61
اون مسیحیانی کی بَرده و غُلامد، وَأستی خوشَأنِ اَربابانِ رِه خوب کار بوکوند و اوشَأنَ احترام بند تا مردم دربارۀ خدا نامْ و اَمی تعلیم بدگویی نوکوند.
2
غلامانی کی اَربابِ ایماندار دَأرد نوَأستی چون اَربابِ مرَه رابطۀ برأری دَأرد اَ موقعیتِ جَه سوءاستفاده بوکوند و اوشَأنَ کمتر احترام بند، بلکی برعکسْ، وَأستی حتی ویشتر خدمت بوکوند، چون اوشَأنِ خدمتِ سود کسیَه فَأرسه کی ایماندار و عزیزه. اَ چیزانَ تعلیم بدن و اوشَأنَ تشویق بوکون کی انجام بدد.
پولدوستی آخرعاقبت
3
اگر کسی طورِ دیگری تعلیم دهه و اَمی خداوند عیسی مسیحِ کلامِ صحیحِ اَمرَهْ و تعلیمِ دیندارانه اَمرَه موافق نییه،
4
غرورِ جَه مَستَ بوسته و هیچی نفهمه. اَجور کس دیوانه وار علاقه دَأره کلماتِ رو چانه بزنه و جَرّ و بَحث بوکونه، کی اونِ نتیجه حسودی و دعوا و فحش و بَدگُمانیه
5
و باعث بِه کسانی میَأن کی اوشَأنِ فکر فاسدَ بوسته و حقیقتِ جَه دورَ بوسته دَأرد سال دوازدَه ماه درگیری بمَأنه، اوشَأنْ خیال کوند دینداری وسیله ایی ایسه پول بیرون آوردَأنِ رِه. اَجور آدمانِ جَه دوری بوکون.
6
ولی خداپرستی قناعتِ اَمرَه آدمی رِه مَنفعَت دَأره،
7
چون اَمَأن چیزی به اَ دونیا نَأورده دَأریم و واضحه کی چیزی هم نتَأنیم بوبوریم.
8
پس اگر خوراک و رخت و لباس به اندازه کافی دَأریم وَأستی راضی بیبیم، حتی اگر ثروتی نَئریم.
9
ولی اوشَأنی کی نأجه دَأرد ثروتمند بوبود وسوسه یَ دوچارَ بود، اوشَأنْ اَمیالِ پوچ و زیان آورِ دامِ دورون گرفتارَ بود کی انسانَ نابودی و تباهی طرف فأکشه.
10
چون پولدوستی ریشه ایی یه کی همه جور بدی اونِ جَه به بار اَیه، بعضیان حتی پولِ وَسی خدا جَه رو وَأگردَأنه دَأرد و ایمانِ جَه مُنحرفَ بوستد، و خوشانَ انواعِ دَردانَ مُبتلا بوکودد.
پولسِ سفارش به تیموتائوس
11
ولی تو ای مردِ خدا، جی همۀ اَشَأن فرار بوکون، و عدالت و دینداری و ایمان و محبت و صبر و ملایمتِ جَه پیروی بوکون.
12
تی ایمانِ رِه خوب جنگ بوکون، و اون حیاتِ جاودانی یَ کی اونِ رِه دخَأده بوبُسته ایی یَ بدس بأور، تو شاهدانِ زیادِ حضورِ جَه بخوبی تی ایمانَ اعتراف بوکودی،
13
خدایی حضورِ جَه کی همه چیزَ زندگی بخشه و مسیحِ عیسی حضورِ جَه کی خودشم پنطیوس پیلاتُسِ ورجَه اعتراف نیکو بوکود، من ترَه سفارش کونم
14
کی اَ حُکمَ تا اَمی خداوند عیسی مسیحِ ظهور موقع بی کَم و کاست بدَأری، تا کسی نتَأنه تی جَه عیب و ایرادی بیگیره.
15
چون خدایِ متبارکْ کی قادرِ کُل و شاهِ شاهان و رَب الاَربابه در اون زمانی کی معین بوکوده مسیحَ اوسه کونه.
16
اونی یَ کی تنها وجودی ایسه کی جی میَأن نیشه و نوری دورون ساکنه کی نشَه اونَ نزدیکَ بوستَأن، اونَ کی هیچکس تا هَسَه نیده دَأره و نشَه دِئِن، عزّت و قدرت تا اَبدالآباد اونِ شین بیبه. آمین
17
اَ دونیا ثروتمندانَ حُکم بوکون کی بلندپروازی نوکوند و مالِ دونیایَ دیل دنوَدد کی دیر یا زود جی میَأن شِه، بلکی خدایِ زنده یَ توکل بوکوند کی همه چیَه به فراوانی اَمرِه تهیه کونه تا اوشَأنِ جَه لذت بوبوریم.
18
و اوشَأنَ بوگو خوبی بوکوند و نیکوکاری دورون ثروتمند بوبود، و کارِ خیرِ دورون دست و دیلباز بوبود،
19
و اَطو گنجی خوشَأنِ رِه ذخیره کوند کی اوشَأنِ زندگیه آینده پِی بِهه و اون حیاتَ، کی حیاتِ واقعی ایسه یَ بدس اَورد.
20
ای تیموتائوس، اونچی کی ترَه امانت بیسپُرده بوبُسته یَ حفظ بوکون، ترَه درگیرِ گبایِ بی معنی و کُفرآمیز نوکون و جی بحث هایِ دوروغی کی به غلط «مَعرفت» گوید دوری بوکون.
21
بعضیان کی خیلی هم اِدعا دَأشتد، هَ بحثانِ مرَه ایمانِ جَه مُنحرفَ بوستد.
فیض تی اَمرَه بیبه.