1
Iyyania, to holoŋitek innafa niyya, awoŋ hiro tara Kesare Agusto ta nafa efahini inyia hifahi no hitigioro no fureta inno hiyyo illa amanya ta fau ho Roma.
2
Ara ifa inna hitieri no higioro no fureta nafa owuanari Kurino a mamur lo Siria.
3
Atta hiyyo daŋ ta masik innohose hefie aborejin inno gala innohose hetigiorohini fureta innohosie.
4
Ellaŋ hidofe Yosefu to bore gala no Nasarit nyia ta Galilea atta ewate abore gala no Yudea no Bettelehem, nafa oyyen hiyyo hijo doŋe no Davide, nyo ottu ifa inyia tara woyyo
5
Ohu ifa inyia ade hetigiorohini iko Maria nafa esaŋa inyia ojo hidofe etila hiito.
6
Niyya nafa halarrasa isia dia, awoŋ holoŋ hisiori lodole lohonyie.
7
Atta inyia esiu hiito oliawa lodole loŋieu, atta elurok boŋo to honyie. Atta inyia efiyak hiito to hotwe ho togoli ne etimatari hiyyo hanyahanya, nyo obe ifa mai to hose ta haji na hatamonok.
8
Ta mai nyia owuon ifa illamuk heyohok illo kioro illafa amanya oriŋa kioro innohosie ta tari.
9
Kwak, atta anjilo la Habu hidoŋ to hose, ojo lohuo na Habu no opipiak atta elurok daŋ isia, atta isia baŋi binno.
10
Atta anjilo hijo to hose, “Ibaŋa labaŋ, nyo awak iso nayya elimak sayye inna anyar inne leyyani mune to hiyyo daŋ.
11
Ena esiuni Hetalahani ta hatai to bore gala no Davide! Ara inyia Kristo Habu!
12
Ara inna hituhuti nelesio iso ta hatai, errumu iso itai lodole lobubuna to boŋojin lolofer to togoli hitimati na hanyahanya."
13
Kokuak owuon ifa iluluŋ no oseŋer ille ido ille etihabuo Hollum atta hijo,
14
“Hotohuo Hollum lia to hide, hotowuana hidofe himwara ta fau to hiji ho hiyyo illo omuno inyie.”
15
Awoŋ holoŋ nafa ofuye anjilohien tara hose ahide ido, atta heyyohok hiro to wati innohosie, “Efi iyyania a Bettelehem, anyar efi egonyu sihin nara leba nelehumak Habu hotoyyen iyyohooi.”
16
Aruhari isia ade atta ŋarrumu Maria iko Yosefu, egonyu isia lodole ofer to togoli imatit.
17
Ifa egonyu isia inna, elimak isia to hiyyo hirro daŋ innafa ojo hiyyo to lodole lia.
18
Ellilliha illafa etiru daŋ to hirro innafa elimak heyyohok isia daŋ.
19
Ati arrasa ifa Maria higigillo hirrro innafa etiru he innafa ottunak inyie ta taji honyie.
20
Aŋaciohini heyyohok, ille etahuo ojo hidofe etihabuo Hollum to hirro innafa etiru iko niyya innafa egonyu isia, iyya nafa ero hiyyo to hosie.
22
Nafa lelaŋ holoŋitek inno hitilibo, iyya lojo hifahi no Musa, eyyani Yosefu iko Maria hiito lia hosie lodole efahak ahide Haji Imojit no Hollum to Yerusalem hesiarari inyia ta Habu.
23
Iyya nafa egioro to hotwe ho hifahi na Habu; “Durre liawa loŋeuha ille esiuni hesiara isia daŋ da Habu.”
24
Afanu hidofe isia hisio ibulucita iyya nafa ojio hiyyo to hotwe ho hifahi na Habu, “Turet illo wolo lohorik illo lodicio illo irigioho.”
25
Ihuma riŋa, owuon ifa lobo tuŋani to Yerusalem fure nohonyie Simiona. Obis ifa tuŋani ille ojo hidofe esio wan te igem. Etila ifa inyia itiliha no tajia inno hiyyo ille Israile.
26
Ojo ifa Loyiri Lolibo owuon iko inyia.
