1
Eciem hiyo ariai higier hiro inafa egiemini to hiji hohoi.
2
Ilafa egonyu to honyehite te inohosie to hitieri hidofe ara ahegiamak ilo hiro ino Hollum, isia ifa elimak toohoi.
3
Olibo ta hanaŋ asiehini hiro daŋ to bisan to hitieri, hegiorohini tohoi nolobis, iye Tofilo lalanyar.
4
Awak naŋ anyar liyen iye ibisiti ino hiro dede inafa etiyana hiyo iye.
5
To holoŋitek inafa he Erode, habu lo Yudea, owon ifa lobo Fadiri efurak Sakariya, ta ŋati ba Abija. Ara ifa oŋorwo honye towoyo ha Arone, nafa ara fure nohonye Elisabeta.
6
Obis ifa isia daŋ to hosiere ho Hollum, olot obe hipali to hifahita daŋ he to hiro ino Habu.
7
Ati obe ifa isia owon he inak dure nyo oweta ifa Elisabeta, ojo hidofe isia emarwak bi no.
8
To nobo holoŋ nafa egiamari Sakariya higiemita inohonye ino Fadiri to hosiere ho Hollum to higiemi no ŋati nohonye,
9
Ata Fadirihien ejufak imohit Ata anyimu inya to hibiro moru hehutu ŋai hotojiŋak ta Haji Imojit na Habu hotosuahak atagoŋ.
10
Nafa era suaha no atagoŋ, ata iluluŋ no hiyo amojok weta ta bali.
11
Ata anjilo la Habu etilek wan to honye, lo oweta ta hani inyat no altari no atagoŋ.
12
Nafa egonyu Sakariya anjilo lia, ata baŋi hinief inya.
13
Ata anjilo hijo to honye, “Hebaŋ, Sakariya nyo etirini ifa mojo nohoi. Esik iso oŋorwo hoi Elisabeta iye onyi, ejo iye efurek inya Yoani.
14
Obolo iso hitihabwo iko mune to hoi to iluluŋ no hiyo lesiuni inya.
15
Ara iso inya etok to hosiere ha Habu. Obe iso inya amata fino, hifioŋ ino ajalaŋi he balu no logol. Man, helesiuni inya efut iso inya ho Oyiri lo Olibo.
16
Esio iso inya iluluŋ no dure ile Israile hotoyite ahalu ta Habu Hollum.
17
Olot iso inya to hosiere honye to duaran he to golon ojo Oyiri no Elija lo Hollum. Eloit iso inya tajia ino monya to dure inohosie, eloit hidofe ha masik heruhori higigilita ino hiyo ilo obis- Ehumak iso inya hiyo ta awoŋ na Habu."
18
Ata Sakariya hifi anjilo lia hijo, "Hayen iso naŋ jai hijo ara hiro inia dede? Nyo emaruak naŋ ojo hidofe oŋoruo hanaŋ emaruak no."
19
Etiraŋ ifa anjilo inya hijo, "Naya Gabriele. Aweta naya to hosiere ho Hollum lefahu naya helimahini to hoi sayye ino anyar.
20
To wolo, edua iso iye man to holoŋ nelebarari hiro huna nyo ibe iye eruk hiro inanaŋ ino oremik ta far na anyar. Ebe iso iye ero man afanini hiro inia hira dede lotubai holoŋ nohosie."
21
Etila ifa hiyo Sakariya, man elafuhori hiyo hijo nyo leliŋa inya fur to hotwai Haji Imojit netok.
22
Ifa ajiŋu inya abali, oye inya helero to hosie; ata isia agilu hijo aliew nobo sihin to hotwai Haji Imojit. Obe ifa inya oremik hiro to hosie, ta mai nia ata inya hihuto to hosie hihuta ta has.
23
Nafa otubai holoŋitek inohonye ino igiem ta haji hoomojori, acahari Sakariya ahaŋ.
