¹ Da-byǎ, á bǝ̀k'á yǝ̀ nánzhǝzhɔ̌ á n'á yǎl á yǝ̀ kàrmɔ̀ byilnǝ yé. Á yě bǝ̀ nǝ́myɛ̌ byɛ̀bɛ́ nǝ́ wɔ́ kàrmɔ̀ byilnǝ bé mó, nǝ́ bùrsí b'a yǝ̀ zwini du lyì bí dwã bɛ́. ² Nǝ́ gakó n'é dwé wẽ̀ nánzhǝzhɔ̌ wẽ́. Lò mɔ̀bɔ́ ń nǝ́ ń zɔ̀m ń tá ń dwé gaga, sǝ́ nyǐ ń já ń wɔ́ wárhgáá, ń wɔ̌ ń cìn námpúm. ³ Nǝ́ gǝ co càmá eshǝrh nyú w mùnì ga sǝ zwẽ nyí, nǝ́ r'é ce sǝ̀ zhǝ̀l nǝ́ gǝ́ só mǝ̀gã̌. ⁴ Nyǐ-nǝ bǔ-bwǝlǝ né nánfwààlɛ́ myɛ. Nǝ̀ nyɛ̌ nánfwààlɛ̀, zho nánfɔ̀lɔ̀ ò n'ô zǝ nɛ ò zhǝ̀lǝ̀. Sǝ ǹdǝ́ rǝ̀myɛ́ ga, wɔ́ dɔ̌ námpɔ́lɛ́ bǝ̀ m'ê swàl nɛ, nǝ j'à vò mɔ̀bɔ́ ń nǝ́ ń dùr nè mó gǝ́ nǝ́ ń yǎl bǝ̀ nǝ̀ zhǝl mǝ̀gã̌. ⁵ Mǝ̀jòlò w myɛ wɔ́ èta. Ò wɔ́ yala nɛ́ kǝ̀kàlà námpɔ́lɛ́, o j'à wɔ̌ ò zhẽ̌ ò cìn dɛ̃̌ ǹdǝ́ wẽ̀ nánfwààlɛ̀. Nyǐ-nǝ gɔ w myɛ gǝ́ wɔ́ nɛ́. Ò gǝ wɔ̌ s'o byì ní yil myɛ, myǐn námpɔ́lɛ́ y'a ŋwɛ̀nɛ́ w mǝ jí. ⁶ Mǝ̀jòlò w wɔ́ ǹdǝ myǐn ta. Ò wɔ́ nǝ́ yala nɛ́ kǝ̀kàlà, e jà wɔ́ òmyɛ́ wẽ́ lwɛlɛ n'ê shí ní, ò lwɛlɛ rɛ́ n'ê lyɛ́ɛ nǝ́ yala nɛ́ gakó ne. Myǐn-jì myǐn mú n'ê shí ò wẽ́ mǝ̀ zhìlì nǝ́ yò, nǝ́ lul yi ní ga, kɔn m'e yí nǝ́ cu. ⁷ Numbyíní wɔ̌ è b'a ce gɔ vwàmá ǹdǝ́ kúmsi ǹdǝ́ dɔma dwí gakó, ǹdǝ́ wẽ̀ tɛ̀bɛ́ gakó rǝ̀ ŋwɛ́nɛ́ bǔ w mú tó ǹdǝ è gǝ́ n'ê yǎl nɛ́. È gaga mɔ́ n'ê ce rǝ̀ tó ǹdǝ è gǝ́ n'ê yǎl nɛ́. ⁸ Sǝ lò lò wàr mǝ̀jòlò w yé. Ò wɔ́ kɔ̀-bǝlwɛ̀lɛ́, ò t'â zhì shɛ́ɛ́ gaga yé. Ò sú ǹdǝ́ swã̀ kɛ̀bɛ́ è cɛ̀, è n'ê gwi lò. ⁹ Nǝ́ r'é zǝ w nǝ́ m'é cèrhé Cǐnnǝ nǝ́ Da mɔ́; e jà wɔ́ òmyɛ́ myɛ nǝ́ m'é bwǝl lwɛlɛ nǝ́ pɛ numbyínsí Yi wɛ̀rhɛ́ rǝ b'e nyɛrhɛ rǝ̀ cìcì mú ni. ¹⁰ Nyí rí rǝ̀myɛ́ rǝ̀dù y rǝ̀ n'ê bwǝl lwɛlɛ, e jà wɔ́ rǝ̀myɛ́ rǝ̀ n'ê bwǝl cɛ̀nɛ̀ myɛ. E jà kɔn bǝ mǝ̌ s'e yǝ̀ èta yé da-byǎ. ¹¹ Nǝ̀-bùlì èdù wɔ̌ è bùl nɛ̃̌ mɔ̀bɔ́ mǝ̀ nyɛ̀, e j'à bù nɛ̃̌ mɔ̀bɔ́ mǝ̀ nyɛ̌ cɛ̀ɛ́ myɛ? ¹² Da-byǎ, épyìlú wɔ̌ ò b'a ce shã̀? Nà wɔ́ sɛ̃́-cǒ ò wɔ̌ ò b'a ce épyìlǝ́? Èta myɛ, nǝ̀-bùlì gǝ n'ê bùl nɛ̃̌ mɔ̀bɔ́ mǝ̀ nyɛ̌ párɛ́, è wàr nɛ̃̌ mɔ̀bɔ́ mǝ̀ nyɛ̀ è la búl yé. ¹³ Da-byǎ, lò gǝ ŋwɛ́nɛ́ á wẽ́ ń nǝ́ ń bùl bǝ̀ ń lɔ́ n jà ń zhe surhǝ, sǝ n zǝ cìn-lwǝl ǹdǝ́ tùm-ècɛ̀nà n mǝ n byili ń lárma mɔ́ ǹdǝ́ ń surhǝ né. ¹⁴ Sǝ bwɛ̃̌-dǔr gǝ ŋwɛ́nɛ́ á wun ní wẽ́, á wun ní gǝ nyɛ̌ bárhɛ́, lò gakó gǝ nǝ́ ń pyà ń cìnǝ̀, s'á bǝ̀k'á zhẽ̌ á cìn dɛ̃̌ yé, s'á bǝ̀k'á zɔ̀m kɔn dɛ̀bɛ́ rǝ̀ dǝ̀ zhǝ̀n á b'á mà nyǝ̀-pǎr ǹdǝ́ zhǝ̀n rɛ́ yé. ¹⁵ Surhǝ né nǝ̀myɛ́ mɔ́ dǝ̀ dɛ̃̌ Yi sõ nǝ̀ shí ní yé. Nǝ̀ wɔ́ lũ w numbyínǝ́ bé surhǝ. Wɔ́ Shǝtana sõ nǝ̀ n'ê shí ní. ¹⁶ Bwɛ̃̌-dǔr gǝ ŋwɛ́nɛ́ mǝ̀gã̌, lò kǝ́ ń tá ń nyǐ ń dõ sõ yé, wɔ́ yààyàà tùntwǝ̃̀ǝ̃̀ dúdú ǹdǝ́ lwɛlɛ dwí gakó rǝ̀ ŋwɛ́nɛ́ gàà. ¹⁷ Sǝ lò mɔ̀bɔ́ ń zhe surhǝ nyɛ̀bɛ́ nǝ̀ shí dɛ̃̌ Yi sõ mó: nã́yéé ré, ń wɔ́ wárhgáá; rǝ̀myɛ́ kwã nɛ́, ń nǝ́ ń pyà yǝ̀-zùlǝ́; ń zhe wu-bɔ̀nɔ̀; ń bǝ yó-kùlù zhe yé; ń zhe nɔ̀nɔ̀-dǔr; ń nǝ́ ń pyà cɛ̀nɛ̀ twéé gakó; ń tá ń lwe lyì dwã nɛ yé; ń tá ń myìnì ń dwã bɛ́ yé. ¹⁸ Byɛ̀bɛ́ bǝ̀ n'ê pyà yǝ̀-zùlǝ́ mó ce yǝ̀-zùlǝ́ ŋwɛ́nɛ́ lyì bí cǝcǝl wǝ, sǝ wɔ́ cángá tùntwǝ̃̀ǝ̃̀ né bǝ̀ n'ê wɛ̀rhɛ́ mɔ́ nǝ̀ wɔ́ yǝ̀-zùlǝ́ né bǝ̀ n'ê pyà mɔ́ byǎ.