1
1
جی پولسِ طرف کی اَمی نجات دهنده خدا حُکمِ مرَه، و اَمی اُمیدُ اَمی خداوند مسیحِ عیسی دستورِ اَمرَه، عیسایِ مسیحه رسوله.
2
به تیموتائوس، می زأیِ حقیقی کی ایمانِ میَأن دَأرم. فیض و رحمت و سلامتی جی خدایِ پئرِ و مسیحِ عیسی طرف ترِه بأیه.
هشدار دربارۀ تعالیم غلط
3
هوطو کی وختی خَأستِم بوشوم مَقدونیه ترَه اِصرار بوکودم، بازم تی جَه خَأیم کی اَفِسُسِ میَأن بِئسی تا بعضیانَ فرمان بدی کی تعلیمِ دیگری ندد
4
و خوشَأنَ افسانه یانُ شجره نامه هایِ طولانی و بی اِنتها مرَه سرگرمَ نوکوند، چون اَ کاران بجای اَنکی خدا کارَ ترویج بوکونه کی جی راهِ ایمان بدس اَیه، فقط بحث هایِ پوچ و بی ثمرَ باعث بِه.
5
اما می منظور جی اَن حُکم اَنِ کی تا اویِ مسیحیان جی محبتی لبریز بوبود کی دلی پاک و اَنگیزه ایی دوروست و ایمانی اصیلِ جَه بوجود اَیه.
6
بعضی کسان جی اَن اُمور مُنحرفَ بوسته دَأرد و فقط بحث و جدلِ دونبال ایسَد.
7
اوشَأنِ دیل خَأیه کی شریعتِ مُعلم بوبود، ولی اصلاً نفهمد چی گوفتَأن درد و یا دربارۀ چی اَطو مطمئن حرف زند.
8
اَمَأن دَأنیم کی شریعت خوبه، ولی اگر کسی اونَ دوروست انجام بده.
9
و اَنم دَأنیم کی شریعت نه دوروستکارانِ رِه، بلکی قانون شکنان و یاغیانِ رِه وضع بوبُسته. بی دینان و گوناهکارانِ رِه، ناپاکان و کافرانِ رِه، کسانی کی خوشَأنِ پئرَ یا خوشَأنِ مارَه کوشد، و آدم کشانِ رِه.
10
زِناکارانِ رِه، همجنسبازانِ رِه، آدم دوزدانِ رِه، دوروغگویانِ رِه، کسانی کی شهادتِ دوروغ دهدِ رِه، و همۀ کسانی کی اعمالی انجام دهد کی برخلافِ تعلیمِ صحیحه.
11
تعلیمی کی انجیلِ میَأن نَهَه، هون انجیلی کی خدایِ پورجلال و مُتبارک مرَه بیسپُرده دَأره تا اونَ اعلام بوکونم.
خداوندِ فیض نسبتِ به پولس
12
اَمی خداوند عیسی مسیحَ شُکر کونم کی مرَه قوّت ببخشه و لایق بدَأنست و اَ خدمتِ رِه مرَه انتخاب بوکود.
13
با اَنکی پیشترانِ رِه مسیحَ کُفر گوفتم، و مسیحیانَ اَذیت و آزار کودم، اما خدا مرَه رَحم بوکود، چون بی ایمان بؤمُ نادانْ و نَأنستِم چی کودَأن درم.
14
وای کی اَمی خداوند چقدر مهربانه، اون خو فیضَ می رو جاری بوکود و مرَه نیشان بدَه کی چوطو اونَ ایمان بأورم و مسیحِ عیسی مُحبتِ جَه لبریز بوبوم.
15
اَ حرف دوروست و کاملاً قابلِ قبول کی مسیحِ عیسی به اَ جهان بأمو تا گوناهکارانَ نجات بده کی من اوشَأنِ پیله ترینم!
16
ولی خدا مرَه رَحم بوکود، تا اَطو عیسای مسیح بتَأنه مرَه به عنوانِ نمونه دیگرانِ رِه بکار بوبوره، و نشان بده کی حتی نسبتِ به من کی گوناهکارانِ پیله ترین بؤم صبر دَأره، تا همه بفهمد کی اگر اونَ ایمان بأورد تَأند حیاتِ جاودانی بدَأرد.
17
پس حُرمت و جلال تا اَبدالآباد بر اون خدایِ حکیم و یکتا، بر اون پادشاهِ جاودانی، بر اون خدایِ نادیده کی اَبدیه، آمین.
18
ای می پسر تیموتائوس، مطابقِ نبوّتانی کی دربارۀ تو بوبُست من اَ حکمَ ترَه ایسپارم؛ خداوندِ رِه خوب جنگ بوکون. و اُمیدوارم اون نبوّتان و پیغامان ایتَه سِلاح مَأنستَأن اَ جنگِ دورون ترَه یاری بوکونه.
19
خودتِ ایمانُ تی وجدانَ پاک بدَأر، چون بعضیانِ ایمانِ کِشتی بیشکفته دَأره، اَن وَسی کی خوشَأنِ وُجدانِ ندایَ گوش نوکودد.
20
کی هیمینائوس و اِسکندر دو تَه نمونه جی اَجور آدماند. اوشَأنَ شیطانِ چنگِ دورون ولَ کودم تا تنبیه بوبود و درسِ عبرتی بیگیرد و دِ کفر نوگوید.