¹ A Paulo köti iti Derbe, ayeŋgi Lusetura. Mete, a lele kajujumunit gwe nyu, karin kanyit a Timoteo, ŋuro lo nene Yudayakityo nagon a yubbö Yesu, a monye lonyit gwe a Girikityo. ² Luŋasirik liŋ lo yubbö lo gwon Lusetura se ko Ikonio yu kulu jambu adi Timoteo a lo ’but. ³ A Paulo ’deke baraddu Timoteo, nyena a nye taweŋi lepeŋ kogwon Yudayaki liŋ lo gwon i kinu piritön kulu a den adi monye Timoteo a Girikityo. ⁴ a na wöröji ’e se i köjinö nu, a se nyönyökökiŋdye se saresi logon luyökie se ko temejik lo gwon Yerusalema yu kulu lo teteŋdya anyen lepeŋat ’de ’dep. ⁵ Nyena a momoresi ti ŋutu lo momora a kanisa kulo temba i lor iŋge golon i yupet a ŋdine ŋdi. ⁶ A lepeŋat tiri jur lo Purugia se ko lo Galatia, a Mulökötyo Loke gwe a ko rukökin lepeŋat i tokujö na kulyaet lo ŋun i jur lo Asia. ⁷ a nagon se aje ’durökin nyona ko jur lo Musia nu, a se möŋi luŋö i jur lo Bitunia, ama a Mulökötyo lo Yesu tine rukörö se. ⁸ A lepeŋat tiri jur lo Musia a yeŋgi Turoa. ⁹ A i ŋilu tukwaje a Paulo meddi kulya kanyit i töili, adi ŋuto lo Makedonia gwogwo ’dan mo ’yu nye adi, Laŋaddi Makedonia i parakiŋdya na yi. ¹⁰ A na meddi nye kine kulya nu, ’de ’de a yi teteŋdi teteŋdya anyen tu Makedonia, kogwon yi a yeyeju adi Ŋun aje luŋgu yi anyen tokukiŋdyö lepeŋat Loŋe Lo ’but. ¹¹ Nyena a yi iti ko ki ’bo suluja Turoa, a iti gwo tojo ko Samotrakia, a ko ’bure a yi iti tojo Neapoli. ¹² A yi ŋine ŋien yu a iti tojo Pilipoi. Lepeŋ a köji na kokwe na jur lo Makedonia, köti a köji nagon ’depa ko miri lo Roma gwoso a jur lose. A yi iŋge si ’da i ŋinu köji ko kulye perok. ¹³ A i lor lo Sabata, a yi lupundye kaŋo i kötumit na mariŋ na köji nyona ko kijit na kare. Yi yeyeju adi pirit kwakwaset ŋona kata nyu. A yi si ’dani kak i jambu ko wate nagon a momorakiŋdya nyu kunu. ¹⁴ A nene na kine ŋutu na yiŋga kulya na jam yi kune karin kanyit a Ludia, nagon po i köji na Tuwatira ko a katugwörönit na boŋgwat na ’bule, lepeŋ a kakwakwasanit na Ŋun. A Matat pakiŋdye töili lo Ludia i wuju na kulya nagon Paulo jajam kune. ¹⁵ A lepeŋ se ko mede nanyit liŋ iŋge batisa, a kirut lepeŋ mo ’yi yi adi, Ko ködyö ta a liŋ adi nan ’diri a kayupönit na Matat, böŋö poŋdi ta köyö mede i si ’da. A lepeŋ ri ’diaddi yi. ¹⁶ A ko gwe sona na tiri yi i pirit kwakwaset nu, a yi torumbe ko nene ’diet nagon a ’dupiet. Lepeŋ gwon ko mulökötyo logon keju gwoso ’bunit, a lepeŋ iŋge jakiŋdya komonye ’bulit a duma kogwon keju nanyit na kulya na popo. ¹⁷ A lepeŋ kepoddi yi ko Paulo, a kulyajine ki adi, Kilo ŋutu a köliŋönök ti Ŋun Katoŋanit lo ki liŋ, lepeŋat tukökiŋdyö ta kiko lwökit. ¹⁸ Lepeŋ a koŋdya sona perok jore tojo Paulo a delya parik, a löpu köni lö puök, a kulyani ko mulökötyo loron adi, Nan saŋu do i karin ti Yesu Kristo adi, poŋdi kaŋo ko ŋina ŋuro i mugun. A mulökötyo poŋdi kaŋo ko nu ŋuro i mugun i ŋinu saa gwak. ¹⁹ A nagon komonye ŋina ŋuro aje den adi yenet nase na ’bulit aje ’baka nu, a lepeŋat momorgi ko Paulo se ko Sila a jiŋge se i pirit gwöriet ko kasarak