अध्याय 15
1
जाहा बादे करपेट्टी लेनारा आणे पापी लोक येशु गोठ्या उनाया आवतला.
2
ताहा परूशी आणे नियमशास्त्रा गुरुजी कुरकूर केरा लाग्या ते आखा लाग्या ओ पापी लोकान जागे किते तीया आरी माडो खाहे.
3
पासे येशूये तियान बी गोठ्या आख्या
4
तुमापने केडा एका जागे शंभर मेढे हाय आणे तियाम ने एक मेढाे गोमायो ता तो नव्यान्नव मेढान जोगलाम सोडीन गोमाला मेंढाे पाचला तो सापडुतो नाय तावुकलुग जाय नाय का?
5
आणे जाहा तियाल तो सापळे ताहा तो खुशीकी तीयाल खादापे ली लेहे.
6
आणे जाहा तो को आवे ताहा आप्यापे आणे कोवा जागप्याने आरी कीने आखे हे आरी खुशीया मोनावा काहा मा गोमालो मेंढरो सापडी गीयो हो,
7
तीयाल आवा तुमान आखु हु जीयाने पासतावो केरुलो गोरोज नाहा हाय ऐहदाय नव्यान्नव धर्मी लोकाहा बदल वेनारा खुशी की पासतावे केनारा एका पापी लोकाहा बोदल स्वर्गामे खुबूजे खुशी बी ई माय तुमाहाने आखु
8
जेहकी का एका बाई पे चांदी दहा पोईसा हाय आणे तीयाम ने एक पोईसा गोमाय गीयो ता ती दीवो लागवीन कोवे बाईने तो मीलतो नाहा तावुक लुग मोनलागवीन ती होदेनाय का?
9
आणे तुयूल जाहा तो पोईसा मिल्लो ताहा ती तीये आरीने आणी कोवा जागण्याने हादीने आखी माआरी खुशी केरा काहा का मा गोमाला पोइसा मान तिली गीया.
10
इयाहोच पासतावो केनारा एका पापी माहा बोदल देवा हा दुता हुबूर खुशी वी ईमाय तुमाहान आखु हू
11
पासे येशु आख्यो एका माहा बेन पोयरे आथे
12
तीया बेन्यामने एक हाना पोयराय आख्यो बाबा मान मीलकत मेने मा हिसो बाहाकाय मान दिदे आणे पासे तीया बाहाकाय तिया मीलकत बेनी पोरया ने वाटी देदी.
13
पासे वाहीक दिही वेया ताहा हानो पोयरो तिया आखो टोलवीन तो बिहरा देशुमे नीगी गियो.
14
तीया आखा पोईसा खोरची टाक्या आणे तीया देशुम खुप मोडो दुष्काळ पोड्यो आणे तो पुखो मोरा लाग्यो.
15
तीया देशुम एका माहा जागे तो गीयो आणे तीया साहारो लिन तो तिया जागे रा लाग्यो तीया माहाये तीयाल तिया खेतुम डुक्करे चारा मोकल्यो.
16
जाहा केडो तीयाल हाय खा नाय देतलो ताहा डुकरे जे हेंग्या खातले त्या हेंग्या खाईने तेबी आपु डेठ पोऊ ऐयकी तीयाल वाटा लाग्यो
17
पासे तीयाल होमजाया लाग्यो आणे तो ईतवा लाग्यो आणे आखा लाग्यो, मा बाहाका दको कोता जोहुर वेरी तिया डेड तायाये ओतो माडो आणे आरदो री जाटे ओतो माडो रेहे आणे माय ता ईही पुखो माेई रीयो हो
18
आमी माय ई सोडीन मा बाहका जागे जाहे आणे आखेहे ओबा माय आखा विरुध्द देवा विरुध्द आणे तुमा विरुध्द पाप केयो हो
19
तुमाहा पोयरो होमजुनो बी मा लायकी रीई नाहा ता माने तो रोजीपे रेनाऱ्या एका मोजऱ्या होस तेबी थोवीले
20
पासे तो हानो पोयरो तीया बाहका जागे जा गीयो ताहा ता तिया कोवा दुरूज आथो ताहाज तीया बाहका ये तियाल वेथो आणे तियाल तीयापे किवा आली आणे धोवळुतो तीया जागे जाइने तिया गाेले लागव्याे आण तीयाल चुंबन दा लाग्यो.
21
पोयराय आख्यो ओबा मायु स्वर्गा विरुध्दाम आणे तुमा विरुध्दाम पाप केयो हो आणे मान तुमा पाेयरो होमजीन रेवुला बी मा लायकी नाहा रीई
22
पेने तिया बाहकाल मोजप्यान आख्यो माहार माहार जा आणे ईया आरो हारे पोतडे ली आवा आणे तियाल तयार केरा आणे आथुम मुप्दी पोवी दया आणे पागाम चापले पाेवी दया
23
आणे मोडो भाडारो दया आपु खाईने खुशीया मोनाऊ हुं
24
काहा का माओ पोयरो मोई गेहलो तो जीवतो वी आलो तो गोमाई गेहलो आथो तो सापडी गीयो हो तीयाल आवे खुशीया मोनावा लागे.
25
तीया ताईमुल तीया मोडो पोयरो खेतुम आथो तो तीया कोवा वेल आवतलो आणे कोवा जागे आलो आणे तीयाय गाणे वाजुला ने नाचुला आवाज तीयाय ऊनायो.
26
तीयाय एका मोजऱ्याल हाद्यो आणे फुचा लाग्यो ई आखो काय चाली रियोहो,
27
तीया मोजण्याय आख्यो तो पावु आलो हो तो तुमा बाहकाल हारीरीत फाये मिली गीयो तीया खातोर मोडाे भाडारो देदाे हो
28
ताहा तीयाल रोग की आली आणे तो कोमे नाय जा लाग्यो ताहा तिया बाहको बारे आलो आणे तीयाल होमजावा लाग्यो.
29
तीयाय तिया बाहकाल आख्यो वे आते वोरेहे माहु तो सेवा चाकरी केई आणे मायु किदीज मायु तुमा आज्ञा मुडी नाया आण मा हेगात्या आरी आनंद मोणवा तुमाय मान किधी साधो भाडारो बी नाहा देतो.
30
आणे जीयाय तुमा आखी मीलकत वेश्या वे उडवी ताकी तो तुमा पोयरा फासे आलो ताहा तुमाय तीया वाहो मोडो भाडारो देदो.
31
ताहा बाहकाल तियाल आख्यो मापोयरा तु सादरन मा आरी हाय आणे जो मा हाय तो आखो तोज हाय.
32
पेन आपु आज आनंद किडु खुशीया मानाका जोजे काहा का तो पाऊ मोई गेहलो तो जीवतो वेयो तो गोमाय गेहलो तो सापडी गीयो.