1
Eciem hiyyo aria higier hirro innafa egiemini to hiji hohoi.
2
Illafa egonyu to honyiehite te innohosie to hitieri hidofe ara ahegiamak illo hirro inno Hollum, isia ifa elimak toohoi.
3
Olibo ta hanaŋ ŋasiehini hirro daŋ to bisan to hitieri, hegiorohini tohoi nolobis, iyye Tofilo lalanyar.
4
Awak naŋ anyar liyyen iyye ibisiti inno hirro dede innafa etiyana hiyyo iyye.
5
To holoŋitek innafa he Erode, habu lo Yudea, owuon ifa lobo Fadiri lefurak Sakariya, ta ŋati ba Abija. Ara ifa noŋorwo honyie tara woyyo na Arone, nafa ara fure nohonyie Elisabeta.
6
Obis ifa isia daŋ to hosiere ho Hollum, olot obe hipali to hifahita daŋ iko to hirro inno Habu.
7
Ati obe ifa isia owuon he innak durre nyo owueta ifa Elisabeta, ojo hidofe isia emarwak binno.
8
To nobo holoŋ nafa egiamari Sakariya higiemita innohonyie inno Fadiri to hosiere ho Hollum to higiemi no ŋati nohonyie,
9
Atta Fadirihien ejufak imohit atta anyimu inyia to hibiro moru hehutu ŋai hotojiŋak ta Haji Imojit na Habu hotosuahak attagoŋ.
10
Nafa lera suaha no attagoŋ, atta iluluŋ no hiyyo hamojok wueta ta bali.
11
Atta anjilo la Habu etilek wan to honyie, lo owueta ta hani inyiet no altari no attagoŋ.
12
Nafa egonyu Sakariya anjilo lia, atta baŋi hinnef inyia.
13
Atta anjilo hijo to honyie, “Hebaŋ, Sakariya nyo etirini ifa mojo nohoi. Esik iso noŋorwo hoi Elisabeta iyye lonyi, eijo iyye efurek inyia Yoani.
14
Obolo iso hitihabwo ho mune to hoi iko to iluluŋ no hiyyo lesiuni inyie.
15
Ara iso inyia lettok to hosiere ha Habu. Obe iso inyia amata fino, hifioŋ inno ajalaŋi iko balu no logol. Man helesiuni inyia efut iso inyie ho Loyiri lo Olibo.
16
Esio iso inyia iluluŋ no durre ille Israile hotoyite ahalu ta Habu Hollum.
17
Olot iso inyia to hosiere honyie to duaran iko to golon ojo Loyiri no Elija lo Hollum. Eloit iso inyia tajia inno monyie to durre innohosie, eloit hidofe ha masik heruhori higigilita inno hiyyo illo obis- Ehumak iso inyia hiyyo ta ŋawoŋ na Habu."
18
Atta hidofe Sakariya hifi anjilo lia hijo, "Hayyen iso naŋ jai hijo ara hirro innia dede? Nyo emaruak naŋ ojo hidofe noŋoruo hanaŋ emaruak no."
19
Etiraŋ ifa anjilo inyia hijo, "Nayya Gabriele. Aweta nayya to hosiere ho Hollum lefahu nayya helimahini to hoi sayye inno lanyar.
20
To wolo, edua iso iyye man to holoŋ nelebarari hirro hunna nyo ibe iyye eruk hiryo innanaŋ inno oremik ta far na anyar. Ebe iso iyye ero man afanini hirro innia hira dede lottubai holoŋ nohosie."
21
Etila ifa hiyyo Sakariya, man elafuhori hiyyo hijo nyo leliŋa inyie fur to hotwai Haji Imojit nettok.
22
Ifa ajiŋu inyia abali, enyiei inyia helero to hose; atta isia agilu hijo aliew nobo sihin to hotwai Haji Imojit. Obe ifa inyia oremik hiro to hosie, ta mai nia atta inyia hihuto to hosie hihuta ta has.
23
Nafa ottubai holoŋitek innohonyie inne igem ta haji holomojori, aciahari Sakariya ahaŋ.
