अध्याय 12
1
ओतामुज हाजारो लोक टोलवाया गिया, आन जाहा लोक तियाल तो ठेपला ठेपली केतला ताहा पेहलो येशुय तिया चेलाहान आख्यो “परुशी पंथा लोकाहा खमीरा बाबतीम तुमा हाेच वीन रेजा, ते ढोंगी हाय,
2
जो खुलो नाय वेनारी एहेंडो काविज बुजलो नाहा आन मालुम नाय पोडे एहेंडो कावीज दोबलों नाहा.
3
जो काय भी तुमा आंदाराम आखहा तो उजवाडाम उनायी आन जो काय मी तुमा केडाल भी कोमे ठाकाज दुदरीन आखाहा तो मोयापे चोडीन बोंबली दी.
4
“ओ मा हेंगात्याहा आय तुमाहान आखुहू जे लोक माहाल माय टाकताहा ते फाचे कावीज नाहा की सेकता तियाहान बियाहा मा.
5
तुमा केडाहाल बिया जो जे इ आय हारकी होमजावीन आखुहू मोला माहाल नरकाम टाकनु जियाल अधिकार हाय तियाल विजा हा आय तुमाहान आखुहू तियालुज बिजा.
6
पाच चिड्या बेन रुप्याहाम वेचात्याहा का नाहा? तियाहामने एकी चिडील भी परमेश्वर विहीरातो नाहा.
7
ओतोज नाहा पेन तियाय तुमा मुनकापेने चोटे भी गोअले हाय, बियाहा मा तुमा चिडीहीसे भी खुब किमती हाय.
8
आय तुमाहान आखुहू, जो केडोमी माहु मान लोकाहा हुबूर मानी लेतो, तियाल पोयरो भी परमेश्वरा दुताहा हुबूर मानी लेहे.
9
पेन जो माहु मान लोकाहा हुबूर नाहा मानी लेतो तियाल तियाल तो परमेश्वर दुतांहा हुबूर मानी नाय लेनारा.
10
आन जो केडोभी माहु माहा पोयरा विरुध्द कांवी गोगी तिया माफी तियाल तिली पेन जो केडो पवित्र आत्मा विरुध्द खोटो गोगी तिया माफी तियाल नाय मिलणारी.
11
जहा तुमाहाल देवलाम, आने सारकारी अधिकाऱ्याहा हुंबूर ली जाय, ताहा तियाहा हुंबूर केहेंकी आन काय आखाहा, इया चिंता माआ क्याहा.
12
काहाका तुमा काय गोगा जोजे, तो पवित्र आत्मों जियाज टेमापे तुमाहान हिकवी”
13
फाचे तिही टोलवाला लोकाहामने एका जाहाय जाहाय येशुल आख्यो “ओ गुरूजी मा बाहाका मालमोला हिस्सो वाटा मा पावाहाल आखी दे.”
14
ताहा येशुय तियाल उत्तर दिईन आख्यो, “दादा मान तुमा न्याय केनारो आन मिलकत वाटी देनारो केडील नेम्यो?
15
आजी तियाय तियाल आख्यों, “बादी जाती लोबाहीने दुर रा खातोर हाचवीन रेजा काहाका केडाल भी तिया तिया खुब मिलकती की जीवन नाहा मिलतो.
16
येशुय तियाहान एक गोठ आख्यी “एका मातला माहा माहा खेताम खुब हारो धान्य पाक्यो,
17
ताहा तो मोनाम विचार केरा लाग्यो आमी आमी आय काय किवु ? काहाका माल थोवनु जागो नाहा.
18
फाचे तो आखा लाग्यो ,आमी आय एहेंकी केहे, मा गोदामे तोडीन मोडे बांदेहे, आन तिही आय मा बादोहे, आन तिही आय मा बादो माल थोवहे.
19
फाचे आय मा जीवाल आखेहे, ओ जीवा तुल खुब वोरेहे पुरी ओतो माल मायुय थोवलो हाय आराम के खो-पी आने मोज्या के
20
पेन परमेश्वराय तियाल आखो ओ मुर्खा आज राती तो तो जीव तोमेने लेवाय जायता तुयू जो हेंगलावली हाय तो केडा वेनारो?
