1
Iyania, to holoŋitek inafa niya, awoŋ hiro tara Kesare Agusto ta nafa efahini inya hifahi no hitigioro no fureta ino hiyo ila amanya ta fau ho Roma.
2
Ara ifa ina hitieri no higioro no fureta nafa owanari Kurino a mamur lo Siria.
3
Ata hiyo daŋ ta masik inohose hefie aborejin ino gala inohose hetigiorohini fureta inohosie.
4
Elaŋ Yosefu to bore gala no Nasarit inya ta Galilea ata hewat abore gala no Yudea no Bettelehem, nafa oyen hiyo hijo doŋe no Davide, nyo otu ifa inya tahaŋ iko to woyo no Davide.
5
Owu ifa inya adia hetigiorohini iko Maria nafa esaŋa inya ojo owodi.
6
Nia nafa halarasa isia dia, awoŋ holoŋ hesiori lodole lohonye.
7
Ata inya esiu hito oliawa lodole oŋieu, ata abubunak boŋo towan honye. Ata inya efiyak hito to hotwai ho togoli no etimatari hiyo hanyahanya, nyo obe ifa mai to hosie ta haji na hata monok.
8
Ta mai inya owon ifa ilamuk heyohok ilo kioro Ilafa amanya oriŋa kioro inohosie ta tari.
9
Kwak, ata anjilo la Habu hidoŋ to hosie, ojo ohuo na Habu no opipiak ata elurok daŋ isia, ata isia baŋi bi no.
10
Ata anjilo hijo to hosie, “Ibaŋa abaŋ, nyo eyani naya sayye ino olibo ino eyani mune netok to hiyo daŋ.
11
Ena esiuni hetilahani ta hatai to bore gala no Davide! Ara inya Kristo Habu!
12
Ara ina hituhuti nelesio iso ta hatai, erumu iso itai lodole lobubuna to boŋojin lo ofer to togoli hitimati na hanyahanya."
13
Kokwak owon ifa iluluŋ no oseŋer ile ido ile etihabuo Hollum ata hijo,
14
“Hotohuo Hollum lia to hide, hotowana himwara ta fau to hiji ho hiyo ilo omuno inya.”
15
Awoŋ holoŋ nafa ofuye anjilohien tara hosie ahide ido, ata heyohok hiro to wati inohosie, “Efi Iyania a Bettelehem, anyar efo egonyu sihin nara eba nelehumak Habu hoteyen iyohoi.”
16
Aruhari isia adia ata arumu Maria, Yosefu ojo hito, ofer to togoli imatit na hanyahanya.
17
Ifa egonyu isia ina, elimak isia to hiyo hiro daŋ inafa ojo hiyo to lodole lia.
18
Eliliha Ilafa etiru daŋ to hiro inafa elimak heyohok isia daŋ.
19
Ati arasa ifa Maria higigilo hiro inafa etiru iko inafa otunak inya ta taji honye.
20
Acohini heyohok, etahabuori ojo etihabuo Hollum to hiro inafa etiru iko niya inafa egonyu isia, iya nafa ero hiyo to hosie.
21
Nafa era far hitahotohunihi no holoŋ, nafa oŋoto inya, ata efurek inya Yesu, fure nafa esio anjilo holobe inya etiwodihini to hosehe.
22
Nafa elaŋ holoŋitek ino hitilibo, iya ojo hifahi no Muse, eyani Yosefu iko Maria hito lia hosie lodole efahak ahide Haji Imojit no Hollum to Yerusalem hesiarari inya ta Habu.
23
Iya nafa egioro to hotwai ho hifahi na Habu; “Dure liawa loŋeuha ilo esiuni hesiara isia daŋ ta Habu.”
24
Afanu isia hisio hibulucita iya nafa ojo hiyo to hotwai ho hifahi na Habu, “Turet ilo wolo ohorik ilo lodicio ilo irigioho.”
25
Ihuma riŋa, owon ifa lobo tuŋani to Yerusalem fure nohonye Simiona. Obis ifa tuŋani ile ojo esio wan te igiem. Etila ifa inya hitiliha no tajia ino hiyo ilo Israile. Ojo ifa Oyiri Olibo owon he inya.
