¹ Niyya atta heduduhak ho musuru iko ilak heyyak ŋafanu to Yesu letirari inyia. ² Atta Farisei iko hegiorok hiŋuŋunita to wati te inno hosie, hijo, “Ellilloŋu tuŋani illeŋ heyyak atta daha daŋ he isia.” ³ Atta Yesu hiro hitiriami inna to hosie, hijo, ⁴ “Lari tara hatai, iyya lowuon ida inyia ho kioro hisihi nobotie atta nobotie litei, obe iso lebusak tomwana hotoŋuan hohotoŋuan to tim, atta ŋasiahari lia lololita man orrumuni lia? ⁵ Iyya laŋarrumu inyia lia lafa lolita, olorok inyia lia to loho atta mune. ⁶ Lojo inyia eba ta haŋ honyie, elilloŋu inyia motiarak ojo onyihari honyie daŋ anobotie, eijo to hosie, ‘Hetimune arumu naŋ ker hanaŋ lafa lolita.‘ ⁷ Ajo naŋ ta hatai, iyyania obolo iso mune te ido to heyyani lobotie ille omitu hiyyata innohonyie agalik tuŋani lo obe eruk. ⁸ Iyya owuon nobo hiito noŋoruo ha arobiya tomon, ati lojo inyia letilite lobotie, obe letuwulek lomo atta hefie haji, atta hisiek kai-kai man orrumuni? ⁹ Nafa arumu inyia, atta hililloŋ motiarak honyie, iko Lonyihari, atta hijo, ‘Hetumunei ha naŋ, aŋarrumu naŋ rial lafa etilitek naŋ.’ ¹⁰ Iyyania, ajo naŋ ta hatai, owuon mune to hosiere ha anjilohien illo Hollum to heyyani lobotie le eruk.” ¹¹ Atta Yesu hijo, “Owuon ifa lobo tuŋani ho lonyirok illohonyie lohorik, ¹² Atta lia hittiŋ tara hosie hijo to monye, ‘Baba, isiara ta hanaŋ saŋ inna ara lorutat innanaŋ.’ Atta inyia ŋabuanyak ibariti inno honyie to hosie. ¹³ Ta halu ho holoŋitek kai, eno hiito lettiŋ hiro innohonyie adoŋe na lalama, dia atta inyia hinyiaŋa hirro inno lorru inna lamanya inyia lenyiaŋu ta arobiya to niyya honyie. ¹⁴ Nafa esok inyia arobia innohonyie daŋ, aŋawoŋ hiŋa no lorru a doŋe nyia, atta inyia hilociaŋ binno. ¹⁵ Atta inyia eno hisio wan nohonyie egiemari a doŋe nyie to lobo tuŋani, le lefahak inyia amana leitamari bataha inno honyie. ¹⁶ Atta inyia hijo amanya naŋ ta habohol inno morro inna ladaha bataha nyo obe ifa lobo tuŋani esio inyia nobo daha. ¹⁷ Nafa agilu inyia to wan to no honyie, atta hijo inyia, ‘Hara mahu hegiamak ta haŋ ho monye hanaŋ jai illa ladaha ŋiria nettok man ofitok, ajo nayya aye ho hiŋa! ¹⁸ Ahu naŋ ebusak mai inna atta naŋ eno to monye hanaŋ, ahu iso naŋ hijo to honyie, “Baba, eyyau naŋ to hosiere he ido, ojo to hosiere hoi. ¹⁹ Abe naŋ asiru hira a lonyi hoi; ati ihumak naŋ a hegiamani lohoi.‘“ ²⁰ Nia, odiote loŋeye atta awoŋ man to monye. Nafa halalama inyia, egonyu monye honyie inyia, atta amehini, atta hinyior ohu heniafahini wati atta hijur inyia. ²¹ Atta inyie hijo to monye, ‘Baba, eyyau naŋ to hosiere ho Hollum iko to hosiere hoi. Abe naŋ asiru a lonyi hoi.‘ ²² Ejio monye to hegiamak illohonyie, ‘Iyyani boŋojin inno olibo kwak iticiefok to honyie, ihumak bilata ta hafialai honyie iko hamuha to hejek innohonyie. ²³ Iyyani tauwo lo lofir isiahak to honyie. Hatadahai hiyyo lohomo nohonyie. ²⁴ Oye ifa lonyi hanaŋ, iyyania awuarini inyia. Olita ifa inyia, iyyania arrumuni inyia.‘ ²⁵ Owuon ifa lonyi honyie illeŋ hittok ta mana. Ifa eliaha inyia aŋati ha haŋ, etiru inyia hidolo ojo hidofe efifoho. ²⁶ Atta inyia hililloŋ lobo hegiamani atta hifi hijo, howuon nyo. ²⁷ Atta hegiamani hijo to honyie, ‘Ottu ida ilasi hoi ahaŋ inyia nia lodumu monye hoi tamot lo lofir binno atta esiahak to honyie, nyo acohini inyia a nalanyar.’ ²⁸ Ejoria ifa ilasi lehitok, atta hibo eno ahotuai, Ojo monye ottu abali, lattanari inyia. ²⁹ Atta ati lonyi lettok hitiraŋ to monye hijo, ‘Toriŋai ŋasi hunna iluluŋ lepitori naŋ to hoi, abe naŋ amiasa hifahita inno hoi, ejo iyye obe lesio naŋ lobo hullo le hinne hijo anyar ehumak naŋ lohomo to morot illa hanaŋ, ³⁰ Ati laŋawoŋ lonyi hoi, leramitari ibariti inno hoi iko somok, atta iyye esiahak to honyie tawuo lo lofir.‘ ³¹ Ejio monye to honyie, ‘Lonyi hanaŋ, adulei naŋ hoi to holoŋi, ojo inna lara inna haŋ ara innohoi. ³² Ati osiru to hoi hehumahini lohomo atta mune, te ilasi te ille hatai oye ifa iyyania owuar inyia; olite ifa inyia ojo iyyania arrumuni.‘“