i komor i ri; ²⁰ a nagon se aje joŋga lepeŋat ko ka ’duŋök ti putesi i komor nu, a se kulyani adi, Kulo ŋutu a Yudayaki; lepeŋat yöyöŋgu köji nikaŋ. ²¹ Lepeŋat jujukiŋdya ŋutu i ’debba na keriat logon saret a ko ruk yi i koŋdya kulo, kogwon yi a ŋutu ti Roma. ²² A lodir lo ŋutu momorakiŋdye i mörö ko lepeŋat. A ka ’duŋök ti putesi sarakiŋdye adi ti boŋgwat kase kekerenyani kaŋo kase i mugunya ko ti se ’bitöni ko turya. ²³ a nagon se aje ’biddyö lepeŋat parik nu, a se gubakiŋdye lepeŋat i kadi rereket, a se sarakiŋdye katiyunit i tiju na lepeŋat go, ²⁴ A na wuji katiyunit ŋilo saret nu, a lepeŋ gubaddi se i kadi rereket na gwon lukata, a kwakakiŋdye mokosi kase go i kaden. ²⁵ A nagon gwe nyona ko tukwaje kiden nu, a Paulo se ko Sila gwe i kwakwaddu ko i yulukiŋdyö na Ŋun kölisi, a kulye ŋutu lo rereka kulo gwe i yiŋga na lepeŋat. ²⁶ ’De ’de kijek a rigirigi duma lo poki, a pipilesi ti kadi rereket böböŋdi böböŋdu. ’De ’de kijek a kötumitön liŋ ŋaji ŋaju, a toŋot lo rerekarikin ŋutu liŋ kulo lakani laka. ²⁷ A katiyunit ko purwene i doto, a nye meddi kötumitön ti kadi rereket aje ŋaju, a lepeŋ yeyeji adi ŋutu liŋ lo rereka kilo ŋona aje wökön, a lepeŋ ’dutuŋdye baŋdu lonyit kaŋo, a yönöni tatuja mugun. ²⁸ Ama a Paulo kulyajine ki ko gworo lobot adi, An do ko böŋörö mugun, kogwon yi liŋ makulo ni. ²⁹ A katiyunit luŋgi kimaŋ, a rumara i lukata na kadi, a nye gubakindye mugun kak böböŋdu ko kujönö i komor nase Paulo se ko Sila. ³⁰ a kirut lepeŋ joŋgi se kaŋo, a pije adi, Pon dumalak kwe, nan koŋdya nyo anyen nan lwölwökö? ³¹ A se waddi adi, Yubbe Matat Yesu, a do de lwököni lwökö, do se ko mede inot. ³² A lepeŋat jamakiŋdye lepeŋ se ko ŋutu liŋ ti mede nanyit kulyaet lo Matat. ³³ A i ŋinu saa gwak na tukwaje, a nye joŋgi se a lalaji ’dikasin kase kune, a lepeŋ se ko mede nanyit liŋ batisani batisa ’de ’de. ³⁴ a nye joŋgi ko Paulo se ko Sila kanyit kadi, a tiŋdi lepeŋat kinyo, a lepeŋ se ko mede nanyit liŋ iŋge lyöŋön parik kogwon se aje yubbo Ŋun. ³⁵ A nagon gwe a ko ’bure nu, a ka ’duŋök ti putesi soŋdi aseker ko saret adi, Ti kilo ŋutu koloni kölö. ³⁶ A katiyunit nyönyökökiŋdye Paulo kine kulya adi, Ka ’duŋök ti putesi a sunyuŋdyö lore adi ti ta kölöni kölö. Nyenagon poŋdi ta kaŋo ko iti ta ko töilyet lo ’but. ³⁷ Ama a Paulo kulyani ko lepeŋat adi, Kulu ŋutu a ’biddyö yi i komor na ŋutu liŋ ’bak ’duŋöki na putet, a iŋge gubakin yi i kadi rereket, yi logon a ŋutu ti Roma kulo. Nyena lepeŋat ’de ’dekan kölöddu yi a lwön le? ’Bayin kwöŋ! Ti lepeŋat ko ’börik kase poŋdi anyen joŋga yi kaŋo. ³⁸ A aseker nyönyökökiŋdye ka ’duŋök ti putesi kine kulya na jama kune, a na yiŋge ka ’duŋök adi ko Paulo se ko Sila a ŋutu ti Roma nu, a se kujönöni kujönö. ³⁹ Nyena a se iti i mo ’yu na pitönö, a joŋdi se kaŋo, a mo ’yi lepeŋat anyen wuwuddya i ŋinu köji. ⁴⁰ Nyena a ko Paulo se ko Sila poŋdi kaŋo i kadi rereket, a iti ko Ludia mede, a nagon se aje momora ko luŋasirik lo yubbo kulo nu, a se togo ’yi lepeŋat, a iti tu.