24
Ta halu ho holoŋitek niyya, atta noŋoruo honyie Elisabeta hibuŋuta enyiei helebusak Haji Imojit man yafajin miet. Atta Elisabeta hijo,
25
“Ehum Habu ta hanaŋ nalanyar, “To holoŋitek hunna etuhutek mune nohonyie ta hana, atta ŋadumu irri innanaŋ ade tara hiyyo.”
26
Iyyania to hibuŋuta na Elisabeta yafajin ile, efahak ifa Hollum anjilo Gaburele abore gala na Nasarit nyie ta fau ho Galilea,
27
to hoduoti nafa esaŋa tuŋani lara fure Yosefu. Ara ifa inyia to woyyo ba Davide, ojio fure no hoduoti nyia ara Maria.
28
Atta ati anjilo awoŋ to honyie atta hijo, “Togolo Maria; owuon Habu iko hoi.”
29
Etigiama ifa Maria binno to sayye inno anjilo, hijo hojo hirro inne honyie nyo.
30
Eijo anjillo to honyie hijo, “Maria, baŋa labaŋ, owuon Hollum lo omehini iyye.
31
Towolo, ebuŋuta iso iyye atta iyye esiu hiito, eijo iyye atta efurek inyia Yesu.
32
Obolo iso inyia atta hililloŋo inyia hiito lettok lo Hide. Habu Hollum iso eso inyia hara no Monye Honyie, Davide.
33
To nia, ottu iso inyia hira a Habu woyyo no Yokobo tulaŋ obiaŋari hisidi no lobie nohonyie."
34
Atta Maria elimak to anjilo lia hijo, “Holobe nayya atirohini ho lobo hiito oliawa, hafanu iso hirro jai?"
35
Etiraŋ ifa anjilo inyia hijo, "Ottu iso Loyiri lo Olibo tohoi, ottu iso duaran no Hollum emuluhak iyye. Atta iso iyye hililloŋo hiito lia lo Lolibo Lonyi Hollum.
36
Towolo Elisabeta, nia ta haŋ hatai, eholofi ifa hido inyia. Ati iyyania owuana ho hosehe no yafajin ile, emaruak ida hido inyia binno.
37
Obe hidonyi nobo sihin no oremik himir Hollum."
38
Atta Maria hijo, “Dede, ara nayya hegiamani no Hollum, isiara ati hebara da hanaŋ iyya lojo hiro nohoi. Atta anjilo ebusak inyia.
39
To holoŋitek niyya odiote Maria atta ŋarruhari adoŋe no Yudea.
40
Eno inyia ahotwai haji no Sakariya atta hifony Elisabeta.
41
Nafa etiru Elisabeta hifonya na Mariya, atta lodole lia to hosehe diote; ati efut ifa Elisabeta iko Loyiri lo Olibo.
42
Atta inyia hiro wuoŋ wuoŋ hijo, “To hiji ho ŋoruo daŋ obolo mune tohoi ho hiito lia etu iyye esiu!
43
Nyo ottu hotonye Habu ariŋari nayya?
44
Ta nara etiruni nayya hifonya nohoi, atta hiito to hosehe hanaŋ hididiaŋa to mune.
45
Hotowuana mune ho jaha tohoi heruhoni aŋawoŋ sayye dede innafa efahu Habu.”
46
Atta Maria hijo, “Etihabuo oholio nanaŋ Habu,
47
Etimuno Loyiri nanaŋ to Hollum, hetilahani hanaŋ.
48
Nyo egonyu inyia fiahajo hanaŋ hegiamani.
Iyyania man ahosiere elilloŋo iso hilahajik daŋ nayya ahamunoni,
49
Egiem Lettok ta hanaŋ hirro aria inno hittaha; ojo fure nohonyie Olibo.
50
Ara hamehini nohonyie to hilahaji man to hilahajik illo hiyyo illa labaŋ inyia.
51
Egiem inyia hirro inno ogol ta has innohonyie; etisarik inyia ilia ille etidara ta tajia innohose.
52
Epihe inyia henefitak to harajin afau, atta hihaf ahide illo lowuon ta fau.
