¹ Nyena a kak ko wawaran, a koanijin temejik li ŋutu momorundi tetenda na yeyeet nase anyen leŋga yesu; ² A se torji lepeŋ, a nyomoddi lepeŋ kaŋo, a wukindi lepeŋ ko pilato i konin logon a modir. ³ A yuda lo tinda lepeŋ i leŋa lo ko meedi adi kulya ti yesu aje ‘duŋoki arabat, a nye lopuggi toili, a nyokokindi koanijin temejik se ko ŋutu temejik podojin merya musala kune bot. ⁴ A kulyani adi, nan aje toronda i tinda na ŋutu logon ‘bak kulya i leŋa. A se ruggi adi, kine ‘ban kulya kaŋ. Kine gwe a kulya kunok. ⁵ Nyena a nye gubakindi podojin kune kak i kadi na ŋun, a nye iti tu a toyi mugun. ⁶ A koanijin temejik ‘dumundi podojin kune, a kulyani adi, ‘bak ko ‘buruki adi ti se ‘delakini i pirit na geleŋ ko gurut ti kadi na ŋun, kogwon se gworiesi ti rima. ⁷ A se tetendi yeyeet nase, a kune gurut gworoni yobu na kagweyanit lo lukudolo anyen lwaka nuka kata yu. ⁸ Nyena a yina yobu luŋuni a yobu na rima tojo ko lo lor. ⁹ A kiruŋ ŋo nagon nebi yeremia koju a jam kunu boŋo kokona adi, se a ‘dumunda podojin merya musala a gworiesi ti ŋuto logon kule ŋutu ti yisaraele a kenakin anyen ropani ŋuto lo mogga lepeŋ lo, ¹⁰ A se gworundi yobu na kagweyonit lo lukudolo, gwoso na sarakindi matat nan nu. ¹¹ A kirut yesu gwode ko modir i komoŋ, a modir piji lepeŋ adi, do nye logon a mor lo yudayaki lo? A yesu ruggi lepeŋ adi, do aje tukgo. ¹² Ama a na ŋokindi koanjin temejik se ko ŋutu temejik lepeŋ nu, a nye gwe ‘bak ko ruggo nene ŋo. ¹³ A pilato piji lepeŋ adi, do ‘bak ko yiŋ ŋo jore nagon koko tokorji kulya kunok arabat re? ¹⁴ Ama a nye gwe ‘bak ko ruk lepeŋ ma’di ko kulyaet geleŋ tuŋ, nyena a modir sorji sorji parik. ¹⁵ Nyena temba i diŋit na yilo rorwe, modir yeŋgiti yukukindo lodir lo ŋutu ŋuto geleŋ logon se mimindi. ¹⁶ A i nu diŋit lele lo rereka kaya logon a dena parik i konesi kayit, Karin kayit a Baraba. ¹⁷ A na momorundi ŋutu nu, a pilato piji se adi, ta mindi nan yukukindo ta lolon ŋuto, Baraba ko yesu lo luŋa a masia? ¹⁸ Kogwon nye a den’bura adi, koko a wukinda yesu kayit i konin kogwon se yiyino ko yesu. ¹⁹ A na sidani pilato i sidaet ‘daŋet na putet nu, a nakwan nayit sunukindi lepeŋ loŋe adi, ti kulya kunok gwe ’bayin ko yilo ŋuto ‘bakan na kulya. Kogwon i lo lor nan a ŋoŋga ŋo jore i rudojin i kulya ti lepeŋ. ²⁰ A koanijin temejik se ko ŋutu temejik lopukundi ŋutu adi ti se piji pilato i yukundo na Baraba a yesu lo leŋani. ²¹ A mo’dir ‘dok piji se adi, ta mindi nan yukukindo ta ŋa i kilo ŋutu murek? A se ruggi adi, yukuki yi Baraba. ²² A pilato piji se adi, a nan de kiruŋ konakindi yesu lo luŋu a masia lo nyo? A se liŋ ruggi adi, ti