24
Ta halu ho holoŋitek niya , ata oŋoruo honye Elisabeta hibuŋuta enyai helebusak Haji Imojit man yafajin miet. Ata Elisabeta hijo,
25
“Ehum Habu ta hanaŋ nalanyar, “To holoŋitek huna etuhutek mune nohonye ta hanaŋ, ata adumu iri inanaŋ ade tohosiere hohiyo.”
26
Iyania to hibuŋuta na Elisabeta yafajin ile, efahak ifa Hollum anjilo Gaburele abore gala na Nasarit nya ta fau ho Galilea,
27
to hoduoti nafa esaŋa tuŋani lara fure Yosefu. Ara ifa inya to woyo ba Davide, ojo fure no hoduoti inya ara Maria.
28
Ata ati anjilo awoŋ to honye Ata hijo, “Togolo Mariai; iye ina owak Holum no! owon Habu he hoi.”
29
Etigiama ifa Mariai bi no to sayye ino anjilo, hijo hojo hiro inia honye nyo.
30
Ejo anjilo to honye hijo, “Mariai, baŋa labaŋ, owon Hollum lo omehini iye.
31
Towolo, ebuŋuta iso iye Ata iye esiu hito, ejo iye Ata efurek inya Yesu.
32
Obolo iso inya Ata hililoŋo inya hito etok lo Hide. Habu Hollum iso eso inya ahabwue no monye honye, Davide.
33
To nia, otu iso inya hira a Habu woyo no Yokobo tulaŋ obiaŋari hisidi no lobie nohonye."
34
Ata Mariai elimak to anjilo lia hijo, “Holobe naya atirohini ho lobo hito oliawa, hafanu iso hiro inia jai?"
35
Etiraŋ ifa anjilo inya hijo, "Otu iso Oyiri lo Olibo tohoi, otu iso duaran no Hollum emuluhak iye. Ata iso iye hililoŋo hito lia lo Olibo onyi Hollum.
36
Towolo Elisabeta, nia ta haŋ hatai , eholofi ifa hido inya. Ati Iyania owuana ho hosehe no yafajin ile, emaruak ida hido inya bi no.
37
Obe nobo sihin no oremik himir Hollum."
38
Ata Mariai hijo, “Dede, ara naya hegiamani no Hollum, isiara ati hebara ta hanaŋ iya ojo hiro nohoi. Ata anjilo ebusak inya.
39
To holoŋitek niya odiote Mariai ata aruhari adoŋe no Yudea.
40
Eno inya ahotwai haji no Sakariya Ata hifony Elisabeta.
41
Nafa etiru Elisabeta hifonya na Mariya, Ata lodole lia to hosehe diote; ati efut ifa Elisabeta he Oyiri lo Olibo.
42
Ata inya hiro wuoŋ wuoŋ hijo, “To hiji ho ŋoruo daŋ obolo jaha tohoi ho hito lia etu iye esiu!
43
Nyo otu hotonye Habu ariŋari naya?
44
Ta nara etiruni naya hifonya nohoi, ata hito to hosehe hanaŋ hididiaŋa to mune.
45
Hotowuana mune ho jaha tohoi heruhoni a awoŋ sayye dede inafa efahu Habu.”
46
Ata Mariai hijo, “Etihabuo oholio nanaŋ Habu,
47
ojo oyiri nanaŋ etimuno Hollum, hetilahani hanaŋ.
48
Nyo egonyu inya fiahajo nanaŋ hegiamani. Iyania man ahosiere eliloŋo iso hilahajisien daŋ naya ahamunoni,
49
Egiem etok ta hanaŋ hiro ariai ino hitaha; ojo fure nohonye Olibo.
50
Arasa hamehini nohonye to hilahaji man to hilahaji to hiyo ilo abaŋ inya.
51
Egiem inya hiro ino ogol ta has inohonye; etisarik inya ilia ilo etidara ta tajia inohose.
