¹ A nagon Peseto aje ’durökin kanyit i mödöria nu, a i mukök na perok musala, a nye ŋine Kaisaria a iti Yerusalema. ² A koanejin temejik se ko temejik ti Yudayaki tukökiŋdye i lepeŋ kulya kase i kulya ti Paulo, a se mo ’yi lepeŋ parik, ³ anyen parakiŋdya se i rukuŋdyö na Paulo anyen po Yerusalema, kogwon se aje yeyeju domba lepeŋ anyen tatuja lepeŋ i kiko. ⁴ A Peseto waddi adi, Paulo lu titiyu Kaisaria yu, köti nan ko mugun nio yeyeju yitö yu ’de ’de. ⁵ Nyena ti ŋutu kasu temejik moraddi ko nan anyen ko ŋilu ŋuto a koŋdya arabat a ti se tu jambi putet lose ko lepeŋ. ⁶ A Peseto iŋge si ’da ko lepeŋat yu a ko lwöŋgu perok budök kode puök, a kirut lepeŋ yitöni Kaisaria. Ko ’bure a lepeŋ si ’dakine i pirit jamet na putesi i ’duŋgö na kulya, a nye saŋi saŋu anyen Paulo jwejwe. ⁷ A nagon Paulo aje ’durökin nu, a Yudayaki lo po Yerusalema yu kulu gwo ’de gwo ’dan gömbu lepeŋ, a suluje pökiŋdyö lepeŋ kulya jore na pömöni nagon se kwöŋ ti bulö kwekiŋdya adi a gwak. ⁸ Ama a Paulo waddi adi, Nan a ko koŋdya nene ŋo naron i kulya ti saresi ti Yudayaki, kode i kulya ti Kadi na Ŋun, kode i kulya ti Kaisar. ⁹ Ama a Peseto ’deke nyara ko Yudayaki, nyena a lepeŋ pije Paulo adi, Do ’de ’dekan tu Yerusalema anyen kulya kunök ko tu lilia nyu köyö i komor? ¹⁰ A Paulo waddi adi, Nan lo gwo ’dan i komor na si ’daet nagon Kaisar ’duŋge putet nagon kulya kwe ködyö lilia kata na. Nan a ko konakiŋdya Yudayaki arabat, gwoso nagon do deden ’bura na. ¹¹ A ko ködyö nan a katoronyanit a iŋge koŋdya nene ŋo nagon jujukin tatuarikin nan, nan ti renya twan kwöŋ; ama ko ŋo na jam se i kulya kwe kune ’bayin a gwak, a lele ŋuto gwe ’bayin logon bubulö ŋutu kiŋdya nan kase i könisi. Nan pija Kaisar anyen ’duŋgö kulya kwe. ¹² a Peseto jambi ko kajujuwak kanyit kulo, a nye waddi Paulo adi, Do aje pija Kaisar anyen ’duŋgö kulya kunök, nyena a na ’but, do bubulö joŋa ko Kaisar yu. ¹³ A i mukök na kulye perok, a mor Agripa se ko Bemike ’dure Kaisaria i ’yö ’yu na Peseto. ¹⁴ a na mönuŋdye se nyu ko perok jore nu, a Peseto nyönyökökiŋdye mor kulya ti Paulo adi, Lele ŋuto kata logon Pelise köju a kölökin a rereka; ¹⁵ a na gwoŋdi nan Yerusalema nu, a koanejin temejik se ko temejik ti Yudayaki iŋge takiŋdya nan kulya kanyit ’dek nan ’duŋökiŋdyö lepeŋ putet loron. ¹⁶ Ama a nan iŋge tukökin lepeŋat adi, ŋutu ti Roma ’bak keri i ŋutu kiŋdya na lele ŋuto a kokwe nagon nye a ko nyuŋ gwo ’dan a lokomor ko ŋutu lo gwon ko kulya ko lepeŋ kulo, anyen waddu lepeŋat i kulya na joŋgi se lepeŋ i putet kune. ¹⁷ Nyena a na momoruŋdye se liŋ ni nu, a nan gwe a ko karakin, ama ko ’bure a nan si ’dakine i ’duŋgö na putesi, a nan saŋi saŋu anyen ŋilo ŋuto jwejwe. ¹⁸ A nagon ŋutu lo gwon ko putet ko nye kulo ŋine ki, a se gwe a ko tuggö kulya narok i kulya ti lepeŋ gwoso na yeyeji nan na; ¹⁹ ama lepeŋat gwon ko kunie rerenyesi ko lepeŋ i kulya ti keri lose se ko i kulya ti lele ŋuto lo twan lo, karin kanyit a Yesu logon Paulo kulya adi nyuŋ gwon jörun lo. ²⁰ A nan iŋge dyadya ’yu i ga ’yu na kine kulya, a nan pije lepeŋ ko nye nyanyar tu Yerusalema, anyen kulya kanyit tu lilia nyu. ²¹ Ama a na piyuŋdye Paulo anyen nye titiyu tojo ko Kaisar mor duma lo jurön a ’duŋgö putet lonyit nu, a nan saŋi saŋu anyen lepeŋ titiyu tojo nan a sonyoddu lepeŋ kanyit yu. ²² A Agripa kulyani ko Peseto adi, Nan ko mugun nio ködyö nyanyar yiŋga ŋilo ŋuto i jambu. A Peseto waddi adi, Do ko yiŋge lepeŋ ko ’bure. ²³ Ko ’bure a Agripa se ko Bemike poŋdi ko ’du ’duŋga duma, a luŋöni i kadi yiŋet na kulya mora ko liwajin se ko temejik ti köji, a Peseto sarakiŋdye ŋutu i joŋdya na Paulo. ²⁴ a Peseto kulyani adi, Mor Agripa se ko ŋutu liŋ lo gwon koyi ni kulo, ta a met lo ŋuto logon Yudayaki liŋ lo gwon ni se ko lo si ’da Yerusalema yu kulu a mamaŋdu nan woŋoro ki adi lepeŋ ti jukin i gwolor jörun köti. ²⁵ Ama a nan ryeji adi lepeŋ a ko koŋdya nene ŋo nagon jujukin tatuarikin lepeŋ, nyena kogwon lepeŋ ko mugun nanyit a pija mor duma lo jurön anyen ’duŋgö putet lonyit, a nan iŋge yeyeju sonyoddu lepeŋ kanyit yu. ²⁶ Ama nan ’bak kulya nagon a gwak anyen nan wurökin duma liŋ i kulya ti lepeŋ. Nyenagon nan aje jon lepeŋ kasu i komor, kegga konut i komŋo Pon mor Agripa, anyen ko kulya kanyit aje piya a nan böŋö gwe kata ko kulya nagon nan wuwur. ²⁷ Kogwon meta a tu ’böŋön köyö i soŋdu na ŋuto lo rereka ’bak kwekiŋdya kulya nagon jweri lepeŋ i putet.