¹ Iya nafa etiarari Yesu ellutari to doŋiok ino bore gala he missihi, etito ojo etiyana sayye ino olibo ino Obie no Hollum iko hejufutak ilo honye hullo tomon harik efie he inya. ² Owuon ifa ŋorwo inakinafaefuhai inya miniaŋa tara hosie he iŋweiti. Ara ifa nobo Mariai nara Madalina nafa efuhai hiyo miniaŋa hatarik tara honye ade. ³ Ojo Juana, oŋorwo Kusa eittok lafa orriŋa habwore ne Erode, ojo Susanna, ho ŋorwo arria, inafaesio to hosie ibariti ino hosie. ⁴ Iyania, ifa leba iluluŋ no hiyo da mai nobotie, ho hiyo inafa afanu to honye ta massik ino daŋ. Ero inya to hosie hitigiria. ⁵ "Ohu ifa lobo hayani ayari hinyiomo. Ifa layek inya hinyiomo, ohuyek ifa inak hinyiomo to hekoi, ojo hiyo ata hirie isia, ojo cieŋ ino hide ata esohu ahuru isia. ⁶ Ohuyek ifa inak hinyiomo to morwari, ifa obolo isie ojo holoŋ ata attohe nyo obe ifa mai nohosie elik. ⁷ Arasa hinyiomo inak ahuyik to hiji ho hukwa, ata hukwa esuru daŋ ho ŋama ojo miyaŋ nya ata attohe isia. ⁸ Ati ohuyek ifa hinyiomo ilamuk to huron ilo olibo ata eŋarak ŋama hisihai nobotie nala galik". Ifa esahak Yesu hiro hiro huna, ata etisidok hiram nohonye to hosie hijo, "Itira, lowuon intai ho yohe ino etira, isiara hetiru." ⁹ Niya ata hejufutak ilohonye hifi inya hijo hetuhutek hitigiri inia nyo. ¹⁰ Ata Yesu hitiraŋ to hosie hijo, "Ewuon itai ho ofioroho no hiyyen hiro ino Obie no Hollum, ati etiyana iso hiyo iluluŋ to hitigirita, 'nyo oriŋa isia ojo isia obe oremik egonyu, ojo to riŋa obe oremik hiyen.' ¹¹ Iyania, ojo hitigirita huna hijo. Ara hinyiomoti Hiram no Hollum. ¹² Ara hinyiomo hullo ohuyik to hekoi isia hiyo hullo etiru Hiram no Hollum, ati kwak ata Sitan awoŋ akwarari ade Hiram no Hollum ta tajia hosie, hijo hotobiaŋa isia eruk ata hitilohini. ¹³ Ojo ilia ohuyik to morwari ara hiyo ilo, etiru hiram, efotu hiram to mune, ojo inak hade obe tara hosie; eruk isia do kai, ojo lara ta far no cama ojo isia ata ahuye ade. ¹⁴ Ojo hinyiomo ilia ohuyik to hiji ho hukwa isia hiyo ile etiru Hiram no Hollum, ati lefie isia to hekoi tonohosie, ojo iwahiti, ibariti ho imuniti ino manya nia ta fau ata higor isia man obiaŋari isia oremik eŋarak inak haŋer ino ogol. ¹⁵ Ojo hinyiomo ilia ohuyik to huron ina olibo ara hiyo hullo owon ho tajia ino obis ho ino olibo, etiru Hiram, ata hinief tid no oremik eyani dihan. ¹⁶ Iyania obe lobo oremik ediek hima ata emuhok to moti, kuya ata erutok aŋolon ho ŋeref. Ati ehumak iso inya to hide filili hijo anyar ilo ojiŋu ahotwai egonyu calai. ¹⁷ Obe iso inak hiro eŋofohini obe oremik aleu, kuya hidofe ne emuho, no lobe iso oremik alew ata wuana te icala. ¹⁸ Ihuma hitira