1
Ifa ojo Yesu esahak hiro inafa awak inya elimak hiyo, ata inya ajiŋak a Kapernauma.
2
Owuon ifa lobo etok lo oseŋer lo Roma ho pit lohonye lo lomuno inya bi no. Ati oŋuai ifa pit lia man le emimohita la awak ye.
3
Ifa ojo etok lia etiru sayye ino Yesu, ata inya efahak maruak ilo Yudei adia to Yesu, anyar lefi inya ha awoŋ etiluahu pit lohonye to ye.
4
Ifa ejo isia afanu aŋati ho Yesu, ata isia tanna Yesu hijo, "Osiru tohoi haluahari etok lia,
5
nyo omuno inya doŋe nohoi bi no, ata hidofe aduhok te iyohoi sinagog."
6
Ata Yesu eno ikosie a hosiere. Ati ifa eliaha inya to oger na haŋ inya, ata etok efahak motiarak hotojo to Yesu, "Habu, baŋa etigiem wan nohoi jia. Nyo obe naŋ asiru hijo anyar ejiŋak iye a haji hanaŋ.
7
Obe hidofe osiru ta hanaŋ hawoŋ tohoi to wan hanaŋ, ati irara to hutuk to nohoi hijo ata inya libe, ojo pit lalaŋ ata libe.
8
Ara naŋ tuŋani la awuon ta fau ho golon, ojo hidofe oseŋer ilalaŋ owon aŋolon hanaŋ. Ajo naŋ hijo to lobo, 'Ino', ata inya eno, ajo to lobo, 'Woŋ', ata inya awoŋ, ajo naŋ to pit, 'Igiama ina', ata inya higiem."
9
Ifa etiru Yesu hiro inia, ata inya hililiha to honye, ata fiala te iluluŋ nafa ejufuta inya ata hijo, "Ajo naŋ ta hatai, holobe naya arrumu lobo heruhoni lo obolo hiruk iya ile ta fau he Israile."
10
Ata Ilafa efahak etok ha sayye acahari a haŋ ata arumu pit lia olibe.
11
Ta halu ata Yesu eno abore gala nafa lara Nain, ojo hejufutak ilohonye ata efie iko inya ojo iluluŋ no hiyo.
12
Ifa eliaha inya iko ikat no bore gala, ata inya hiboŋ ho hiyo akafari hayoni, ara ifa hayoni lia hito lobotie to hotonye honye (na lara ihidak) afanu iko iluluŋ no hiyo to hotwai bore gala.
13
Ifa egunyu Yesu ihidak nia, ata inya amehini to tuŋani nia ata hijo to honye, "Baŋa oyoo".
14
Ata inya botik ata hitan ikafit, ata hiyo Ilafa akafita ibala weta. Ojo inya Ata hijo, "Ila, ajo naŋ tohoi, tette."
15
Ata hayoni lia diote a hide ata hiro. Ata Yesu hisio inya to hotonye.
16
Ata baŋi hifut to hiyo daŋ. Odule ifa isia hitihabuo Hollum, hijo, "Ebur hekilani etok to hiji hohoi." Ata hidofe isia hijo, " awoŋ Hollum oriŋari hiyo ilohonye."
17
Ata sayye ino Yesu esarik afau ho Yudea he masikinafaaŋati daŋ.
18
Ifa ejo hejufutak ilo Yoani elimak inya hiro inia daŋ. Ata Yoani hiloloŋ hejufutak ilohonye ohorik.
19
Ata efahak isia adia ta Habu hotojo, "hara iye lafa ojo otu iso, kuya annyar etila iyohoi lobo tuŋani hame?"
20
Ifa ejo isia afanu hiba aŋati ho Yesu, ata isia hijo, "Yoani Batista efahu iyohoi tohoi hijo, 'hera iye lafa ojo hiyo otu iso, anyar etila iyohoi lobo tuŋani hamai?'"
21
To holoŋ nya etilib ifa Yesu hiyo ino oŋwai ho iŋweti ojo idiehiti iko tara miniaŋa, ata inya hisio hiyo haŋodok ino oŋodo hotoriŋe.
22
Ata Yesu hitiraŋ isia hijo, "Lefie itai hekoi nahatai, ifeti ilimak Yoani hiro in inia etiru itai iko ino egunyu itai. Oriŋe haŋodok, oloton haŋurak, olibe hiyo ilo oŋwai ha talulu, etira hatuhok, owuaran hayok, elimahini sayye ino olibo to hiyo Ilafa awak luaha.
23
Tuŋani lo obe etiwet hiruk no honye ta hanaŋ to higiemita inanaŋ orum iso inya jaha."
24
Ifa efie hejufutak ilo Yoani, ata Yesu hitiara hiro to iluluŋ hiro ino Yoani hijo, "Efuo ifa itai oriŋari nyo ecala ho waha? Oyami nia etadiŋo hujiti?
