8 ¹ Elialhneg'a, nenmac'ac angelleltennasama ania'a caselha actacmelo lhta apquelanai'a Engiapom Neten apiesecsec ma'a Jesucristo apquennemolhema aquieto iocjalhma Macedonia. ² Awanje lhta apquellengaianco niecje m'a, coca apqueluascapme lhta metca alietnocjai'o njan apualho'oc, niecje aptaicamoc metca caselha apanco'oc apquellanquesaicocjec coca pataccom metca apquenmeiauquesammacpo apquellapasquescamo Jesucristo apquennemolhem'a m'a. ³ Apquellaianque lhta apquelapuanquelha la ellancoc, nlho ca la njan tep atquesec mocjom aniem'o apanco'oc apancawec apualho'oc, ⁴ jengelleltennascama apancawe lhta apquenmajai'a ellancoc patacom apquellanquesecja cacpota elpasmoc Jesucristo apquennemolhema m'a. ⁵ Apquelpenesawe lhta njan apquetlheianma cacpota ellasennama actacmanma nquec Engiapom Neten, cacpota njan angellasennama ennenco'o. Jai, aptanque lhta apquelleltemacja la etnancoc Engiapom Neten ma'a. ⁶ Nesca aptaienta lhna lhta amaica'a Tito jam apiesecsec quetlhencap, apqueliatecjo lhna lhta njan ellanquesecjac pataccom cacpota ellapacsec, colhua angellapacsec jata mocjom Tito cacpota eluatac pataccom jam. ⁷ Asiawe co'o quetlhencap apquelienlhanmecamo mota eliawencasancoc actacmanma actacja la apqueluetai'a apquellanai'a po'oc, meliasqueiam, actacmanma apquelpaqmetecama, apquelianweiacmo, acmases apualho'oc necsa apquenmacmecama, jengellamelaiacmo njan ennenco'o, ca lhamacjo caselha nac apquellanecamoc quetlhencap tep anquec actacmanma. ¡Elienlhanmamoc jata njan eliawencasancoc tep mocjom pataccom apquellanquesecja cacpota elpasmoc po'oc! ⁸ Jawe aquiennactema ejetong asquelanei'o quetlhencap, wanlha squeltawec aliatecjojo cacpota ellancoc pataccom po'oc, aptaiancolha lhna lhta ma'a engelialheng'a co Macedonia, metca apquenmeiauquesammacpo lhna lhta pataccom apanco'oc ellancoc ma'a, etnamoc jata njan quetlhencap ma'a cacpota eluetacpoc jawe ngiapac anquec apquellamelaiam po'oc. ⁹ Etnamoc jata njan aptemacja lhna lhta Cristo, nema apquetsecama lhna lhta m'a, coca aptemonwai'ac metca apquetsecama la jenque'e cacpota eltemesquescac quetlhencap malha nema apquelletsecama la'a. ¹⁰ Quetlhencap anio lhta apmaniaie apquellapascama pataccom apquellanquesecja aquieplomo allecclemo apualho'oc alhta. Colhua smac'ac allancoc aspaioma ¹¹ ntasec etlhenquesec apquellanquesaicocjac pataccom apquellapuanquelha la'a, aquieplomo njan allecclemo apualhoc. ¹² Apquellanco la pataccom aquieplomo alpaijecja apualho'oc, niecje quetsec la'a, nlho ca la njan aquiawai'a pataccom, ncolleccasama ta njan Engiapom Neten. ¹³ Mangelleltoc ennenco'o etnocjac metca apquelletsecama quetlhencap, etnocjac nema apquelletsecama m'a apquellelto apquetlhewai'a pataccom, nengelleltawec coca ncotnec acnemo mo'oc. ¹⁴ Nietnec colhua nquescama apanco'oc caselha quetlhencap, apuanca'ac elpasmoc metca nac apquelletsecama, etnancocjac jatelha njan metca apquelletsecama quetlhencap lhema acnem la'a, jatelha njan ncollengientac na apquelpasmoma quetlhencap ma'a, malha apquelietquescama ta ncotnec ma'a. ¹⁵ Ca netmac na actalhesammalhca waccajac Engiapom Neten apaioma jenque'e: «Apto lhta apiaqjecama nquescama, coca ma lhta njan ncolaimelhcac ma'a, apto lhta njan apiaqjecama apcanet apanque, ma lhta njan engiaimecpoc ma'a» ¹

Pablo apcapascama Tito

¹⁶ Gracias co stemac Engiapom Neten aquietnemo njan Tito aptaicama apualhoc apquellanei'o quetlhencap jam, awanjec apmajai'a elpasmoc malha ctonac co'o. ¹⁷ Asqueltennasque lhta Tito ntasec engiacjac etnocjac amaica'a jam, apcasecjawe lhta astacja ascano aniem'o njan apualhoc apanque apmajai'o. ¹⁸ Asmac'ac anwapacsec colhuawe nac Tito jam, aplhelhma njan lhema engialheng apto lhnac apquetlheianma mota Jesucristo apquennemolhema lhamacjo iocjalhma apiamolhma m'a, actacmanma apmacmecama lhnac na m'a apaiescama ania'a actacmanma. ¹⁹ Apto lhta njan nema aliequiescama cacpota antancoc netlhelhma'ac necsa nenlhengama mota netsenta pataccom nema anquesecja cacpota angellanconwacjac engellialheng'a alaimommalhca nac caselha apanco'oc, wanlha mota netlhengama nenmajai'a angelpasmoc emmo'oc ma'a, nellac'awec na Engiapom Neten. ²⁰ Ca engialheng anac jengelpasme mota apqueltacmelquescama pataccom cacpota mancoitec anmasonca apualho'oc enenlhet, mellentepcasama njan neluesai'a enennco'o. ²¹ Jai, squelienlhanacmawec co'o mota alanac acpeiwomo napaqtec Apuesque, napaqtawec na enenlhet'awoc. ²² Asmac'ac na anwapacsec po'oc engialhneg eltec na apquetlhelhma'ac jam, apto njan apieplauquescama apmacmecama la'a, apnescamo nja mota apmajai'a epasmoc po'oc, apiawe na apquellelto apqueliamolhma quetlhencap. ²³ Asiecpelquemo co'o aptemacja Tito astema nja mota alhelhma, nenmacmecama nempasmecja cacpota ncoltacmelquesquesec apquellaniemjaicama quetlhencap jam, coca apqanet anac engelialheng'a apqueliecpelquemo lhnac aptaiancolha lhamacjo Jesucristo apquennemolhma, apquellai'o lhnac na Apuesque m'a. ²⁴ Eltacmelcaso ta apquellanei'o apqueluactamo ta jam cacpota lhamacjo Jesucristo apquennemolhema lhmanquec jam ncotlheianwacjoc apualho'oc jawe ngiapac actemacja netlheianma ennenco'o apqueliamolhma quetlhencap jam.