¹ Lah iye, ake ngoleh sebuah pintu tebuka de serga, ngan suaro tadi, nyo ake mendongor upa suaro terompet buik denganke, buik, " Noeklah ke sie ngan Ake bakal mengolehko kenempatme ape nyo arus terjedi sesodah nie." ² Saat iye jugo, ake de kuasai Roh* ngan kolehko, sebuah tahta ado de serga ngan seseurang duduk de pucuk tahta iye. ³ Ngan, Enye nyo duduk de pucuk tahta iye, tampak upa betu permata yaspis ngan sardis; ngan ado sebuah pelangi de sekelileng tahta iye, nyo tekoleh upa zamrud. ⁴ De sekelileng tahta iye ado dua puluh empat tahta iye ake mengoleh dua puluh empat tuha* duduk, memakoi jubah puteh ngan mahkota-mahkota emas ado de kepalo mike. ⁵ Ngan, deri tahta iye keluor kilatan petir ngan gemuruh suaro guntur. Ngan, ado tujuh dian nyo menyala de depan tahta iye, nyo adolah tujuh Roh Allah. ⁶ Ngan, de depan takhta iye jugo terdepot sesuatu upa lauton kaca, upa kristal. De tangah ngan de sekelileng takhta iye ado empat makhluk nyo ponoh ngan mato de bagion depan ngan belakongnye. ⁷ Makhluk nyo pertamo upa seekor singa, ngan makhluk nyo kedua upa seekor lembu jenton, ngan makhluk nyo ketiga bewajah upa wajah mendesio, ngan makhluk nyo keempat upa seekor burung elang nyo sedang terbang. ⁸ Keempat makhluk iye maseng-maseng mempunyoi enam sayap nyo ponuh dengan mato, beik sisi luor maupun delomnye; siang ngan malom, keempat makhluk iye hopi perenah berenti buik, " Kudus,kudus,kuduslah Tuhan, Allah Nyo Mahakuaso, nyo sodah ado, nyo ado, ngan nyo bakal njongok." ⁹ Ngan, setiap kali makhluk - makhluk iye memboriko kemuliaon, hormat, ngan ucapon syukur kenempat Enye nyo duduk de pucuk takhta, nyo hidop selamo-lamonye, ¹⁰ Kedua puluh empat tuha-tuha iye sujud de hadopon Enye nyo duduk de pucuk takhta iye, ngan menyembah Enye nyo hidop sampoi selamo-lamonye iye, ngan melemparko mahkota mike de depan takhta iye sambel buik, ¹¹ " Ao Tuhan ngan Allah kamie, Kowe layak menerimo kemuliaon, hormat, ngan kuaso Ulenyo Kowe lah menciptako segelo sesuatu ngan ulenyo kehendakMe segelo iye ado ngan De ciptako."