26
Etuhutek ifa anjilo Olibo do honye ata hijo, obe iso inya oye holobe inya egonyu Habu Yesu Kristo.
27
To nobo far otu ifa inya ahotwai Haji Imojit nyo eyani ifa Oyiri inya adia. Nafa eyani hesiok hito, Yesu hehumari to inya iya ojo imohit no hifahi.
28
Ata Simiona amojok inya ta has honye, etahuo ata hijo,
29
“Iyania isiara hegiamani lohoi hotopiahari bolioŋ, Habu iya ejo iye.
30
Egonyu honyehite inanaŋ hetilahani lohoi,
31
lafa etiorok iye to honyehite ino hiyo daŋ.
32
Ara iso inya calai letuhuta hilahode to halufak ojo iso ohuo lo hiyo ilohoi Israile.”
33
Omune ifa monye iko hotonye hito ata hililiha to hiro inafa ero te inya.
34
Ata Simiona hijok isia ata hijo to Maria hotonye hito, “Itira na lanyar! Eyani iso hito lia hahuye iko diote no hiyo ilo Israile ariai, ojo hituhuti no hebuarari.
35
hijo anyar asalak higigilita ina tajia. Ocuk iso demi oholio nohoi hidofe.”
36
Owuon nobo hekilani dia nara fure Anna. Ara ifa inya ŋani Fanuel to woyo no Aser. Emaruak ifa inya bi no. Amanya ifa isia he oliawa honye ŋasi hatarik tahalu ho hiyama nohosie ata oliawa honye yei.
37
Ata inya hira ihidak ŋasi tomwana hottohunik ha aŋwan. Odule ifa inya manya to kelesia etihabuo Hollum to hiya iko to mojo ta far iko harie.
38
Ta far nya, otu ifa inya to hosie ata hitira, esiara humo to Hollum. Ero inya to hiyo daŋ to hiram no hito to hitila nohosie etilohini no Yerusalem.
39
Ifa esahak isia higiem hiro daŋ iya ojo hifahita ino Habu, ata isia acahari a Galilea abore gala nohosie, Nasarit.
40
Ifa obolo hito, owon iko golon, no wan, obolo ofioroho, owon ifa hamehini no Hollum to honye.
41
Olot ifa Maria iko Yosefu ŋasi daŋ a Yerusalem to hiyom no Laŋan.
42
Nafa era ŋasi inohonye tomon harik, ofuo ifa isia hiyom iya ara imohit nohosie.
43
Ifa atohu isia holoŋitek ino hiyom, ata isia acahari a haŋ. Ati arasa ifa Yesu ta halu to Yerusalem ojo Maria iko Yosefu obe oyen.
44
Egigilo ifa isia hijo owon mahu he iluluŋ nafa olot ikohose, olot ifa isia nobotie. Ata isia hitiara siaha inya to hiji ho woyo iko morot.
45
Ifa enyai isia orumu inya, ata acahari a Yerusalem osiehari inya adia.
46
Ta halu ho holoŋitek hunik, ata isia arumu to hotwai ho kelesia, eletole to hiji he he hejufutak, etira to hosie ojo efifia isia.
47
Eliliha Ilafa etiru hitira nohonye ofioroho iko hitiraŋita inohonye.
48
Ifa ewolo Mariai he Yosefu inya, ata isia hililiha. ata hotonye honye hijo to honye, “Hito, nyo lihum iye iyohoi ania, Itira, osiaha monyo hoi ikanaŋ iye bi no.”
49
Ata inya hijo to hosie, “Esiaha itai naya nyo? ebe itai eyen hijo anyar awuon naya ta haji ho Monye hanaŋ?”
50
Ati obe ifa isia oremik hiyen hiro ino ero inya.
51
Nia, ata inya acahari daŋ ikosie ahaŋ a Nasarit ata hitira to hosie. Otunak ifa hotonye honye hiro daŋ ta taji honye.
52
Ati obobolori ifa Yesu to hilefere, to wan ojo wahan no Hollum ofonihini to honye ho Hollum iko Hiyo.