nalanyar, nyo tuŋani loyita, ofonihini iso ariai, ojo tuŋani lo lobe oyita, odumuni iso tara honye daŋ ho inya eyik inya hijo ayita inya." ¹⁹ Ata hotonye iko ilasira Yesu afanu to honye, ati obe ifa isia onyiha to honye nyo emonya ifa hiyo. ²⁰ Elimak ifa lobo tuŋani inya hijo "Oweta hotonyohoi he ilasira hoi ta bali, awak hiwolo iye." ²¹ Ati ojo Yesu ata hitiriŋak to hosie hijo, "Ara hotonye hanaŋ ho ilasira hanaŋ hiyo ilo etira Hiram no Hollum, ata egiamari." ²² Owuon ifa to holoŋitek niya ta nafa ohuye Yesu iko hejufutak ilohonye ajiŋahini to nobo togoli, ata hijo to hosie, "Efie do oko kal ho hari tololo." ata isia ebusari mai nya. ²³ Atti nafa ayirok isia togoli ahotwai hari, ata Yesu ajiotori, ojo nobo oyami na hari nologol ata awoŋ to hosie etiara hifioŋ ebulari ahotwai ho togoli nia, owuana ifa isia to run. ²⁴ Niya afanu hejufutak ilo Yesu to honye ata hiticieŋ inya ahide, hijo "etok, etok, efie iyohoi ye!" Odioto inya ata hitiwet oyami ho hifoliaha no hifioŋ man owetari. ²⁵ Ata inya hijo to hosie, "Tahu hiruk nahatai?" Ta baŋi nohosie ata isia hililiha bi no ero to wati inohosie, "ŋai ileŋ, lo oriemik hitiwet oyami ho hifioŋ, ata isia daŋ hiruk inya?" ²⁶ Ifa leba isia ta fau ho Gerasenes nafa to holoroŋ na Galilea. ²⁷ Ifa lojo Yesu aliew abali, eboŋ ifa inya ho lobo tuŋani lo doŋe nya. Owon ifa tuŋani lia ho miniaŋa. Holobe ifa inya eciefok boŋojin man beren, obe hidofe amanya ta haŋ, ati amanya ifa inya te ilumioho. ²⁸ Ifa ewolo inya Yesu, oyyo inya bi no ata ahuyik wan ta fau to hosiere honye. eyorita ata hijo, "Awuon naŋ nyo ko hoi, Yesu, onyi Hollum le Hittok, ata na naŋ iye, baŋa etigiem naya, ²⁹ "Efuhuta ifa Yesu oyiri ne ibot hebusak tuŋani lia, nyo eniefita ifa inya hinyahita aria. Kuya efit da hido inya to ririk ho bileta, eriria ida hido hiyo inya, arasa ŋafutori ojo miniaŋa ata eyari ahotwai tim. ³⁰ Nia ata Yesu hifi inya, "ŋai fure nohoi?" Ojo inya ata hitiraŋ, "iluluŋ no meniaŋa," nyo ajiŋak ifa miniaŋa to honye arria. ³¹ Arasa ifa miniaŋa ŋadule tana Yesu hijo hotobiaŋa efuhak isia a hotwaiiwudo. ³² Owuon ifa inak bata ha ino etidaha to doŋe. Niya ata miniaŋa niya tana Yesu hefuhak isia hijo ewak isi ta bata ha niya. Ata Yesu aŋata kisia heifie. ³³ Afanu miniaŋa tara tuŋani ata ajiŋak ta bataha, ojo bataha ta mai ata efie a doŋe ata ebirok wati inohosie ta hari na hittok ata isia adiori. ³⁴ Ifa egonyu hiyo Ilafa eribita bata ha hiroinafaowon, enyior isia ofwo elimak to hiyo to bore gala he to ino owon to hotwaihaŋ. ³⁵ Afanu hiyo Ilafa etiru oriŋari hiroinafaedoŋ, ata afanu to Yesu oruma tuŋani lafa ebusak miniaŋa. Eciofok boŋojin