¹ To nobo holoŋ no Sabato. Eno Yesu ahaji lobo lettok lo Farisei adahari imune, atta isia hihum ehutok oriŋari inyia toktok. ² Atta lobo tuŋani loloŋwai hawoŋ to Yesu. ³ Atta Yesu hifia hetiyanak illo hifahita illo Yudei iko Farisei hijo, "Obis iso hetinyarari to Sabato?" ⁴ Oduehini ifa isia liŋliŋ. Atta Yesu arihu tuŋani lia atta hitinyar inyia, atta efahak inyia ade. ⁵ Attati inyia hijo to hose, “ŋai lia tara hatai lelum hito nohonye kuya hiteŋ ro hirri to holong no Sabato lobe awak epihu ade?” ⁶ Ati obe isia etira hifi honye nia. ⁷ Nafa egonyu Yesu ilak illafa hiyyo eliloŋu atta ŋanyimu masik inne hitoŋita letaha elimahini inyia isia daŋ hitiriamita inna, ⁸ ’’Le liloŋu lobo tuŋani itai to lohomo no hiyama, ibaŋa etole ta harajin inno hosiere, nyo kuya owuon lobo leliloŋu inyie lalagalik iyye. ⁹ Ati lawoŋ tuŋani lia daŋ, ottu iso inyie to wan nohonyie monye lohomo eliloŋu itai daŋ, hijo tohoi, 'Isiara tuŋani le mai nohoi,' Niya, eno inyia hitole ta hara no fiahajok to riri. ¹⁰ Ati lellilloŋu inyie iyye hijo ino itolojo ta mai nolofiak. Ottu iso ellilloŋu iyye atta hijo, "Illa, tette woŋ a hosiere.' Eyyani is nia lohuo tohoi. To hiji ho hiyyo daŋ lowuon hoi dia teremeja. ¹¹ Nyo tuŋani daŋ lalahaf wan nohonyie etinyialam iso ojo leletinyalam wan nohonyie ahafa iso inyia.’’ ¹² Eijo Yesu hidofe tuŋani lafa leliloŋu inyia, "Isiara iyye ŋiria nafar kuya na harie, baŋa leliloŋ motte hoi, hilasi hoi, kuya hilahaŋ hatai kuya lonyihari lohoi, lalabara iyya to hose ofuo elienyu eliloŋu inye. ¹³ Ati lehumak iyye lohomo, illilloŋu lociaŋak, haŋurak, yokiojok, ojo haŋodok. ¹⁴ Atta iso iyye wuana ho jaha, nyo obe isia elienyu iyye. Odumahini iso tohoi to hebuhu no halibok." ¹⁵ Nafa etiru lobo lohose tara illafa etole ho Yesu to terefeja no ŋiria. Atta hijo, “Isiara jaha to lia ladaha iso imune to lobie no Hollum!” ¹⁶ Atta Yesu hijo to honye, “Ehuhumak ifa lobo tuŋani ŋiria nettok atta eliloŋu arria. ¹⁷ Nafa olibe ŋiria, efahak inyie hegiamani honye heno helimak huwo illafa eliloŋu hijo, ‘Ifanu, nyo otubai hirro iyyania.’ ¹⁸ Atta isia bidaŋ ta mai hitiara hiloleita hijo, 'Enyiaŋu ifa nayya mana ajo naŋ luŋa ahu loriŋari, hibe woti, ibusak naŋ.’ ¹⁹ Atta lobotie hijo, ‘Enyiaŋu iŋole naŋ hilak husuŋ haromok miet, ajo naŋ ahu hiciem isia, illa hibe woti.’ ²⁰ Atta lobo tuŋani hijo, ‘heletek naŋ yama, abe naŋ luŋa aremik ŋawoŋ.’ ²¹ Atta hegiamani ŋacohari ohu elimak ettok lohonye hirro daŋ, atta ettok lahaji lia hijoria to hegiamani, atta hijo to hegiamani, ‘kokuak ino atuluba no bore na gala, iyyania lociaŋak, yokiajak, haŋodok iko haŋurak.’ ²² Atta hegiamani hijo, ‘Lettok, egiem naŋ daŋ innara eijo iyye, ati ofitini nobo mai.’ ²³ Ejio ettok to hegiamani, ‘Ino atulubaha, iko maŋatin, ililoŋu isia hafanu ahotuai, anyar efut haji hanaŋ. ²⁴ Ajo naŋ daha hatai, obe lobo tara lolotu illafa eliloŋu eremik to hosiere hiniŋ ŋiria nanaŋ.''' ²⁵ Iyyania, ofuo ifa iluluŋ no hiyyo efie daŋ he inyia, atta inyia yite atta hijo to hosie, ²⁶ “Lawoŋ lobo tuŋani ta hanaŋ ojo inyia obe oliwari monye honyie, hotonye, noŋoruo, durre, hilasira iko hanasira, ojo manya nohonye daŋ hidofe obe eremik hira aheyiyanani hanaŋ. ²⁷ Lia lolobe olorita Kuruce nohonyie atta ŋawoŋ ta halu hanaŋ obe eremik hira aheyiyanani hanaŋ. ²⁸ Lawak lobo lahatai, duho haji nelesaga, obe lohunyie to ta fau atta hihien hinyiaŋita harriŋari hirro inno loremik hetufutak haji? ²⁹ Nyo letiarak inyia iduhit atta enyiei lesohak, ille legonyu igem nyie elohitari inyia, ³⁰ Atta hijo, ‘Etiara tuŋani lia duho na haji obe ati eremik esahak.’ ³¹ Lari ettok ohu oriomori fere ho lobo ettok obe lohunyie ta fau atta hihien hijo horemik iso oseŋer hisihai tomon illohonyie rem ho ettok lolotu loremori ho inyia ho oseŋer hullo hisihai tomona arik? ³² Lobe, halarrasa hariomok liyya alamarai, atta ŋefahak herarani honye to hosiere herara hirro inne himora. ³³ Iyyania, lobe lobo lahatai ebusak hirro inno omuno inyia, obe iso eremik hira heyiyanani hanaŋ. ³⁴ Olibo mile bino, ati lolite iduarit nohonyie, horemik iso duaran jai? ³⁵ Obe osiru hegiamari to huron iko hidofe ta tanyan inne efuro. Ebirori iso ade. Lia lolowuon ho yohe hitirita, isiara inyia hetiru.”