Etuhutek ifa anjilo Lolibo do honyie atta hijo, obe iso inyia oye holobe inyia egonyu Habu Yesu Kristo.
27
To nobo far ottu ifa inyia ahotwe Haji Imojit nyo eyyani ifa Loyiri inyia dia. Nafa eyyani hesiok hiito, Yesu hehumari te inyia iyya ojo imohit no hifahi.
28
Atta Simiona ŋamojok inyia ta has honyie, etahuo atta hijo,
29
“Iyyania isiara hegiamani lohoi hotopiahari bolioŋ, Habu iyya eijo iyye.
30
Egonyu honyiehite innanaŋ hetilahani lohoi,
31
lafa ediarak iyye to honyiehite inno hiyyo daŋ.
32
Ara iso inyia cialai letuhuta hilahode to halufak ojo iso lohuo lo hiyyo illohoi Israile.”
33
Omune ifa monye iko hotonye hiito atta hillilliha do hirro innafa ero te inyia.
34
Atta Simiona hijok isia atta hijo to Maria hotonye hiito, “Itira na lanyar! Eyyani iso hiito lia ŋahuye iko diote no hiyyo illo Israile aria, ojo hidofe hituhuti no lottu wuana.
35
Hidofe, ocuk iso demi Oholio nohonyie, hijo anyar asalak higigilita inna tajia.”
36
Owuon hidofe nobo hekilani dia nara fure Anna. Ara ifa inyia ŋani Fanuel to woyyo no Aser. Emaruak ifa inyia binno. Amanya ifa isia iko oliawa honyie ŋasi hattrik ija to hiyama nohosie atta oliawa honyie yei.
37
Atta inyia hira ihidak ŋasi tomwana hottohunik ha aŋwan. Odule ifa inyia manya te Ikelesia etihabuo Hollum to hiya iko to mojo ta far ho harie.
38
Ta far nyia, ottu ifa inyia to hosie atta hitira, esiara humo to Hollum. Ero inyia to hiyyo daŋ to hiram no hiito to hitila nohosie etilohini no Yerusalem.
39
Ifa esahak isia higem hirro daŋ iyya ojo hifahita inno Habu Hollum, atta isia ŋaciahari a Galilea abore gala nohosie, Nasarit.
40
Ifa obolo hiito, owuon ho golon, no wan, obolo ofioroho, owuon ifa hamehini no Hollum to honyie.
41
Olot ifa Maria ho Yosefu ŋasi daŋ a Yerusalem to hiyyom no Laŋan.
42
Nafa era ŋasi innohonyie tomon harik, ofuo ifa isia hiyyom iyya ara imohit nohosie.
43
Ifa lattohu isia holoŋitek inno hiyyom, atta isia aciahari a haŋ.
44
Ati arrasa ifa Yesu ta halu do Yerusalem ojo Maria ho Yosefu lobe loyyen. Egigilo ifa isia owuon mahu he iluluŋ nafa ohu hose, olot ifa isia nobotie. Atta isia hitiara siaha inyia to hiji ho woyyo ho morot.
45
Ifa lobe isia lorrumu inyia, atta aciahari a Yerusalem losiehari inyia dia.
46
Ta halu ho holoŋitek hunik, atta isia arrumu to hotwe he Ikelesia, leletole to hiji hetiyanak, letira to hosie ojo lefifia isia.
47
Ellilliha illafa etiru lofioroho ho hitiraŋita innohonyie.
48
Ifa ewolo Maria iko Yosefu inyia, atta isia hillilliha. Atta hotonye honyie hijo to honyie, “Hiito, nyo lihum iyye iyyohoi ania, Itira, osiaha monyo hoi ikanaŋ iyye binno.”
49
Atta inyia hijo to hosie, “Esiaha itai nayya no nyo ebe itai liyyen hijo anyar awuon nayya ta haji ho Monye hanaŋ?”
50
Ati obe ifa isia oremik hiyyen hirro inne ero inyia.
51
Nia, atta inyia aciahari daŋ he isia ahaŋ a Nasarit atta hitira to hosie. Ottunak ifa hotonye honyie hirro daŋ ta taji honyie.
52
Ati obobolori ifa Yesu to lofioroho, to wan ojo to mune nohonyie iko Hollum ho Hiyyo.