¹ Mengka, ake mengoleh de tangon kanon Enye nyo duduk de pucuk takhta iye sebuah gulungon* kitab, nyo mempunyoi tuleson de sisi delom ngan luornye, nyo de segel dengan tujuh segel. ² Ngan, ake mengoleh sikuk malaikat nyo gagah buik dengan suaro karas," Siapekah nyo layak membuka gulungon kitab iye ngan membuka segel-segelnye?" ³ Cuma hambuk, hopi ado seurang pun, beik nyo de serga, de behumi, maupun nyo de bewoh behumi nyo depot membuka atau mengoleh bageon delom gulungon iye. ⁴ Mengka, ake mulakih meratop tersedu-sedu ulenyo hopi ado seurangpun de depoti layak untok membuka gulungon kitab iye atau mengoleh bageon delomnye. ⁵ Cuma hambuk, sikuk deri tuha-tuha* iye buik kenempatke," Berentilah meratop! Koleh, singa deri suku Yehuda, keturunon Daud*, lah menang singgo Enye depot membuka gulongon kitab iye ngan tujuh segelnye. ⁶ Ngan, ake mengoleh de tangah-tangah takhta ngan 4 makhluk tadi, ngan de tangah-tangah padong tuha-tuha iye seekor Anak Domba togok, upa lah de sombeleh, nyo memilikih tujuh tanduk ngan tujuh mato, yaitu tujuh Roh Allah nyo de utus ke segelo behumi. ⁷ Anak Domba iye njongok ngan mengambek gulungon kitab iye deri tangon kanon Enye nyo duduk de pucuk takhta. ⁸ Ngan, tekalo Anak Domba lah mengambek gulungon kitab iye, keempat mahkluk ngan kedua puluh empat tuha-tuha sujud de hadopon Anak Domba iye, maseng-maseng memogong sebuah kecapi ngan sebuah cawan emas nyo ponuh dengan kemenyan, nyo adolah doa urang-urang kudus. ⁹ Mengka, mike menyanyiko suatu nyanyion beheru, ujonye : " Kowe layak mengambek gulungon kitab iye ngan membuka segel- segelnye ulenyo Kowe Lah de sombeleh, ngan dengan deroh-Me, Kowe lah menobus urang-urang deri setiap suku, Bahaso,kaum,ngan bengeso bage Allah. ¹⁰ Ngan Kowe lah menjediko mike menjedi suatu kerajakon ngan imam-imam bage Allah kite, ngan mike bakal memerentah pucuk behumi." ¹¹ Mengka, ake mengoleh, ngan ake mendongor suaro deri lobot malaikat nyo mengelilengi takhta, 4 mahkluk, ngan padong tuha-tuha iye. Ngan jumlah mike beribu-ribu, bahkan puluhon ribu, ¹² Mekek dengan suar nyo karas, " layaklah Anak Domba, nyo lah de sombeleh iye, menerimo kuaso, ngan kesugihon, ngan hikmat, nga kekuaton, ngan hormat, ngan kemuliaon, ngan pujion." ¹³ Mengka, ake mendongor setiap makhluk nyo ado de serga, ngan de behumi, ngan de bewoh behumi, ngan de lout, ngan segelo nyo ado de delom, segelo iye buik, " Bage Enye, nyo duduk de pucuk takhta, ngan bage Anak Domba, Segelo pujion, hormat, kemuliaon, ngan kuaso sampoi selamo-lamonye!" ¹⁴ Ngan, 4 makhluk iye buik, " Amin!"* ngan padong tuha-tuha sujud ngan menyembah.