53
Eso inyia hirro inna anyar to hiyyo illo lowuon ho hiŋa, atta efuhai ade hiyyo habarak asai.
54
Atta inyia hiluak hegiamani Lohonyie Israile, anyar lowuon ho hamehini ta Abramo iko woyyojin illohonyie tulaŋ,
55
iyya nafa ero inyia to hohonyiok hijo ehum iso inyie.”
56
Amanya ifa Maria he Elisabeta iyya yafajin hunik, atta aciahari ahaji honyie.
57
Ifa ara holoŋ no hitado no Elisabeta lodole, esiu inyia lonyi.
58
Etiru onyihari iko hilahaŋ honyie hijo amehini Habu inyia atta isia mune he inyia.
59
Niyya, te hitahotohunihi no holoŋ, afanu isia higot hiito lodole; atta isia wahan efurek inyia hatara Sakariya, fure no monye honyie.
60
Atta ati hotonye honyie hitiraŋ hijo, “Obe, ellilloŋo iso inyia hijo Yoani.”
61
Atts isia hijo to honyie, “Obe lobo to hiji ho woyyo hatai le efurek hiyyo fure nia.”
62
Atta isia elimak monye honyie hotorrumu nari fure lawak inyia efurek.
63
Atta inyia hifia nobo higieri hegiorohini to hide honyie. “Fure nohonyie lara Yoani.“ Ojo isia daŋ atta hillilliha binno.
64
Kokuak atta hutuk nohonyie ŋa ojo hidofe ŋadief ebusahini, atta inyia hitiara hiro hitahuo Hollum.
65
Atta baŋi awoŋ too hiyyo daŋ illafa amanya, elur isia ho hirro daŋ innafa edoŋ erarari daŋ ta masik ho fau inno Yudea.
66
Hiyyo illafa daŋ etiru odule higigillo hijo nyo hafa ledoŋ atta hijo, "Hottu iso lodole hira anyo?" Atta isia ŋaheru hijo owuon hafa hani na Habu he inyia.
67
Efut ifa monye honyie Sakariya iko Loyiri Lolibo, atta inyia hiro hikili inna,
68
“Hetahue Habu Hollum le Israile, nyo awoŋ inyia tohooi atta ehumak ikoi no hahehini hiyyo hotowuana ania.
69
Esio inyia toohoi hetilahani lologol to woyyo ba hegiemani honyie Davide,
70
Iyya ero Hollum to hekilak illohonyie ifa beren.
71
Otiorok inyia hesiarari toohoi etilohini tara miorok illohooi, iko tara hani ho liyya oliwari iyyohoi.
72
Egiem iso inyia inna hetuhutahini hamehini to hohonyiok hohoi, iko hagiluni himwara no olibo.
73
Himwara nya ara attanyak na has nafa ero inyia ta Abramo hohonyi hohoi.
74
Emak inyia attanyak na has anyar lohek iyyohoi asai to has inno miorok illohooi iko hebusahini iyyohoi hegiamari to honyie obe baŋi,
75
To libe iko to bisan to hosiere honyie to holoŋitek innohoi daŋ.
76
Hidonyi iyye Lonyi hanaŋ, ellilloŋo iso iyye ahekilani lo lia to hitidara nalagalik anyar ehu iso iyye to hosiere na Habu hediarak hiyyo ta ŋawoŋ nohonyie,
77
Anyar hidofe elwak hiyyo hotoyyen hijo etilohini iso isia to hebusahini no hiyyata innohosie.
78
Hollum lohoi iso obusak iyyohoi to hamehini nohonyie, ta hamehini inna, hetilahani ille ara iyya holoŋ no motie iso lo ottu te ido haluahari iyyohoi.
79
Opipiak iso to hiyyo ille ettole te idumele iko lohidis no ye; eriria iso inyia hejek innohoi to hikoi no himwara.”
80
Nia atta hiito bolo atta awoŋ golon to Oyiri. Amanya inyia te icala no lo otte etiarari inyia aliew to hiji ho hiyyo illo Israile.