¹ Wɔ́ yẽ̀ búlǝ́ dwí gakó n'ê shí ní á cǝcǝl wǝ? È dǝ̀ á shilǝ námmǝlwǎlsɛ́ sǝ̀ ŋwɛ́nɛ́ á wun ní wẽ́ mó sǝ̀ n'ê nwɛ̀nɛ̀ ába? ² Á n'á yǎl kɔn, á gǝ́ t'á nɛ rɛ mɔ́ ce, á pú á zɛ̃̀ á jǐrh lyì-gurnǝ. Á zhe bwɛ̃̌-dǔr, á t'á nɛ tɛ̀bɛ́ á n'á yǎl mɔ́ yé, á n'á mà nyǝ̀-pǎr á m'á bwí dwã. Wɔ́ á gǝ́ t'á lwǝ̀l tɛ̀bɛ́ á n'á yǎl ǹdǝ́ Yi ni zhú mú è ce, á t'á nɛ rɛ yé. ³ Sǝ á gǝ n'á lwǝ̀l Yi ni, á zɛ̃̀ á t'á nɛ kaka, sǝ́ nyǐ wɔ́ á lwǝ̌l mó mǝ̀ bǝ mǝ̌ yé. Á n'á lwǝ̀l kɔn tɛ̀bɛ́ rǝ̀ m'a pǝ wu-nyɔ̃̀ á cìcì ni. ⁴ Á t'á zhì nà èdù yó yé. Á yǝ̀l bǝ̀ ǹ gǝ só lũ w nyǝ̀ná nɛ, wɔ́ zùùri ǹ nǝ́ ǹ jí ǹdǝ́ Yi nà? Lò mɔ̀bɔ́ ǹ nǝ́ ǹ yǎl ń yǝ̀ lũ w dɔwa, rǝ̀ ná-cí jǐrh Yi zù-bal. ⁵ Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: Yi n'ê yǎl bǝ̀ Eshirhǝ y rǝ̀ co nǝ́ wẽ́ mó dúdú cìní nǝ́ba. Á n'á bùl bǝ̀ wɔ́ nánfò? ⁶ Sǝ pɛnɛ́ y kɛ̀bɛ́ Yi n'ê pɛ nǝ́ba mɔ́ du kɔn gakó. Bǝ̀ kɛ̃ Yi zɔ̀mɛ̀ rɛ́ sɛ́bɛ́ jàà dõ wẽ́ bǝ wɔ̀: Yi bǝ cìn-byilu cìnǝ́ só yé, sǝ rǝ̀ n'ê cĩ́ bwǝl cìn-lwǝl cìnǝ́ yó. ⁷ Rǝ̀myɛ́ ce, shɛ̀nɛ́-na Yi nyí ni, s'á zhɛ̃̀ Shǝtana yá, b'è b'a dùr e vò kwã nɛ́ e yẽ̌ ába. ⁸ Bwǝlse-nǝ Yi ni, s'á yẽ̌ bǝ̀ rǝ̀myɛ b'a bwǝlse ámyɛ nɛ. Ámyɛ̌ yǝ̀-bǝlwàálɛ́ cìnǝ́ bé, sám-na á jɛ̀sɛ́, sǝ jǐrh wárhgáá. Ámyɛ̌ myìnù cìnǝ́ bé, kwɛrhɛ-na á wun ní nǝ jǐrh wárhgáá. ⁹ Ce-nǝ á wun ní zhìlì. Kúrh-nǝ. Ce-nǝ á mɔ̀n nɛ́ jǐrh yǝ́-nàná, s'á ce á wu-nyɔ̃̀ w jǐrh wu-zhìlù. ¹⁰ Lwǝl-nǝ á cìn tɛ̃́ Cinnǝ mó yé né, s'á yẽ̌ bǝ̀ ń mà n zhẽ̌ ába dɛ̃̌. ¹¹ Da-byǎ, á bǝ̀k'á zɔ̀m dwã yil námmǝlwɛ̀lɛ́ yé. Lò mɔ̀bɔ́ ń nǝ́ ń zɔ̀m ń dõ yil námmǝlwɛ̀lɛ́, ráá ń nǝ́ ń kɛ́ ń dõ bùrsi, wɔ́ Yi nyǝ́ né yil námmǝlwɛ̀lɛ́ ń nǝ́ ń zɔ̀mà. Wɔ́ nǝ̀myɛ́ bùrsi ń nǝ́ ń kɛ́. E jà ǹ gǝ nǝ́ ǹ kɛ́ Yi nyǝ́ né bùrsi, ǹ kǝ́ ǹ dǝ̀ nǝ̀ zwennǝ yé; ń jǐrh nǝ̀ bùr-kárna. ¹² Wɔ́ Yi dúdú rǝ̀ n'ê pɛ nyǝ́, rǝ j'à n'ê kɛ́ bùrsi. E jà wɔ́ rǝ̀myɛ́ dúdú rǝ̀ wɔ̌ rǝ̀ n'ê vwǎrh lò, rǝ j'à wɔ̌ rǝ̀ n'ê gwi myɛ. Sǝ wɔ́ yẽ̀ ǹmyɛ nǝ́ ǹ cĩ́ ǹ cìn ní ǹ mǝ́ ǹ nǝ́ ǹ kɛ́ ǹ dõ bùrsi? ¹³ Èlǎsɛ̃́, ámyɛ̌ byɛ̀bɛ́ á n'á wǝ̀lǝ̀: Zà ráá nǝkɔla, nǝ́ m'ǎ vò cɔ w kɔ̀bɔ́; sǝ nǝ́ b'ǎ wɛ̀rhɛ́ byin námpúm gàà, nǝ́ yè wẽ̀ nǝ́ zhízhílí, nǝ́ b'ǎ nǝ wársɛ. Cili-nǝ kɔn dɛ̀bɛ́ à la ába byilu mú: ¹⁴ Á yǝ̀l á gǝ́ la nɛ́ yál nǝkɔl dɛ̃ rɛ́ yé. Á wɔ́ ǹdǝ nǝkɔkɔ́lɛ́ myɔ̀nɔ̀ ta. Ò t'â jíjírhí yé, èlǎsɛ̃́ lǎsɛ̃́ ǹdǝ́ ò tuwǝ. ¹⁵ Á y'a mǝ̌ s'á wɔ̀: Kɔn gǝ wɔ́ Cǐnnǝ mó pùbùlǝ̀, nǝ́ b'ǎ yǝ̀ nɛ́, nǝ́ wɛ̀rhɛ́ èta, ráá èta. ¹⁶ Sǝ ámyɛ̌ t'á wǝ̀l èta yé, á zɛ̃̀ á n'á zhẽ̌ á cìn dɛ̃̌ ǹdǝ́ cìn-byilu zɔ̀mà dúdú. Cìn-dɛ̃̌-zhõ̌ mǝ̀myɛ́ dwí rí wɔ́ kɔ̀-bǝlwɛ̀lɛ́. ¹⁷ Lò mɔ̀bɔ́ ń yě cɛ̀nɛ̀ rɛ́ tɛ̀bɛ́ ń yà ń mǝ̌ sǝ n wɛ̀rhɛ́ mɔ́, n zɛ̃̀ ń yǝ̀ rɛ wɛ̀rhɛ́, wɔ́ yǝ̀-bǝlɔ̀lɔ́ ń wɛ̀rhɛ́.