5 ¹ Ixidi arukimy atximyhỹke tibede-ò tamyhỹteu. Kiauritre aõsirasira iwahidỹỹõmy, iwese iny itxỹte mahãdu taõsirasira riwahinymyhỹre wese, kia tii boho rieryrenyke aõkõ, kia òbitimy aõkõ riwinyrenyreri. Bexihumy bexiywinymy mamyhỹke Deuxu rybe-ò bityhynykremy. ² Kia komy mohõtinykre marybekrekotyremy, kiauritre Deuxu aõ adee wylemy riurenykelau turybeõmykre. Deuxu heka biu-ki ratxireri, kai tahe suki atxiteri; iurenana tahe urihimyòmy mareke. ³ Kia kai mohõtiuretyhykre-wana, kia ire uni atỹhimy araijekre; kia kai marybesõekre-wana, kia iny itxỹte mahãdu raryberenykre. ⁴ Iwese tahe kai Deuxu dee arybe biwahinykre, kia wiylemy arybemy inatyhymy marybekre. Tii heka iny itxỹte mahãdu luuõre; iurenana ta aõmybo riwahinykremy rarybere biwinyke. ⁵ Kialehe awireuritre aõ biwinykremy rubeõmyke, aõ biwinykre kotyremy, kia tahe tuu tarybeta hãrele teralemy beakre. ⁶ Kiauritre arybetyhy òrarunamy rarybekelau iwahidỹỹõmy. Tai tahe kai timy aijoi mahãdureny-ò arybeõna, aõmybo kai marykemyra, kia aõbo raremy. Aõmybo tahe Deuxu umy radònykremy bisỹnykre? Aõherekibo tahe kai Deuxu aõnaõna aaõmysỹdỹỹuludumy ixidee tearite rihukremy biwahinykre? ⁷ Kiemy dori iwese iny ibutumy rarasinymyhỹrenyre iximyreny, kia iwesele tahe irybereny sõere; iurenana tahe kai Deuxulau buberukre. ⁸ uritre bede òtiidỹỹõmy, kia tiu kai tihãwa bede-ki hãwa dinodu aõnaõnabina riwinykreu, kia iny iaõkõmy rỹira mahãdudile tarukimy rexiemyhỹre, kia urile aõ ihõrõreny ilau ritòenymyhỹrenyre. Kia iny aõwedumy rỹimyhỹrenyre sohoji sohoji, kia heka tibo iratyreki ratximyhỹre wii riijemyhỹrenyre. ⁹ Tii boho myy rarybemyhỹrenyre: “Ibutumy heka iny su-ribi aõnaõnawiwi ritamyhỹrenyre brò-ribi awimy ratximyhỹre.” ¹⁰ Mobo nierumy rerinamyhỹre, kia tiu awimytyhymy ratxiõhyymyhỹre; mobo ityhymy ratxikemy ixidi rõhõtinymyhỹre, kia tiu ibutumy aõbo reamyhỹre rimyõtyhy. Kia heka tule bòdỹỹnale rare. ¹¹ Kia iny iaõdimy ityhymy rỹimyhỹre, kia iry tahe ijõdire riroxikremy. Aõbo tahe tai tii ritamyhỹre, kia iaõdimy ityhymy raeryke sohojikile awire. ¹² Aõmysỹdỹỹdu mahãdu aõwaxina taireny urihimyòmy txibo sõemy aõbo ijõdike irỹsỹnareny, kia heka tai awiriòre rumy rõrõmyhỹrenyre. Kia iaõdimy ityhymy rỹimyhỹrenyre, kia sõemy rõhõtiyremyhỹrenyre aõnaõnamy rõhõtinymyhỹrenyre, kia rumy rõrõrenywirenyõhyymyhỹrenyre. ¹³ Diarỹ heka ka hãwaki aõnaõna bederyrynamy rabire: Iny mahãdureny-ò heka nieru ributunymyhỹre, kia tahe ihãrele idi aõhyymy rutỹỹnymyhỹrenyre. ¹⁴ Kia heka ibutumy rihumyhỹre aõmysỹdỹỹna binaki, kia tahe aõ tariòre boho-ò ririõhyymyhỹrenyre. ¹⁵ Timykibo tahe iny boho ka hãwa-ò rirònyrenyre, kia tahe iyrybyle iny riòlònymyhỹrenyre, aõnaõnahomy aõkõ. Kia iny boho iny aõmysỹdỹỹna brò-ribi aõ rikiwyrenyke ihoõre. ¹⁶ Kia heka bederyry nihikỹõle rare! Iny boho heka ka hãwa-ribi rykòirenykre, iwese iny boho dòidenyde wesele. Sõemy iny boho raõmyhỹdỹỹnymyhỹrenyre, yhy rikimyrenykemy iny risỹnymyhỹrenyre, aõbo tahe iny boho tai ritamyhỹrenyre? ¹⁷ Kia bederuluki bederyrymy rytxirenykrele iny boho ritamyhỹrenyre, rykõhõtiyrerenymy webinadu rykatximyhỹrenyle iny boho ritamyhỹrenyre. ¹⁸ Tai tahe reerymy rebutunyre: Kiale heka awire iny-õ riroximy rỹimyhỹre, aõbo ritamyhỹre taõmysỹdỹỹna brò-ribi. Ka heka iny sohoji sohoji riònymyhỹre. ¹⁹ Txibo Deuxu aõwi riwahinyre maityhynykremy, kia tahe aõdimy atximyhỹte biatyke, kia mabydesakre aõbo tetate aõmysỹdỹỹuludumy. Kia heka Deuxu adee riwahinyrerare. ²⁰ Kai tahe bede rexihumy ramyhỹre bieryõhyykre, kiemy dori Deuxu acoração bedesana-di ritỹxinykre.