25
Ati efuo ifa itai oriŋari nyo? Tuŋani lia ecefita boŋojin ina olibo? Owolo, itai hiyo ile ecofo boŋojin ino olibo, amanya to hitidara amanya to lobie na habu.
26
Ati efuo ifa itai oriŋari nyo? Hekilani? Ee, ajo naŋ ta hatai, agalik ati hekilani.
27
Inya ati lia lafa egioro hijo, 'Itiwolo efahak naŋ efahati lalaŋ a hosiere hatai, lo otu iso etibisak hekoi nahatai a hosiere hatai.'
28
Ajo naŋ ta hatai tara ilia esini to hiji ho ŋoruo, obe lobo agalik Yoani, ati tuŋani asai to lobie ho Hollum lara etok tara honye."
29
(Ifa etiru hiyo hiro inia, iko hiyo heduduhak ho musuru, hijo obis Hollum, ara isia Ilafa oruma batisimo tara Yoani.
30
Ati ebo ifa Farisei he hejufutak ho hifahita ilo Yudei, obe ifa lorumu batisimo no Yoani, ebo isia ofioroho ino Hollum to wati hosie.
31
Ata Yesu hijo, "Hetirijik iso naŋ hiyo ino hilahaji ina ho nyo?
32
Ociala isia ho nyo? Ociala isia iya dure ile errumita to etinyaŋari, etole ata hililoŋo wati ino hosie hijo, ehuta iyohoi hatar ta hatai obe itai ecia. Edol fure no twari obe iyohoi itai eyio.'
33
Nyo obe ifa Yoani Batista otu adahari imune hidofe obe otu amata ri fino, ati ejo itai, 'Owuon inya ho miniaŋa.'
34
Otu onyi tuŋani daha ojo hidofe amata, ejo itai hijo, 'Itiwolo, aŋaru he harumani lia, motte heduduhak ho musuru he heyyak!'
35
Ati oliew ofioroho to dure ilohonye daŋ."
36
Eliloŋo ifa lobo lo Farisei Yesu anyar lotu daha iko inya ŋiria. Ifa ajiŋak Yesu a haji ha Farisei, ata inya ahunyai to terefeja Atadaha.
37
Ati owon nobo hito noŋoruo to bore gala nya na lara heyyani. Ifa etiru tuŋani nia hijo owon Yesu ta haji ha Farisei to terefeja, ata inya eyyani riaa ta jak no logol hiinyai nohonye no.
38
Ata rigoŋo to hosiere hejek ino Yesu ojo hidofe oyio bi no. Ata hifufus hejek ino Yesu to hidenya honye, ata inya hipot hejek ino Yesu to hofir, Ata hidofe hijujur hejek ata eyalak hejek ino Yesu to hiyali nia.
39
Ata Farisei lafa elliloŋu Yesu a haŋ honye egonyu hiro inia Ata inya higigilo to wan nohonye hijo, "Lara ida tuŋani ile hekilani, noyen ida inya hijo nari hito noŋoruo nia letitiro inya nyo ara inya aheyyani."
40
Ata Yesu hitiraŋ inya hijo, "Simone, awuon naŋ he inak hiro ina awak naya elimak tohoi," ata inya hijo, "Ilimak hoi Hetiyanani!"
41
Ata Yesu hijo, "owuon ifa ohorosi ilak ohorik ilo lobo tuŋani. Owon lobotie ha arobia hisihai miyet, Ojo lobo ha arobiya tomwana miyet.
42
Ati obe hiyo liya owon ha arobiyaha ino odumari, ata monye horosi ebusak horosi nia daŋ ararik. Iyania, to hiji hosie, lari tara hosie iso lomuno inya bi no?"
43
Ata Simone hitiraŋ inya hijo, "Agil naŋ lafa ebusak hiyo ino emonya." Ata Yesu hijo to honye, "Iten iye na anyar."
44
Ata Yesu fiala to hito noŋuruo inya ata hijo to Simone, "Towolo hito noŋoruo ina, ajiŋak naŋ ahaji hoi, obe iye esio naya hifioŋ hileta ino hejek, ati elila inya hejek inanaŋ to hidenya ino honye ata hidofe hifufus to hofir ino honye.
45
To otuni hanaŋ ahaji hoi, obe iye ejur naya, ati odulei tuŋani nia hijujura hejek inanaŋ.
46
Obe iye eyalak hoo nanaŋ to hiyali, ati tuŋani ina eyol inya hejek inanaŋ to hiyali to no loŋwu girgir.
47
To hiro inia, ajo naŋ to hoi hijo hiyata ino tuŋani ina inafa emonya, ebusahini ata inya wuana ho mune bi no. Ati to tuŋani ne ebusahini inohonye kai, odicio iso mune nohonye."
48
Ata inya hijo to tuŋani nia, "Ebusahini hiyata inohoi."
49
Ata hiyo Ilafa owon to terefeja hiŋuŋunuta to wati hijo, "ŋai lia oremik ahek hiyata?"
50
Ata Yesu hijo to tuŋani nia, "Etilahu hiruk nohoi iye. Ino bolioŋ."