¹ Todule hilima isia anyar esio isia wati to hekumok iko te ilia illo owuon to hide, hotobiaŋa omiasa to hosie. ² Ilimak isia hotobiaŋa ero no orru to lobo tuŋani, isiara hebusak rija, anyar esio illak herara higigilita innohosie anyar etuhutek nyalami to hiyyo daŋ. ³ nyo lenyai iyyohoi hewoun iko higigilo to wati inno hoi ejo hidofe emiasa. Ejufuta ifa iyyohoi to hikoi inno oru ojo hidofe esio iyyohoi hatara apiti to hirro inno lowuon hame hame ojo etumono iyyohoi. Emanya ifa iyyohoi to run iko ta hayini. Ebwot ifa iyyohoi ejo hidofe eliwari wati innohoi. ⁴ Ati ifa leba nyalami no Hollum hetilahini lohoi ojo mune nohonyie olieu to tuŋani. ⁵ Etilwahu inyia iyyohoi to hillilla no hesini ŋejuk iko hitiŋejuk no Oyiri lolibo, obe ara to igiem inna egiem iyyohoi te ibisiti, ati to hamehini nohonyie. ⁶ Ejuhok Hollum Oyiri lo Olibo te iyyohoi hetilahani lohoi Yesu Kristo. ⁷ Egiem inyia nia anyar eyyani tohoi bisan to hamehini nohonyie, hijo anyar era iyyohoi harutak to huruk no osio fur. ⁸ Ara hirorita hunaŋ dede. Awak nayya iyye herara to hiyyen hijo hiro hunna, hijo anyar ille eruk to Hollum ehuma hirro inno olibo to hosiere ho hiyyo. Olibo hirro hunna ojio hidofe obis to hiyyo bidaŋ. ⁹ Ati ibusak hitihedieŋita iko hiro no hilahajik, rija iko iŋalafiti to hiram no hifahi. Obe hirro inia osiru ojio hidofe obe eyyani libe. ¹⁰ Ibwara tuŋani la awak eyyani to hiji hatai bwanya, ta halu ho hisor nahatai inyia, ¹¹ itiyyen hijo ebo inyia hirro inno olibo, atta inyia adule hiyya atta hidofe attohe wan nohonyie. ¹² Ifa lefahak naya Artemos kuya Tychiko to hoi, oruhuni atta iyye awoŋ ta hanaŋ to Nikopolis nafa ajori nayya hijo awu iso nayya wana dia ta hameyu. ¹³ To ruhuni atta iyye efahak Senas, ille oyyen hifahita, ojo Apollo, inna obe nobo sihin olitari isia. ¹⁴ Isiara hiyyo innohoi daŋ heyiyenu higiama hirro inno olibo inno oremik hiluak iwahiti inno hiyyo ojo hidofe hotobiaŋa isia ettole ania obe egiama innak hirro. ¹⁵ Efonya hullo daŋ owuon ikanaŋ itai. Ifonyak ilia illo omuno iyyohoi to huruk. Isiara hamehini daŋ hotowuana he itai.