¹ Hasa baad de, zaman al hukum ta Artaxerxes melik ta Persia, Azra ja fok min Babilon. Judud ta Azra umon Seraiah, Azariah, Hilkiah, ² Shallum, Zadok, Ahitub, ³ Amariah, Azariah, Meraioth, ⁴ Zerahiah, Uzzi, Bukki, ⁵ Abishua, Phinehas, Eleazar, al kan weled ta Haron reis kahana. ⁶ Azra ja fok min Babilonia wa huwo kan khabir katib fi al ganun ta Musa al Yahwa, al Allah ta Israel, kan wodi. Al melik wodi huwo ai haja huwo asalu talama al ida ta Yahwa kan ma huwo. ⁷ Juzu ta al ajial ta Israel wa al kahana, Lawien, muranimin haikal, hurasbab, wa delin wozifu le kidma fi al haikal kaman masa fok le Urselim fi al saba sena ta melik Artaxerxes. ⁸ Huwo wosulu fi Urselim fi al kamsa sahar ta al nefsu sena. ⁹ Huwo sibu Babilonia fi al awel yom ta al awel sahar. Huwo kan fi awel yom ta al sahar kamsa al huwo wosulu fi Urselim, hata kan ida al kwes ta Allah kan ma huwo. ¹⁰ Azra kan asisu gelba tou le dirasa, silu bara, wa derisu al faraid wa kararat ta al ganun ta Yahwa. ¹¹ De kan al karar al melik Artaxerxes wodi le Ezra al kahin wa kutab ta wasayat ta Yahwa wa farait le Israel: ¹² ''Melik ta muluk Artaxerxes, le al kahin Ezra, kutab ta al ganun ta Allah ta sama: ¹³ Ana bi amiru gali ai wahid min Israel fi mamlaka tai kaman ma kahana tomon wa lawien al deru ruwa le Urselim, bi ruwa ma inta. ¹⁴ Ana, al melik, wa saba mustusarin tai, rasulu intum kulu bara le jamau malumat be kusus Yahuzah wa Urselim al ahasab le ganun ta Allah, al fi iden takum. ¹⁵ Kede intum jibu al fida wa dahab al umon kalas gedimu majani le al Allah ta Israel, huwo al yau bi geni fi Urselim. ¹⁶ Majani wodi kulu al fida wa dahab al kulu ta Babilonia kan wodi kaman ma sunu yau majani gedimu be al nas wa al kahana le bet ta Allah fi Urselim. ¹⁷ Wa kida istakdim gurush de ashan isteri tor, dinan wa korufan, wa dura wa tekdimat mosurub. Gedim umon fogo al mazba al yau fi al bet ta Allah takum fi Urselim. ¹⁸ Amulu kaman ma al fida tanin wa dahab ai sunu al yau kwes le intum wa akwana takum, al Allah takum bi rudu. ¹⁹ Kutu al hajat al kan wodi majani le intum gidam huwo le kidma ta al bet ta Allah takum fi Urselim. ²⁰ Ai haja tani al yau deiru le al bet ta Allah takum al intum talabu, silu taman tou min kazina tai. ²¹ Ana, melik Artaxerxes, amulu karar le kulu al umana fi al Wulayat Beyit al Bahar, gali ai haja al Ezra asalu min intum kede wodi be kamil, ²² lakadi mia gramat ta fida, mia sawal ta dura, miya jaradil ta mosrubat, mia safiyat ta zet, kaman mileh bedun hudud. ²³ Ai haja al ja min al karar ta Allah ta sama, amulu huwo ma tekris le bet tou. Leanu le biga zalat tou bi ja fogo al momlaka al tai wa awulad tai? ²⁴ Nina bi wori le intum beinu intum kede ma asuru ai daraib fogo ai min al kahana, lawien, fananin, hurasbab, au fogo al nas bi amulu al kidma ta al haikal wa kudam ta al bet ta Allah de. ²⁵ Ezra, ma al hikma al Allah kan wodi le inta , inta lazim iktar guda wa salatin le hukumu kulu al nas fi al Wulayat Beid min Bahar, wa le kadimu kulu al aruf al gawanin ta Allah takum. ²⁶ Agibu ai wahid al ma bi tii ganun ta Allah kamil au ganun al melik, kan be mutu, turuju, karabu ta hajat tomon, au sijin. ²⁷ Sabihu Yahwa, Allah ta judud tanina, al kutu kulu de fi juwa gelba ta al melik le temjid al bet ta Yahwa fi Urselim, ²⁸ wa al jibu tifagia ta amana le ana gidam al melik, mustusarin tou, wa kulu muwazifin tou aguwia. Ana kalas biga gowi be al ida ta Yahwa Allah tai, wa Ana limu kidat min Israel le ruwa ma ana.