¹ Nyena a se tiri Ampipoli ko Apolonia, a se ’dure Tesalonike. Kadi momoret na Yudayaki kata nyu. ² A Paulo koŋdi gwoso na yeŋ na, a nye luŋöni i omu kadi momoret, a nye jambi ko se i kulya ti Ŋun na wurö kune ko Sabatajin musala. ³ a nye Pakiŋdye se kulya na wurö kune, a tokurukiŋdye lepeŋat adi Masia agu ködyo ŋoŋoŋga anyen ŋiŋien i twan, kulya adi, Lo Yesu logon nan a tokukin ta lo a Masia. ⁴ a kulye kase iŋge yubbö, a morakiŋdye ko Paulo se ko Sila, köti a Giriki jore logon a katwöyök ti Ŋun, se ko ŋutu wate jore na kukwön iŋge löpukwe. ⁵ Ama a Yudayaki iŋge yulön, a momori ŋutu logon ’bak ’bulit i ŋutu lo wöwörötu abur, a momori a lodir a towoŋgi köji ’bukuluŋ, a iti i mörö ko mede na Yasona yöŋö galuŋdya ko Paulo se ko Sila kaŋo anyen joŋa ko ŋutu i komor. ⁶ Ama a nagon se gwe a ko ryö se nu, a lepeŋat jiŋge Yasona se ko kulye luoasirik lo yubbö kulo i komŋo na kasarak ti köji, wowoŋon adi, Kulo ŋutu aje söpuk kak ’bukuluŋ! Lepeŋat soŋinana aje po ni köti, ⁷ a Yasona wuyuddi lepeŋat kanyit mede. Lepeŋat liŋ aje ’beleŋgu saresi ti Kaisar kulya adi, Lele mor kata karin kanyit a Yesu. ⁸ A ŋutu ti köji se ko kasarak iŋge dyadya ’yu na yiŋge se kine kulya nu. ⁹ A kasarak tiŋdi Yasona se ko kulye ŋutu kulo i robba na gurut a dakesi, a kirut se kölöddi lepeŋat. ¹⁰ A ’de ’de nagon kak gwe a tukwaje nu, a luŋasirik lo yubbo kulo soŋdi Paulo se ko Sila Beroia yu, a na ’durökiŋdye se nyu nu, a lepeŋat luŋöni i kadi momoret na Yudayaki. ¹¹ A Yudayaki lo gwon nyu kulu gwe a ŋutu lo ’but lwölwöŋ ŋutu ti Tesalonike, kogwon se a wuju ŋilo kulyaet ko pusök a duma, a lepeŋat keŋdi kulya ti Ŋun na wurö kune temba i lor gaga ’yu kode ŋona kine kulya ’diri a gwak. ¹² Nyenagon a jore kase iŋge yubbö se ko ŋutu wate jore ti Giriki nagon a temejik, köti se ko ŋutu lyan jore ti Giriki. ¹³ Ama a na yiŋge Yudayaki ti Tesalonike kulo adi Paulo köti a tokujö kulyaet lo Ŋun Beroia yu nu, a lepeŋat iti nyu i topiju se ko i jujukindya na lodir i mörö ko lepeŋ. ¹⁴ ’De ’de kijek a luŋasirik lo yubbö kulo sondi Paulo anyen tu tojo ko tör na ’balaŋ, ama a ko Sila se ko Timoteo karaki Beroia. ¹⁵ a ŋutu lo nyömöddu Paulo kulo joŋgi lepeŋ tojo Atenai, a Paulo sarakindye se anyen Sila se ko Timoteo moraddu kanyit yu ’de ’de. A kirut kilo ŋutu yitöni bot. ¹⁶ A nagon Paulo nyuŋ gwon i möndu na Sila se ko Timoteo Atenai yu nu, a töili lonyit gwe pape na meddi nye köji a jore ko nyömuejin logon a punyen nu. ¹⁷ Nyenagon a lepeŋ iŋge jambu ko Yudayaki i kadijik momoresi se ko ŋutu logon ’bayin a Yudayaki logon a katwöyök ti Ŋun kilo. A lepeŋ köti iŋge jambu perok liŋ ko ŋutu logon lwöpöddu i pirit gwöriet kulo. ¹⁸ A kulye ŋutu kayeyeŋ lokoŋ logon a ti teŋ na Epikuro ko na Satoa kulo köti poki i rerenya ko lepeŋ. A kulye