1
Paulo, hegiamani lo Hollum ojo hidofe ara efahati lo Yesu Kristo, to huruk no hiyyo illo onyimu Hollum iko to ofioroho inno obis ojo hidofe erri iko hirro inno Hollum,
2
to huruk ta manya no wuaran inna osio fur no Hullum, ille obe oteler, nafa otiorohini man beren.
3
Ati to holoŋ no obis, etuhutek inyia hirorita innohonyie to hiram inna esio inyia ta hanaŋ hesiarari. Ne egiem ifa nayya inna to helimak no Hollum hetilahani lohoi.
4
To Tito, hiito ille dede to hiruk nohoi. Hamehini iko himwara tara Hollum Monye, iko Yesu Kristo hetilahani lohoi.
5
Nyo to higigilo nia edek ifa nayya iyye to Krito, hijo anyar mahati etiara iyye hiro inia innafa obe wati esahahini, ejo hidofe eniafak ilia hittaha to doŋiok iyya elimak nayya iyye.
6
Hotobiaŋa ettok owuon iko nobo hipali, oliawa lo owuon iko hiito noŋorwo nobotie, iko durre hullo ara heruhok hotobiaŋa ara hetiharak kuya hidofe hamiasak.
7
Olibo te ettok le ikelesia la awak inyia hira heniefitani la haji no Hollum, hotobiaŋa nobo hipali owuon to honyie, hotobiaŋa hidofe inyia ara heyyoritani. Hotobiaŋa hidofe inyia ara hejoriani, hotobiaŋa ara harumani lo balu, hotobiaŋa ara hetiŋalafani, hotobiaŋa hidofe ara tuŋani laŋaru.
8
Ati hatara iso atuŋani le emorot, hatara amote no hiro inno anyar. Hatara hidofe lobo ile omijak higigilo, hotobisa, atuŋani lo owuon ho baŋ to Hollum, ojo hidofe tuŋani le eniefita wan nohonyie.
9
Isiara inyia heniafa hiram no obis na anyar nafa eyiyenu inyia, anyar esiŋ inyia illak to hitiyenita inno olibo anyar etibisak hiyyo ille ebo hiram nohonyie.
10
Nyo emonya hiyyo hullo ara hamiasak, emiata ilia hullo oŋot wati. Obe hirorita inno hosie oluak. Ara isia henyiabak ojo hidofe eyari hiyyo tokoi inno obe obis.
11
Awak luŋa hitiwet isia. Nyo etiyana isia hirro hunna awak isia hijo anyar eyyani to hosie irri hunna oremik isia hitattur woyojin.
12
Lobo tara hosie, olefere lo hiyyo, ojo, "Ara hiyyo illo Kreto telerok, orru ojo hidofe oyeyer iyya ciaŋi, hiyyo hullo halanak.''
13
Ara hirori nia dede, tonia itibisak isia nanyar hotowuana mahati iko hiruk no olibo.
14
Baŋa enyiak hitira obiliwari inno hiyyo illo Yudei iko to hitimiesita inno hiyyo hullo oyitok horuoŋitek to hirro hunna obis.
15
To ilia hulo ara halibok, isiara hirro hotolibe daŋ. Ati to ilia hullo ara hamurak ojo hidofe obe ara heruhok, obe oremik nobo sihin to hosie no olibo. Nyo ebwot higigilita iko ofioroho innohosie.
16
Elima isia hiyyo hijo eyyen isie Hollum, ati orisa isia inyia to higiemita te innohosie. Ara isia hebwatak ojo hidofe ara hamiasak.
Obe isia osiru to nobo igem no olibo.