1
ولی روحْ آشکارا گویه کی زمانهایِ آخرِ رِه، بعضیان ایمانِ جَه وَأگردد و روح هایی دونبال شُد کی گومراه کوند، اوشَأن شیطانِ تعالیمِ جَه پیروی کوند.
2
اَ تعالیمَ ریاکاران و دوروغگویانی اَورد کی وجدان نَئرد.
3
مثلاً گوید کی ازدواج کودَأن و یا گوشت خوردَن کار دوروستی نییه، در حالی کی دَأنیم خدا اَشَأنَ فَأدَه دَأره تا مؤمنینی
4
کی حقیقتَ دَأند شُکرگزاری مرَه اَ چیزانِ جَه بهره بوبورد.
5
چره کی خدا کلامْ و دعا مرَه تقدیس بِه.
6
اگر اَ دستورانَ دیگرانَ تعلیم بدی، مسیحِ عیسی خادمِ شایسته بیهی کی جی ایمان و تعالیمِ دوروست بهره بوبورده دَأره، هون تعالیمی کی اونِ جَه پیروی بوکوده ایی.
7
تو اَفسانه یانِ کُفرآمیز و پیرزنَأکأنِ حکایتانِ اَمرَه کاری نَدَأر، بلکی تلاش بوکون زندگی خداپسندانه ایی بدأری.
8
تمرین و ورزش بدنِ رِه مفیده، ولی دینداری و ورزشِ روحانی خیلی مفیدتره، و ترَه هر کاری رِه آماده کونه، اَ تمرینات نه فقط اَ دونیا رِه مفیده، بلکی وعدۀ حیات آینده یَ دِهه.
9
اَ گب دوروست و کاملاً قابلِ قبوله
10
کی اَمَأن اَمی اُمیدَ خدایِ زنده رو بنَه دَأریم کی همۀ آدمیان و مخصوصاً مؤمنانِ نجات دهنده یه، و هَنه وَسی هم زحمت کشیم و تقلا کونیم.
11
اَن موارد چیزایی ایسه کی تو وَأستی حُکم بوکونی و اوشَأنَ تعلیم بدی.
12
وَأنأل کسی تی جوانی وَسی ترَه حقیر بدَأنه، بلکی گفتار و کِردار و مُحبت و ایمان و پاکی دورون، همۀ مؤمنانِ رِه سرمشق بوبون.
13
تا موقعی کی من بأیم تی ورجَه، تی وختَ صرفِ موعظه و تعلیم و کتاب مقدسِ خواندن بوکون.
14
وختی کشیشان تی سرِ رو دس بنَأد، خدا بواسطۀ نبوّت عطایایی ترَه ببخشه، اَن عَطایایَ کی تی وجودِ میَأن نَهه یَ بی اِعتنا نوبون.
15
اَن چیزانِ رِه تلاش بوکون و تمامی تی وختَ خدا خدمتِ رِه بنن، تا همه متوجه بوبود و تی ترقی یَ بیدیند.
16
مراقب بوبون چوطو زندگی کونی و چی تعلیم دیهی و اَ اُمورِ دورون اُستوار بِئس، کی اگر اَ کارَ بوکونی هم خودت و هم کسانی کی ترَه گوش دهدَه نجات دیهی.