pipije ’borik adi, Lo karuonit lo kulya nagon ti kurwe lo ’dek jambu nyo? A kulye kulyani adi, Lepeŋ meta gwoso nye tokujö kulya ti punyen lepelok. Lepeŋat kulya sona kogwon Paulo tokujö kulya ti Yesu se ko ŋien nanyit i twan. ¹⁹ Nyena a lepeŋat joŋgi Paulo a nyömöddi lepeŋ i komor na momoret na ŋutu temejik na luŋu a Areopago, a pije adi, Böŋö yi ’dek denuŋdya ŋina todinet ludukötyo nagon do jambu kulya kanyit na. ²⁰ Kune kulya nagon yi a yiŋ do i jambu kune gwon ka ’de; yi ködyö ’de ’dekan deŋdya ko kine kulya kweja nyo. ²¹ (Ŋutu ti Atenai se ko Lwaka lo si ’da nyu kulu joŋga diŋit nase liŋ i jambu ko i yiŋga na ŋo luduko.) ²² A Paulo gwo ’de gwo ’dan i komor na momoret na luŋu a Areopago, a kulyani adi, Ta ŋutu ti Atenai, nan aje met adi ta a ŋutu logon twöju ŋunyen parik i ŋo liŋ. ²³ Kogwon na lwöŋöddi nan nu a nan iŋge met ŋo nagon ta kwakwat kune, a nan köti iŋge ryö pirit ’yuret na rubaŋgajin nagon kulya a wuröki nyin adi, Ŋun logon ŋutu ti den lo kwakwasa kata. Nyena ŋilo Ŋun logon ta kwakwat a gwe a ko den lo, nan tukökiŋdyö ta kulya kanyit. ²⁴ Ŋun lo gweja ko kak se ko ŋo liŋ logon gwon i lukata nanyit lo, lepeŋ a Matat lo ki ko kak. Lepeŋ ti si ’da i kadijik kwakwasesi nagon ŋutu lo ’duggö kune. ²⁵ Ŋutu ti parakiŋdya lepeŋ kogwon nye ti ’dekan nene ŋo, kogwon lepeŋ lo tiŋdu ŋutu liŋ gwon jörun anyen yuyukan, a tiŋdi se ŋo liŋ. ²⁶ A lepeŋ köju piŋiluŋdye gweyajin liŋ ti ŋutu i ŋuto geleŋ, a tiŋdi se i gwolor i kak ’bukuluŋ. Lepeŋ a wulökiŋdyö ŋutu diŋitan kase a tembi piritön na si ’dari se kune. ²⁷ ŋun koŋdya sona anyen ŋutu liŋ ködyö ga ’yu lepeŋ, anyen se ’ba ’bakaddu lepeŋ kode ŋona se ryöryö lepeŋ. Ama lepeŋ ti gwon pajo koyi liŋ geleŋ geleŋ. ²⁸ Kogwon kanyit i mugun yi gwon jörun, a yi wöröni wörö a yi gwe kata. Iŋkoi, kulye ŋutu kasu lo wuŋö kölisi kulo lo jambu adi, Yi köti a nyakwariat kanyit. ²⁹ Nyena kogwon yi a nyakwariat ti Ŋun, yi ti bulö yeyeju adi Ŋun gwon gwoso nyömue nagon ŋuto a teten ko dakaŋ, kode ko pödö, kode ko ŋurupit, gwoso i yeyeet na tobodwan nanyit. ³⁰ Nyenagon Ŋun a jalatara konyen ŋerot i diŋitan nagon ŋutu ti den kulya na kon se kunu, ama soŋinana nye lo sarakiŋdya ŋutu liŋ adi ti se liŋ i piritön liŋ löpuŋge töilyet; ³¹ kogwon nye aje wuluŋdyö lor logon nye mo ’duŋge kulya ti ŋutu liŋ ti kak ko torigwo. Lepeŋ aje wuluŋdyö ŋuto a ka ’duŋönit, a iŋge tokurukin ŋutu liŋ adi kine kulya a gwak, kogwon nye a toŋiju lo ŋuto i twan. ³² A na yiŋge se kulya ti ŋien i twan nu, a kulye kase kwekwenine kwekweni, ama a kulye kase kulyani adi, Yi ’dek yiŋga do i jambu na kine kulya köti. ³³ Nyena a Paulo ŋiörö kaŋo kase kata. ³⁴ Ama a kulye ŋutu ’depakiŋdye ko lepeŋ a yubbe yubbö. Lele lose a Dionusio lo Areopago, a nene gwe a Damari, se ko kulye ŋutu köti.