¹ Nafa eris iyohoi bolioŋ eyen iyohoi hijo ara otifor nya afau no Malta, ² Omehini ifa hiyo ilo Malta te iyohoi bino, obe ifa isia etuhutek te iyohoi himorot iko nyalami, ati etuwulek ifa isia he iyohoi hima ata omoju iyohoi daŋ tomune, nyo odule ifa hai san ojo elik noo. ³ Paulo adumu inak hoyek ata enahak to hima, ati ata nobo ipakidaŋ ajiŋu ade to hima ata elulurohini ta hani ha Paulo. ⁴ Nafa egonyu hiyo ilo doŋe nya munu oyiha ta hani ha Paulo, ata isia hiro ta wati inohosie hijo, "Dede ara tuŋani ile hattohoni lo hiyo lafa erwat ta hari nettok, ati obe okiko oremik ebusak inya hamanyari." ⁵ Ati elilihak Paulo munu nia ahatwai ho hima ojo hani nohonye obe owon honobo diahai. ⁶ Etila ifa hiyo hijo eno iso hani nohonye ayejak kuya oye iso inya kwak. Ati nafa oriŋa isia inya hijo obe inak hiro oremik hidoŋ to honye, ata isia hiloit hosi inohosie ata isia efurek inya ajok lohosie. ⁷ Owuon ifa mata inafa eliaha ta mana nafa ara na habu la mai nya, ara ifa fure nohonye Pubilio. Eliloŋu ifa inyeja iyohoi ahaji honye ata hisio iyohoi etidaha iyohoi holoŋitek hunik. ⁸ Ati oŋwai ifa monye Pubilio bino ho nohon no wan ojo hidofe oworot. Ifa eno Paulo to honye ata mojo ojo hidofe atanyak has inohonye te inya ata hitilib inya. ⁹ Ifa egonyu hiyo niya hiro daŋ, ata hiyo ino oŋwai daŋ afanu to honye ojo inya ata hitilib isia. ¹⁰ Esio isia hisiorita ariaii to hoi ojo hidofe efie iyohoi ababur, ojo isia ata adumu hiro ino ewak iyohoi ata efiyak ahatwai ha babur. ¹¹ Ta halu ho holoŋitek hunik, ata iyohoi efi ta babur no hiyo iloAlesandro, nafa oweta esok hamaiyu to otifor, ara babur na Alesandro owon iko rijori ino egioro hijo " johin Ituret" iya nafa ohut inyi. ¹² Ifa eba iyohoi ta fau ho Sirako, ata iyohoi rasai dia holoŋitek hunik. ¹³ Nafa ebarari iyohoi to doŋe no Rejuma ata oyami hinyak awoŋ to wor. Ta halu ho holoŋitek arik ata iyohoi hiba to doŋe no Puteli. ¹⁴ Arumu iyohoi dia ilak halasira ata hitole iko isia holoŋitek hatarik. Ta halu ata iyohoi hiba to Roma. ¹⁵ Etiru halasira lia ata afanu araŋu iyohoi ata eyari iyohoi amai no enyaŋari na Apio ojo hidofe to kulubi hunik. Nafa ewolo Paulo isia, ata hisio humo to Hollum ojo etigol taji nohonye. ¹⁶ Nafa eba iyohoi to Roma, ata Paulo hitole hamai iko lo oseŋer lafa eriria inya. ¹⁷ Ta halu ho holoŋitek hunik Eliloŋo Paulo etaha ilohiyo iloYudea ilafa owuon to hiji hosie. Ata inya hijo to hosie, "Halasira, abe ifa naya egiem inak hiro ino oru to hiyo illohoi, kuya imohiti ino hohonyok hohoi epal, ati efitak isia naya to kijan no Yerusalem ata hisio naya to hiyo ilo Roma. ¹⁸ Ewuaha isia hiram nanaŋ ojo hidofe awak ahek naya nyo obe ifa inak hiro ino osiru hisio naya ye. ¹⁹ Ati ebo ifa Yudea ebusak naya, ata naya hijulum ahosiere ho Kesare nyo abe naya awak arosok hiyo iloYudea hiro. ²⁰ Ati Eliloŋo naya itai hijo anyar eyen itai hijo efitak isia naya to hiram no heyik no hiyo ile Isarail. ²¹ Ata isia hijo to honye, "Ebe iyohoi omoju nobo waraga tara Yudea to hiram to nohoi, ojo halasira hohoi ilafa afanu eni obe ero inak hiro ino oru teiye. ²² Ati ewak iyohoi etiru tara hosie hiram nia nyo etiru iyohoi tara hiyo daŋ hijo oru hiyo ile ojo hiyo heruhok iyania." ²³ Nafa emak isia holoŋ to honye, ata isia afanu ahaji ha Paulo ho hiyo daŋ ariaii. Ata inya hitiara hitito isia to hiram no obie no Hollum to motie man ifa tari etuhutari isia hiram no Yesu to hifahita ino Muse iko ino hekilak. ²⁴ Ati eruk ifa ilakhiro inohonye ojo ilakebo. ²⁵ Holofwo isia ata isia aŋalafari to wati inohosie to hiro na Paulo to hosie ino ojo, "Dede ero ifa Oyiri lo Olibo hiro ino obis to buk no hayitani sayye Isaiah iya ta nafa erarari inya to hohonyiok ilahatai hijo: ²⁶ "Ifeti to hiyo ata itai hijo, "Etiru iso itai dede ati ebe itai eremik hiyen, ewolo iso itai dede ati ebe iso itai egonyu. ²⁷ Nyo odua tajia ino hiyo hulo ati otuho yohe inohosie, emutak isia honyehite inohosie hijo hotobiaŋa isia egonyu to honyehite te inohosie ojo hidofe oyen ta tajia te inohosie, ata yite, ajo naya ata hitilibo isia."' ²⁸ Iyania, itiyen hijo efahak Hollum hetiluahini nohonye ta paganihien, nyo ofwo iso isia hitira." ²⁹ Ifa ejo inya hiro inia daŋ, ata hiyo iloJudei efie ade. Obolo ifa rija to hosie bino. ³⁰ Amanya ifa Paulo ŋasi arik ta haji nohonye hamai ata ariehu hiyo daŋ hulo afanu to honye. ³¹ Etito ifa inya to hiŋere to hosie daŋ hawoŋ no obie no Hollum ojo hidofe etiyana hiro ino Habu Yesu Kristo, nyo obe ifa lobo tuŋani oremik hitik.