21
जो माहु स्वत: खोतोर मिलकत हेंगलावी थोवेहे तो परमेश्वरा नजरूम मालदार नाहा पेने तो तिया मुर्ख माहा होच हाय
22
ताहा येशुय तिया चेलाहान आख्यो, इया खातोर आय तुमाहान आखुहू आपु काय खाहु, केहकी जीवुहू आने आपु केहडे पोतडे पोवुहू इ बाठ्ठा चिंता मा क्याहा.
23
काहाका मांडा से जीव आन पोतडाहा से शरीर वाद किमती हाय.
24
कागडाहान वेजा ते पोअते नाहा आन वाडते भी नाहा तियाहा कणग्या आन गोदामे भी नाहा ते बी परमेश्वर तियाहान पोहे, तुमा ता चिडाहा से कोता ते भी वादकिमती हाय.
25
तेहेकीज चिंता किइन आपु जीवन आथ पोय वादावा खातोर सोकतीवान एहेंडो आपुहूम एगदो हाय का?
26
इया खातोर वायहानी गोठ भी तुमाहाकी वेअती नाहा ता बिहीरी गोठीही खातोर काहाल चिंता केता बोहताहा?
27
जोनगलुमने फुलाहान वेजा, ते केहेकी वादतेहे ते काम नाहा केअते आन पोतडे भी नाहा हीवते तेभी आय तुमाहान आखुहू शलमोन राजाय भी तियाय राज केयो तिया टेमापे तियाहामने एका फुलाहोच भी पोतडे पोव्ये नाह.
28
जो आज हाय आन हाकाल आगी की बाली टोलेंहे, तियाल जर परमेश्वर ओते हारे पोतडे पोवावेहे ता ओ अल्प विश्वासु लोकाहा तों तुमाहान फुलासे भी हाराम हारे पोतडे नाय पोवावी का?
29
आमा काय खाहु आन काय पिहु इ गोठी मोनाम विचार आन वाय भी चिंता माआ क्याहा.
30
काहाका दुन्यामने लोक ए बाद्या वस्तु होदता फिरताहा पेन तुमाहान तिया वस्तुहू गोरज हाय इ तुमा होरगा बाहाकाल मालुम हाय.
31
पेन तुमा तिया राज मिलवा प्रयत्न केजा ताहा तुमाहान ए बादद्या वस्तु मिली जाय.
32
ओ मेढाहा होच वाय हानी टोली, तुमा बिहाय मा काहाका तुमाहान तिया राज्य देवनु तुमा बाहाकाल हारो लाग्यों.
33
तुमा जी मालमत्ता हाय, ती गोर गरीबाहाल दान की देजा आन जुन्या नाय वेनाऱ्या थैल्या तुमा खातोर तियार की थोवजा, तिही बांड नाहा जाय सेकता आन किडे भी नाहा खाते.
34
“काहाका जिही तुमा मालमत्ता हाय, तिही तुमा मोन भी लागलो री”
35
तुमा कंबर बांदीन तियारीम रेजा आन दिवा वोलता रा देजा
36
जे नोकर तियाहा मालिक वोराडामने केहडीवेल आवी तिया वाट जोवता रेताहा आन जाहा तियाहा मालिक आवीन बानो ठोकेहे, ताहा तियाखातोर तुरूतूज उगडी देताहा तियाहा होच वेजा.
37
जाहा मालिक आवी ताहा जे नोकर तियारीम सापडी ते आशिर्वादीत हाय, आय तुमाहान खेरोज आखुह तिया मालिक आवीन तिया कंबर बरंदीन तियाहान मांडो खा बोहावी आन तियाहा सेवा चाकरी केरी.
38
तो मालिक राती केहेडी वेला भी आवी आन तियाल जे नोकर जागता सापडी ते आशिर्वादीत हाय.