lepeŋ ‘bikikini i kodini na goro! ²³ Konyo? Nan toron nagon lepeŋ a kon? A kolunmbo se waŋe parik adi, ti lepeŋ ‘bikikindi i kodini na goro. ²⁴ A pilato ko meddi adi ‘bulit ‘bayin, kolumbo a woŋon ŋoine ŋoi duma, a nye ‘dumundi pioŋ, a lalaji konisi kayit ko lodir lo ŋutu i komoŋ, a kulyani adi, tin an gwe pajo i rima ti tilo ŋuto. Kune gwe a kulya kasu ko ‘borik. ²⁵ A ŋutu liŋ ruggi adi, ti rima kayit gwe kayaŋ i kuwesik ko i ŋwajik kaŋ. ²⁶ A kiruŋ Pilato yukukindi se Baraba, a nye tindi yesu i bito ko kurubatan logon a kwara, a putukindi lepeŋ i ‘bikiki i kodini na goro. ²⁷ Nyena a kamorok ti modir joŋgi yesu i modoria kata, a momorundi teŋ na kamorok liŋ i pirit na geleŋ, a’dumundi lepeŋ kiden. ²⁸ A se rukundi boŋgwat kayit kune kaŋo, a tojubbi lepeŋ ko boŋgo nator; ²⁹ A se doggi kikiwa a loguya, a sukindi ko lepeŋ i kuwe, a tindi paduŋi kayit i konin luyaten, a se rugwuŋokini ko lepeŋ i komoŋ, a jojonyani ko lepeŋ adi madaŋ pon mor lo yudayaki! ³⁰ A se yaggi kamulak ko lepeŋ ki, a’dumundi pa’duŋi lo, a’iddi lepeŋ i kuwe. ³¹ A nagon se aje jojonyani lepeŋ nu, a se rukundi boŋgo na lepeŋ kaŋo ko lepeŋ i mugun, a se tojubbi lepeŋ ko boŋgwat kayit kune, a se nyomoddi lepeŋ kaŋo i ‘bikikindo i kodini na goro. ³² A na tirini kamorok nu, a se rume ko lele ŋuto lo po kurene, Karin kayit a simona. A se ridikindi lepeŋ i ‘doggu na kodini na goro na yesu. ³³ A se ko ‘dure i pirit na luŋu Gologota (na nyonyoggu adi pirit na kululuŋ) ³⁴ A se tindi yesu binyo na ŋola ko ŋo na potor anyen mamat; ama a nye ko waŋgi se, a nye gwe’bun moju. ³⁵ A nagon se aje ‘bikikindo lepeŋ i kodini na goro nu, a se kokorakindi ‘borik boŋgwat kayit kune gubanikin guralon. ³⁶ A se sidakini kak i tiju na lepeŋ yu. ³⁷ A se tindi ŋoit i kodini na goro kayit i kuwe, nagon a wuro adi, lo a Yesu moro lo yudayaki. ³⁸ A i nu diŋit a karyakak ‘bikikini ko lepeŋ i pirit na geleŋ i kaden na goro, lele i swot lo lutaten ko lele i swot lo kadoŋe. ³⁹ A ŋutu logon ‘duŋoddu nyona kulo ‘da’daddi lepeŋ yiŋgo kuwesik kase. ⁴⁰ A kulyani adi, do logon mindi dukakinda kadi na ŋun kak a do ‘duke ‘duk i perok musala lo! Lwoki mugun ke! ⁴¹ Nyena, a koanijin temejik ko katodinok ti saresi, se ko ŋutu temejik jojonyani ko lepeŋ adi, ⁴² Lepeŋ lwoggu kule ŋutu, ama nye nyobulo lwoggu mugn. Lepeŋ a mor lo yisarele! Ti nye pondi kak; kodini na goro tiyana, a yi de yubbi lepeŋ. ⁴³ Lepeŋ yinikindo mugun ko ŋun, ti ŋun lwoki lepeŋ tiyana ko nye nyanyar lepeŋi kogwon nye a kulya adi, nan a ŋiro lo ŋun. ⁴⁴ Madi karyakak logon a’bikiki ko lepeŋ i pirit na geleŋ kulo, lele lo. ⁴⁵ Suluja i tuparan kidena