¹ Ashan kede inta ma indu uzur, inta ya zol al bi hukumu bi teriga al inta gi hukumu ma huwo nas tanin de inta bi hakimu nefsa taki. leanu inta al bi hakimu de, inta kaman bi amulu hajat de. ² Lakin nina indu hukum ta Allah huwo bi hak hasab amail ta nas al bi amulu hajat ze de. ³ Kede aiynu ya zol, inta al bi hakimu nas al bi amulu hajat del, wa inta kaman bi amulu, nefsa hajat del, hal inta bi jere min hukum ta Allah? ⁴ Wele inta bi alisu shokol ghina ta kwes ta Allah. wa subur towil al huwo bi akir hukum tou? hal inta ma arufu inu kwes ta Allah ashan bi sibu inta bi tuub? ⁵ Lakin ashan ras gowi taki wa geliba taki al ma deir tuub inta gi limu le nefsa taki zalan fi yom ta zalan de fi yom al Allah bi zahir fogo hukum tou al adil. ⁶ Huwo bi hukum kulu wahid hasab amail tou. ⁷ Lakin le nas al kan indu subur fi amail tomon al kwes, umon bi ligo sukur, mejid wa karama wa bi genifi al haya al abadiya. ⁸ Lakin le nas al bi amulu le nefsa tomon, wa ma bi ihtaramu al hak wa lakin bi ihtaramu katiya zalan ta Allah al shedid bi ja. ⁹ Allah bi jibu taab wa kawaris le kulu Roho ta insan al amulu katiya le Yahudi awel wa kaman le Yonani. ¹⁰ Lakin mejid, wa karama wa salam bi kun le kulu zol al amulu kwes. Le Yahudi awel wa kaman le Yonani, ¹¹ Ashan Allah ma gi gesimu au fadilu. ¹² Wa ze ma nas kutar amulu katiya bidun sheriya, kaman bi hakimu umon bidun sheriya. ¹³ Ashan ma bes nas al bi asuma sheriya umon yau kwesin gidam Allah, lakin nas al bi amulu bi sheriya umon yau kwesin. ¹⁴ Ashan le umam al umon ma indu sheriya, umon bi amulu hajat ta sheriya bi tebiya umon sheriya le nufus tomon, hata kan umon ma indu sheriya. ¹⁵ Wa kede, umon bi wori inu al amail al sheriya bi talabu de, moktub fi gulub tomon, wa kaman demir tomon bi wori le umon, wa afkar tomon bi kun bi ishteki au bi defa umon ma nefsa tomon. ¹⁶ Wa kaman le Allah, al inu bi hasil fi zaman al Allah bi hakimu ashrar ta kulu nas, hasab injil tai, fi Yesua al Mesih. ¹⁷ Lakin inta gal inu inta Yahudi wa bi teki fi sheriya, wa gi dalama Allah. ¹⁸ Wa arufu irada towo wa arufu hajat al kwes, ashan inta alimu min sheriya. ¹⁹ Wa iza kan inta arufu gal inta kaiid le amiyan wa nur le nas al fi duluma. ²⁰ Wa bi sahu nas al belidiin, wa ustazle iyal sukerin, wa inta indu sura ta ilim wa al hak fi sheriya. Biga kef de bi ashir ma teriga al inta bi ish ma huwo. ²¹ Inta al bi alimu nas tanin, wa kef inta ma bi agder alimu nefsa taki? Inta al bi beshiru did serega, hal inta gi seregu? ²² Inta al bi kelim inu kede zol ma amulu zina, hal inta bi amulu zina? Inta al bi akrahu asnam, hal inta serigu haikal? ²³ Inta al dala bi sheriya, hal inta amulu fadiya le Allahbi kasuru sheriya? ²⁴ Ashan isim ta Allah shetimu fi wasat ta umam, ashan inta, bes ze ma kan katibu. ²⁵ Ashan khitan bi kun indu faida iza kan inta ihterimu sheriya, lakin iza kan inta kasuru sheriya, khitan de bikun mafi biga. ²⁶ Iza kan zol al ma teiru hafisu hajat ta sheriya, hal ma bi hasibu huwo biga muteher? ²⁷ Hal zol al ma teiru de ma bi hukumu inta iza kan huwo gi hafisu sheriya? de ashan inta arufu sheriya al moktub wa khitan, wa lisa inta kasuru ganun! ²⁸ Ashan Yahudi al ta jisim de ma Yahudi, wa khitan al ta jisim wa fi laham de ma khitan. ²⁹ Lakin Yahudi al be juwa wa khitan al ta geliba, al huwo ta Roho, ma al fi kita, al sukuran tou ma bi ja min nas, lakin min Allah.