39
पेन आजी इ होमजी लेजा इयाज टेमापे बांड आवी एहेंकी कोमेने मालिकाय मालुम रेतो ता तो तिया तिया कोमे चोरी नाय वेरा देतो.
40
तुमा भी तियारीम रेजा काहाका जो टेम तुमाहान मालुम नाहा तियाज टेमापे माहा पोयरो आवी जाई
41
ताहा पेतराय आख्यो ओ प्रभु गोठ तु आमाहानुज आखतोहो का होग्गान ?
42
प्रभुय आख्यो “ जिया मालिकाय तिया नोकराहान टेमापे खावनु दर जियाल होप्योहो एहेंडो खेरो विश्वासु आन ओकलीवालो कारभारी केडो हाय?
43
तिया मालिक आवी तांवलुग जो नोकर तेहेकी काम केअतो सापडी तो आशिर्वादीत हाय.
44
आय तुमाहान खेरीज आखुहू मालिक तिया आदी मालमत्ता तियाल होपी दी
45
पेन मां मालिक माहार नाय आवनारो एहेंकी मोनाम विचार किइन तो थेय वेरी नेता पुरूष वेरी तीयान ठोकतो वेरी आने खाय-पिइन मोज्या केतो री.
46
तो वाट नाय जोवनारो तिया दिह्या-हदही आन तियाल मालुम नाय तिया टेमावे तो मालिक आवी आन तियाल खुब मार दी आन तियाल अविश्वासी लोकाहा आरी जागो दी.
47
तिया मालिक मोरजी काय हाय इ होमजीन भी, जिया नोकराये तियारी नाहा केयी, आन तिया मोरजी की नाहा चाल्यो तो खुब मार खाय.
48
जियाल काविंज मालुम नाहा तो मार खावनु एहेडो काम केरी तो बायज मार खाय जियाल बाद देदलो हाय तियापने वाद मागी आन तियाल वाद होपलो हाय तियापने वाद हिसाब मागी.
49
आय तोरतीपे आग लागवा आलहो पेन ती पेहलाज लागली वेरी ता कोतो वेतों.
50
मान बाप्तिस्मो लेवनू हाय, तो लेहे तावलुग आय खुब विचाराम हाय.
51
तुमाहान केहेकी लागेहे आय तोरतीपे शांती दा आलोहो? ऐहेडी नाहा आय शांती दा नाय पेन फाटाफुट केरा आलोहो
52
काहाका आजने एहेंकी कोमेने पाच जाहाम विरुध्द बी जाय, तीन जाआ बेन जाहा विरुध्द आन बेन जाआ तीन ताहा विरुध्द
53
बाहको पोयरा आन पोयरो बाहाका विरुध्द केरी, याहकी पोयरी आन पोयरी याहाकी विरुध्द केरी, हावडी बोवडीही आन वोवडीही हावडी विरुध्द केरी,
54
फाचे येशुय लोकाहान आख्यो, जाहा तुमान वादंलो दिही बुडलो वेलने आवता देखायेहे ताहा तुरुतूज आखताहा आमी पाय पोडी आन तेहेंकीज वेहे.
55
जाहा दक्षिणावेलने वारो सुटेहे ताहा खुब तोपी एहेंकी आाखताहा आन तेहेंकीज वेहे.
56
ओ ढोंगी लोकाहा तोरतीपे आने आकाशाम काय वेहे तो तुमा होमजी लेताहा पेन इया टेमा निशाणी काहाल नाहा होमजी सेकता?
57
इयाखातोर काय हारो हाय तो तुमा केहेकी नाहा होमजी लेता?
58
तु तो विरुध्द केनारा आरी अधिकाऱ्याही जातोहो ताहा वाटीनुज तिया आरी होमजी जाजा नेता तो तुम्हान न्याय केनारा अधिकाऱ्याही ली जाय आन ते तुल सिपाडाहा आथाम होपी दी आन सिपाडा तुल जैलुम टाकी दी
59
आय तुम्हाल आखुहू तुम्हा तावलुग बादा पोयसा नाय पोहा मावलुग तिहीने तुम्हा सुटनारा नाहा.