ojo hoo owon no lobis, le letole to hejek ino Yesu, ata isia baŋi. ³⁶ Ata hiyo Ilafa egonyu hiro inafa owon efie elimak ilamuk hijo olibe tuŋani lafa ottoŋita miniaŋa. ³⁷ Awahan hiyo ilo Gerasenes ho onyihari hosie hifi Yesu he'no tara hosie. Abaŋi ifa isia ata inya ajiŋak to togoli, ata isia aciahari. ³⁸ Ata tuŋani lafa ebusak miniaŋa tana to Yesu hijo "awak naŋ eno iko hoi." Ojo Yesu ata efahak inya hijo, ³⁹ "Acahari ahaŋ hoi, ihiena hiro daŋ ino olibo ino egiem Hollum to hoi.'' Eno tuŋani lia ahhei nohonye, ohu hiro to bore gala hiro daŋ arria ino egiem Hollum to honye. ⁴⁰ Ifa acohini Yesu, ata iluluŋ no hiyo ta mai efotu inya, nyo etila ifa isia daŋ inya. ⁴¹ Niya, awoŋ lobo tuŋani lara fure nohonye Jairo, ara ifa inya etok lo Sinagog. Ohuyek ifa Jairo to hejek ino Yesu nyo awak ifa inya Yesu he'no ahaŋ honye. ⁴² Owuon ifa inya ho ŋani honye nobotie, nara ŋasi inohonye tomon harik, erwahita ifa inya bi no. To heno nohonye, efuduni ifa iluluŋ no hiyo to honye. ⁴³ Owon ifa nobo hito oŋorwo dia nafa odule hosehe nohonye pule man ŋasi tomon harik, esahak ifa inya arobia inohonye daŋ te ibwana, obe orumu libe tara lobo hosie. ⁴⁴ Ata awoŋ okohorwoŋ no Yesu ata hitir hucuŋi no boŋo no Yesu, kwak ta mai nya ata pule nohonye weta. ⁴⁵ Ata Yesu hijo, "ŋai nia lotir naya?" Nafa orrisai isia, ojo Peturu ata hijo, "Etok, etufuda ilululŋ no hiyo iye." ⁴⁶ Ata Yesu hijo, "Etir naya nobo tuŋani dede, ayen naŋ hijo ohu ida golon inya tara naya." ⁴⁷ Ifa egonyu hito oŋorwo hijo enyai inya henyak hiŋofita hiro inara egem inya, awoŋ daŋ nekikiro, ahuyek to hosiere ho Yesu, ata asalak to hosiere iko iluluŋ no hiyo daŋ, egiem inya hiro ino arrumuni inya lwaha nohonye kwak tara Yesu. ⁴⁸ niya, ejo inya to honye, "Hito, etilibo hiruk nohoi iye. Ino to bolioŋ." ⁴⁹ Ojo inya harasa hiro, awoŋ lobo tuŋani ta haŋ he etok lo Sinagog, Ata hijo, "Oye ŋanni hoi, baŋa etigiema hetiyanani." ⁵⁰ Ifa etiru Yesu, ata inya hitiraŋ inya, "Baŋa la baŋ. Iruho ania, ojo iso inya orumu hetilohini." ⁵¹ Ifa leba Yesu ta haŋ ho Jairo, obe ifa inya lawak lobo tuŋani hotojiŋak daŋ ho inya, Ata inya ebusak, Peturu, Yoani, Yakobo, ojo monye he hotonye ho hito. ⁵² Oyio ifa hiyo inafa owon ojo inak ata riha inya, ata ti inya hijo, "Ibaŋa loyo. Holobe inya oye, ati ofer inya bi." ⁵³ Ati ellohitari ifa isia Yesu, to hiyyen nohosie hijo oye hito inya. ⁵⁴ Atati inya hitidet hito nia ta hani, ata hililoŋ hijo, “Hito, tette." ⁵⁵ Ata oyiri nohonye, acohini ata diote ahide kwak. Ata Yesu elimak to hosie hesiara inya nobo daha. ⁵⁶ Eliliha ifa haŋ hose, ati ojo ifa inya hotobiaŋa isia ogiofok lobo tuŋani hiro inia.