7 ¹ Elialheng'a, aplheianma lhta apenescamo apaioma Engiapom Neten jengeltacmelquesquesec jata nellaniemjaicama ennenco'o ca ncanec ntasec antacmelquesec neliocja nac cacpota njan enwalho'oc, enwanquec na angellajo mota Engiapom Neten, angelienlhanmancoc na metca nellanecamoc caselha ncolatsecama. ² Elialheng'a, jengenmecjo ta tacja mocjom ennenco'o, mongellaneiancoc ennenco'o ncoietemo napaqtawec quetlhencap, man na annactewascamac ma'a, monnactewascamoc na angenmacmesamaja. ³ Momac'ac co aliamenalhca enenlhet apquellawa nac jam jengetlhenaianca lhna lhta, nellamelacmec ma'a acno la mo'oc engellualho'oc atlheianma njan ma'a, canjan acuo'o la ncolhnemo mo'oc engellualho'oc. ⁴ Nennactewasemmalhquec ennenco'o engancawec aniem'o mo'oc actema alquetamecama engellualho'oc, ncacjoc coca ncaqjaicama ewalhoc asquellaneio mota quetlhencap ca nqueniemai'ac asuascapecjo m'a canjan apquelpaiesecja mota ewalhoc, jawe ngiapac astacja nac. ⁵ Awanje lhta nellengaianco ampo'o lhta neluai'o nac jenque'e Macedonia, ma lhta angeliamposammalhca, nellammelhque lhta caselha acmajai'a jennactewacsec ma'a canjan ai'a engellualho'oc. ⁶ Apquelpaiescacme lhta engellualho'oc Engiapom Neten apto apcapascama Tito jenque'e cacpota antancoc netlhelhma'ac, ⁷ atse lhta apualhoc apuo'o Tito jenque'e, apsantamo ania'a apqueluesai'a quetlhencap, apquenmajai'o lhnac jengelluetac ennenco'o, nquellaiosesquescanquec nac na apualho'oc quetlhencap aniem'o m'a nentancolha lhta, awanjec nac na altaicama apualho'oc jellanei'o co'o m'a, coca awanjec na acpaijecja ewalhoc asleng'o ania'a apsenta Tito. ⁸ Asleng'a lhta anmaiosac'a apualho'oc quetlhencap aniem'o waccajac alhta astalhesquescama asquellapasquescama lhta quetlhencap jam, jetnescaso lhta njan co'o acmaiose ewalhoc. Colhua coca nlheianwacjoc ewalhoc ntasec asquelapasquescamo waccajac alhta, amanie altemesquescamo lhnac anmaiosac'a apualho'oc ma'a, coca iacuatacjo lhna ntemac ma'a, ⁹ netamen atlheianwecjo lhnac na apualho'oc mancolietemo aptaiancolha, ca apquellanecjo lhnac na apualho'oc quetlhencap jam. Monactewasquescama niecje apualho'oc quetlhencap ma'a waccajac alhta asquellapasquescama, aselhtec anmaiosac'a apualho'oc aniem'o coca njan Engiapom Neten ma'a ¹⁰ cacpota ncolleltoc ellanecjac apualho'oc ma'a, eluoncasacpoc na tep ¡Ntasec anquec ma'a! Coca apqueluet'o la anmaiosac'ac apualho'oc metca coca apquellanecja apualho'oc, acjemo m'a, nqueliantemacjec amai negetsepmacja m'a. ¹¹ Allaiosai'o lhna apualho'oc quetlhencap necsa apquelietsatecamoc waccajac alhta astalhescama aquiennactema aspaioma asquellaicamoc, coca aniem'o njan Engiapom Neten anmaiosac'a apualho'oc quetlhencap cacpota ellanecjac apualho'oc necsa apnactewascama asuesai'a jetlheianma co'o, nquetlheianwecjec nac na apualho'oc asiamolhma co'o, ca jellatemmocquesquescamo lhna lhta njan alhenammalhca co'o melleltemo alhenalhcac mocjom, apquellai'awec nac na ncotnec jellanei'o ma'a asuacjo la jam. Apquenmajaiwec nac nac jeluetac, jenmasmec nac na napocja jam, apqueliaqmoncasquesecjo lhnac na apquellelto apquenmajai'a jenaqtewacsec. Colhua coca aclheianwacjo ewalhoc ietawec aptaiancolha quetlhencap jam. ¹² Apiawec Engiapom Neten asquellapasqueso lhta waccajac asnactalhesquescama lhta jam, jawe njan co'o astengia'a apto la paselhnanemmap canjan metco la apselhnamemmap, wanlha coca co'o actaicama mota ewalhoc aniem'o quetlhencap, squeltawec alpasmoc cacpota angenmasquecsec aquientalhnema nac jam, ca ncanec allapasquesec waccajac astalhescama. ¹³ Colhua coca nnec alpaiescacmo engellualho'oc jenque'e aniem'o njan nenlengai'a nema alpaiesquescaiam apualho'oc quetlhencap jam, nquelpaijacjec engellualho'oc nellengo ania'a quetlhencap apquelpaiesquescaiam apualhoc Tito necsa apnema jam. ¹⁴ Asqueltennasque lhta co'o Tito nquellacjaicama co ewalhoc quelthencap aniem'o apqueliamolhma, necsa apuecja lhta Tito jam apquet'a lhta jawe ngiapac anquec apquellelto apqueliamolhma apanquec quetlhencap, ca stemacja lhta njan co'o ascanemo m'a. ¹⁵ Nquetlheianwacjec na apualhoc Tito aquieplomo apquellamelaiam quetlhencap necsa aptaicama lhta amaica'a jam, awanjec na lhta njan apquellai'o m'a, apquelleliejecjo njan. ¹⁶ Awanjec co'o acpaijecja ewalhoc, awanje na asqueliamo apqueltemacja actacmanma quetlhencap jam.