1
Eliaha ifa holoŋ ne imune ne efurek isia hijo Laŋan.
2
Ata etok la fadirihien he hegiorok huwaha hijo hehum iso jai anyar ettohori Yesu, ati abaŋ ifa isia hiyo.
3
Ata ati Sitan ajiŋak to Juda Iskariote lobo lo tomon ha arik.
4
Ohu Juda ade te etok lo fadirihien he ettaha ilo loseŋer ofwo huwaha ho loseŋer ofwo huwaha jai iso eyani inya Yesu to hosie.
5
Omuno ifa isia, ata isia huruk hisio inya arobiaha.
6
Eruhu ifa inya, ata siaha hei ne eyanini inya to hosie ade tara iluluŋ no hiyo.
7
Awoŋ ifa far ne eyyomori hiyo imune anyar ofwo isia hisio ker ahisiori.
8
Ata Yesu efahak Peturu he Yoani hijo, ifeti ihumak daha na laŋan anyar efwo daha.
9
Efia ifa isia inya, "Hewak iye iyohoi ehumak daha aji?
10
“Etiraŋ inya te isia hijo, "Itira, lejo itai ejiŋak to bore na gala, efu iso itai hiboŋ ho lobo tuŋani leyyuhuta hifioŋ. Ijufak inya ahaŋ nia lowuye inya.
11
Ati ilimak monye la haji he hetiyenani to hoi, “Tahu haji na hata monok, nia iso ladahari naŋ daha na laŋan he hejufutak ilallaŋ?'''
12
Etuhutek iso inya itai haji netok na etuhuma dia hide na la lat.
13
“Ofwo isia arum saŋ daŋ iya ojoYesu to hosie. Ata isia hihuhuma ŋira no holoŋ no laŋan no anjilo lo Hollum.
14
Ifa leba holoŋ nia, ahunyai inya he heyiyenak ilohonye.
15
Ata inya hijo tohosi,” awahan naŋ bi no daha no laŋan iko itai holobe hitigiema nanaŋ.
16
Ati ajo naya ta hatai, abe iso naŋ adaha inyak man otuba obie no Hollum.“
17
Ata Yesu adumu imatit, ifa esio inya humo, ata inya hijo "Iyari ina, ata itai hibwan to wati inahatai.
18
Ati ajo naya ta hatai abe iso naya enyak himat tara haŋer ino yani, man otuni obie no Hollum.''
19
Ata inya adumu imune, ifa esio inya humo, ebun inya imune ata hisio to hosie, hijo, “Ara inaŋ wan nanaŋ nafa esiarahini ta hatai ihuma ina ata itai egigilu naya."
20
Ata inya adumu imatit ta halu no daha. Ata hijo "Ara imatit inaŋ himori ŋejuk to hoto nanaŋ no lowouni te itai.
21
Ati ihuma riŋa. Lo owu etinyaŋai naya lia owon ikanaŋ to terefeja.
22
Ati eba iso hiro inia iya egioro ifa man beren to onyi Tuŋani. Ati oru iso to tuŋani lo ohu hiro inia afanu tara honye!''
23
Ata isia hitiara hiro ta wati ilohosie hijo ŋai iso lia lo ohu higiem hiro inia to honye.
24
Teya edoŋ rijia to hosie hijo ŋai iso ara etok tara hosie.
25
Ata inya hijo to hosie, ''ara habwok ilo halufak ilo tara hosie, ati hiyo ilo owoun he hilohitok tara hosie ara isia hiyo ile ehuma no olibo to hiyo ilohosie.
26
Ati hotobiaŋa ara ta hatai daŋ ania. Isiara la ara etok tara hatai hata ra iya letiŋ, isiara lia la anyar to hiji hatai hata ra hegiamani lahatai.
27
Lari lia agalik, tuŋani le etole to terefeja he tuŋani le egiama ta hatai? Hara mahu tuŋani le etole to terefeja? Ajo naŋ awon to hiji hatai a hegiamani.
28
Ati itai ilia ile edule ikanaŋ te iciemiti inanaŋ.
29
Esio naya ta hatai obie, iya esio Monye hanaŋ ta hanaŋ obie,
30
hijo anyar edaha itai ojo emata to terefeja no obie kanaŋ, ojo itai efu hittole to hittolojita eŋotori woyojin tomon harik ino Isarail.
31
Simone, Simone ihuma riŋa, awak Sitan ajiŋak tohoi, hijo awak inya higili iye iya geme.
32
Ati amojok naŋ to hoi, hijo hotobiaŋa huruk nohoi olita. La aciohini iye to huruk nohoi, itigolo halasirah hoi.''
33
Ata Peturu hijo to honye, "Habu, Aremik naya eno hehoi a hotwai babus efitari iko to oyori."
34
Ata Yesu hitiraŋ, "Elimak naya iye, Peturu, erisa iso iye naya hinyahita hunik hijo obe iye eyen naya holobe hohoro ellok.''
35
Ata Yesu hijo to hosie, “efahak naya itai ade obe rokwo, iko imutuk na saŋ ho hamuha, enyak ifa itai siaha inak hiro?” Obe ifa isia oremik hitiraŋ to honye.”
36
Ata inya hijo to hosie, “ati Iyania lia lo owon ho horokwo, isiara inya heyari ojo. Lia obe owon ho carakwat isiara hetiinyaŋak boŋo nohonye anyar einyaŋu nobo.