kak liŋ worani a mude tojo ko saa musala na tokotyaŋ. ⁴⁶ Nyena i saa musala na tokotyaŋ a yesu woŋe ko gworo lo’bijo adi, Eli, Eli, lama sabakatani? Nagon nyonyoggu adi, ŋun lio, ŋun lio, nyo do kokolokin nan? ⁴⁷ A kule ŋutu logon gwo’dan nyona kulo ko yiŋgi lepeŋ i luŋgu tina, a se kulyani adi, lo ŋuto luŋgo Eliya. ⁴⁸ A ‘de’de lele lose lo woku, a ‘dumundi lipa, a jurutokindi i binyo naparoroŋ a sukindi; pa’duŋi, a putukindi lepeŋ anyen mamat. ⁴⁹ Ama a kule kulyani adi, moni tam on, ti yi mete ta met kode ŋona Eliya de popo i lwoggu na lepeŋ. ⁵⁰ A yesu kori woŋe parik ko gworo duma, a kodudwa nayit ‘dumajini ‘dumaji. ⁵¹ Mete, a boŋgo koret na kadi na ŋun kiyi kiya murek, suluja ki tojo ko kak. A kak gwugwuŋgi gwugwuŋgi, a leliya kikiliji kikilija. ⁵² A gulomo ŋaini ŋai, a o puo jore ti ŋutu ti ŋun lagon aje twatwa kulo tuŋiyuni toŋiyu; ⁵³ A i mukok na ŋien nayit i twan, a se lupundi kaŋo kase i gulomo, a tuloddi i koji nake a punoki i ŋutu jore. ⁵⁴ A nagon duma lo kamorok mia geleŋ se ko ŋutu lo gwon ko lepeŋ i pirit na geleŋ, logon tiju yesu kulo, ko meddi rigirigi se ko ŋo liŋ na kona kunu, a se kajene kujon parik, a kulyani adi, lo ŋuto ‘diri a ŋiro lo ŋun! ⁵⁵ A kune ŋutu jore gwe yu, gwo’dan pajo i meddu, se po Galilaya morunda ko yesu i ŋarakinda na lepeŋ. ⁵⁶ Kune kune a ko maria medelina ko maria ŋote yakobo ko yosepa, se ko ŋote ŋwajik ti Jebedayo. ⁵⁷ A nagon koloŋ gwode nyona ko’dororo nu, a lele kworinit lo ‘dwe ponda Aramataya, Karin kayit a yosepa. Nye ‘dok a ŋuto kajujumunit lo yesu. ⁵⁸ A nye iti ko Pilato yu a piyundi opu na yesu. A Pilato sarakindi adi ti opu na tikini lepeŋ. ⁵⁹ A yosepa ‘dumundi opu na, a’doggi nye ko boŋgo nake nabut, ⁶⁰ A’delakindi kayit i gulom naluduk, nagon nye a kuruun; ŋurupit; a nye gwuluŋokindi ŋurupit duma anyen muggo kutuk na gulom, a nye iti tu. ⁶¹ A maria madelena se ko nene maria gwe yu, sisida i komoŋ na gulom. ⁶² A katumolu lo kebbu lor tetenet lu, a koanijin lemejik se ko parusijin momorundi ko Pilato i komoŋ, ⁶³ A kulyani adi pon duma, yi a yiyiundo adi na gwondi yilo kamomolukanit jorun nu, lepeŋ a kulya adi, nan molu ŋiŋien i twan i perok musala. ⁶⁴ Tiki saret anyen gulom titiko go tojo lor tomusala loyit, ko’ben ŋutu kayit kajujumuk tu i kokoladdu na opu nayit a tukokindi ŋutu adi, lepeŋ aje ŋien i twan; a momoluket na ‘dutet molu gwe a naron parik lwolwoŋ na kokwe nu. ⁶⁵ A Pilato takindi se adi, tag won ko katiyuk, iti ta, titike ta titik gulom go gwoso nagon ta bubulo na. ⁶⁶ Nyena a se iti tu, a titiggi gwon, a nya’dutukindi kwiyet i ŋurupit duma, a kolokindi katiyuk i tiju.