52
Epihe inya henefitak to harajin afau, ata hihaf ahide ilo owon ta fau.
53
Eso inya hiro ina anyar to hiyo ilo owon ho hiŋa, ata efuhai ade hiyo habarak asai.
54
Ata inya hiluak hegiamak ilohonye hijo anyar ogilu hamehini Israile, ilohonye tulaŋ,
55
iya nafa ero inya to monye hohoi to Abramo iko hohonyok honye tulaŋ mak.”
56
Amanya ifa Mariai iko Elisabeta iya yafajin hunik, ata acahari ahaji honye.
57
Ifa ara holoŋ no hitado no Elisabeta lodole, esiu inya onyi.
58
Etiru onyihari he hilahaŋ honye hijo amehini Habu inya ata isia mune iko inya.
59
Nia, to hitahotohunihi no holoŋ, afanu isia higot hito lodole; ata isia wahan efurek inya hata ra Sakariya, fure no monye honye.
60
Ata ati hotonye honye hitiraŋ hijo, “Obe, eliloŋo iso inya hijo Yoani.”
61
Ata isia hijo to honye, “Obe lobo to hiji ho woyo hatai le efurek hiyo fure nia.”
62
Ata isia elimak monye honye hotorumu nari fure awak inya efurek.
63
Ata inya hifia nobo atabok higieri hegiorohini to hide honye. “Fure nohonye Yoani. “Ojo isia daŋ ata hililiha bi no.
64
Kokuak ata hutuk nohonye ŋa ojo hidofe ŋadief ebusahini, ata inya hitiara hiro iko hitabuo Hollum.
65
Ata baŋi awoŋ too hiyo daŋ Ilafa amanya aŋati hosie, elur isia ho hiro daŋ inafa edoŋ erarari daŋ ta masik ho fau ino Yudea.
66
Hiyo Ilafa daŋ etiru isia otunek isia tataja hosie hijo, "otu iso lodole lie hira anyo?" Ata isia aheiru hijo owon hafa hani na Habu he inya.
67
67Efut ifa monye honye Sakariya he Oyiri Olibo, ata inya hiro hikili ina hijo,
68
“Hetahue Habu Hollum le Israile, nyo awoŋ inya hitiluak ata inya esahak hetiluahini hiyo ilohonye.
69
Esio inya tohoi hetilahani nologol tahaŋ ba hegiamani lohonye Davide,
70
Iya ero Hollum to hutuk no hekila ilohonye ifa beren.
71
Otiorok inya hesiarari tohoi etilohini tara miorok ilo hoi, iko tara hani ho liya oliwari iyohoi.
72
Egiem iso inya ina hetuhutahini hamehini to monye hohoi, iko hagiluni himwara no olibo.
73
Himwara nya ara atanyak na has nafa ero inya ta Abramo hohonyi hohoi.
74
Emak inya hilifo na has anyar ohek iyohoi asai to has ino miorok ilo hoi iko hebusahini iyohoi hegiamari to honye obe baŋi,
75
To libe iko to bisan to hosiere honye to holoŋitek inohoi daŋ.
76
Hidonyi iye onyi hanaŋ, eliloŋo iso iye ahekilani lo lia to hitidara nalagalik anyar ewu iso iye to hosiere na Habu hatiorok hiyo ta hawoŋ nohonye,
77
Anyar ewak hiyo hotoyen hijo etilahini iso isia to hebusahini no hiyata inohosie.
78
Hollum lohoi iso ebusak iyohoi to hamehini nohonye, ta hamehini ina, hetilahani ile ara iya holoŋ no motie iso lo otu te ido haluahari iyohoi.
79
Opipiak iso to hiyo ile etole te idumele iko ohidis no ye; egiem inya nia heriria hejek inohoi to hikoi he imwor.”
80
Nia ata hito bolo ata awoŋ golon to Oyiri. Amanya inya totem man toholoŋitek inafa etiarari inya aliew to hiji ho hiyo ilo Israile.