37
Ati ajo naya ta hatai, hiro inafa afanu to fure nanaŋ iya egiorohini isiara hotowuana, nyo ojo ifa hiyo hijo obe inya oyen ifahita.' Otubai hiroinafalero to fure hanaŋ."
38
Ata isia hijo, “Habu, towolo! owon demio arik." Ata inya hijo to hose, "Aremik.''
39
Ta halu na daha eno Yesu, iya ina to holoŋi inya adoŋe no Olifeto, ojo hejufutak ejufari inya.
40
Ifa leba isia, ata inya hijo to hosie "Itimoje hijo hotobiaŋa itai ejiŋak to ciama."
41
Ata inya eno ade tara hosie adoŋe Ata rigoŋo ta fau Ata mojo,
42
hijo, "Monye, le ewak iye todumu imatit ina tara hanaŋ, ati obe ara wahan hanaŋ ati ihuma iya ewak iye.”
43
Ata anjilo te ido aliew to honye, letigol inya.
44
Owuana ifa inya to diahai na taji nohonye, ata inya mojo bi no, ata pulo nohonye hira iya hoto no odek ta fau.
45
Ifa lodiote inya tomojo no honye, ata inya inya awoŋ too heyiyenak, ata inya arumu isia ojoto nyo ejiriŋa ifa inya,
46
Ata inya hifi isia, "No nyo ojoto itai? Itite itimoje, hijo hotobiaŋa itai ejiŋak to ciama.”
47
To hiro nohonye, kwak ata isia egonyu iluluŋ he Juda, lobo hejufani ila ho tomon ha arik le edihita isia. Otu inya aŋati to Yesu hijo ajur inya,
48
At ojo Yesu to honye, "Judas, etiinyaŋak iye onyi Tuŋani to jura ?"
49
Ifa ewolo liya daŋ lelurok Yesu hiroinafaowuon Ata isia hijo, “Habu, eŋot bahat to demi?“
50
Ata lobo lohosie hiŋot hegiamani le etok lo fadirihen, oŋutu hiyok nohonye ne inyat.
51
Ata Yesu hijo, “Aremik nia.” ata inya enyahak hiyok nohonye ata hitilibo inya.
52
Ojo Yesu to eittok la fadirihen, he ettaha hijo, "Efanu itai, ta hanaŋ iya to ohoho, demio he bukwo.
53
Nafa awuanari naya ikatai ta Haji Imojit, ebe itai etirok ta hanaŋ has inahatai. Ati elaŋ far nahatai itai iko hegiamak ilo hilohitok ne idumele.''
54
Ata isia eniefu inya, ata eyari a haji ne etok la fadirihen. Ati ejufurai ifa Peturu inya te alamari.
55
Ta halu no etuwulek nohosie hima to hiji no ruwat, etole isia daŋ ta fau. Etole ifa Peturu to hiji hosie.
56
Ata nobo hegiamani na ara hito oŋorwo egonyu inya le etole te icala no hima, ata inya hiwolo inya to honyehite inohonye toktok ata hijo, "Owuon ida tuŋani ile he Yesu.''
57
Ata Peturu risai hijo, "Tuŋani inaŋ, abe naya ayen inya.''
58
Ta halu, ata hidofe lobo tuŋani egonyu inya Ata hijo, "Era ida iye daŋ lobo lohosie.'' Ata Peturu hijo, "Ile tuŋani, alufa naya.'
59
Ta halu enyak lobo hijo, "Dede owon tuŋani ileŋ daŋ he isia nyo ara inya la Galilea.''
60
Ati ojo Peturu ''Ile tuŋani, abe naŋ ayen hiro ino ero iye.” Halarasa inya hiro, ata hohoro hilok.
61
Ofiala Yesu, ata riŋa to Peturu, ata Peturu egigilu hiram nafa ero Yesu, nafa ojo inya to honye "Holobe hohoro elok erisa iso iye naya hinyahita hunik."
62
Ata Peturu ajiŋu abali lo oyio no.
63
Ata heririak ilo Yesu elohitari ojo abak inya.
64
Ata isia emuhok inya ata hifi inya hijo, "Ikilu! ŋai lia olum iye?''
65
Ero ifa isia hiro daŋ inak ila adata Yesu, ojo hidofe omoro inya.
66
Ifa era motie nohonye, ata maruak ilo hiyo daŋ atubahini ara botie, iko etaha ilo fadirihien iko hegiorok. Ata isia edihori inya te iluluŋ ne ettaha ilo Yudeya.
67
Ata isia hijo, "Le era iye Kristo, ilimak iyohoi.'' Ata inya hijo to hosie, "Le elimak naya ta hatai, ebe iso itai eruk,
68
ojo le efi naya itai, ebe iso itai eremik hitiraŋ ta hanaŋ.
69
Ati man Iyania man ahosiere, ohu iso onyi Tuŋani ahunyai ta hani he inyat no golon no Hollum.''
70
Ata isia daŋ hijo, "Dede iye hada lia onyi Hollum?'' Ata Yesu hijo to hosie, "Ojo hido itai ara naya.''
71
Ata isia hijo, "No nyo enyak iyohoi wahan lobo sut? Etiru hido iyohoi ta wati te inohoi to hutuk nohonye.''