय तियाल आख्यो जर ते मोशे आने संदेष्टा हा उठीन जाई तेबी तिया नाय माननारा.