1
Ifa ero hiyo hijo anyar efu iyohoi ta babur man Itali, ata isia hisio Paulo iko hiyo ilobabusi to lobo curukal la ara fure nohonye Julio tara kal nobo hamai.
2
Ata iyohoi arrek babur to Adramitio, nafa awak eno to iko hari no Asia. Ata iyohoi efie a hari nya. Ata Aristako to Tesalonika no Masedonia heno iko hoi.
3
Ifa motie nohonye, ata iyohoi weta to bore gala no Sidona, ta mai nafa ehumari Julio to Paulo na anyar man ebusak inya heno to oriahat ilohonye hamojini iluahiti inohonye.
4
Teya ata iyohoi egurori iya eyari etok lo Sipro iyohoi, onyik iko fohor nyo efiriwa ifa oyami te iyohoi.
5
Ata iyohoi hinyak hilaŋ hari no onyik aŋati to doŋe no Silisia iko Pamfilia, ata weta to kai to Myra, bore gala no Lysia.
6
Teya ata curukal lia arumu nobo babur otu to Alesandariai no owu man Itali. Ata inya emak iyohoi dia.
7
Ifa egurori iyohoi kai kai to holoŋitek ariaii man eba iyohoi to golon aŋati to Snido, enyie oyami hebusak iyohoi hafuye adia, ata iyohoi egurori aŋati to iko Krit, no onyik iko Salmone.
8
Egurori ifa iyohoi to golon to otifor na hari, man eba iyohoi to nobo mai ne efurek hiyo hijo Ido no olibo, ne eliaha iko Lasea.
9
Ehum ifa iyohoi eyari holoŋitek ariaii bino, ellaŋ hidofe hiyom no hiyo ino Judei, orun ifa bino to loton to hifioŋ. Ata Paulo hisor isia,
10
hijo, "Huloŋ, awolo naya hijo babur ina ewak iyohoi arrek iyania, obore iso eriafai iko ye dia, obe ara to hiro ina ahafita babur kuya hidofe ta babur, ati wuaran nohoi.''
11
Atati curukal lia hitira to etok lohonye iko to monye lo babur bino agalik hiro inafa ero Paulo.
12
Obe ifa olibo ha awuanari to oger na hari nya, nyo era ifa holoŋitek ino hirobi, obis ifa to hiyo ila awak loton hefie Teya, ewak ifa iyohoi hiba to bore gala no Fonisia hijo anyar eyiri iyohoi dokai Teya. Owuon ifa Fonisia to oger na hari no Krit, owon ifa inya to iko hide no hiduoŋi no holoŋ.
13
Ifa etiara oyami no ŋolon hutan filo filo filo, ata halotok lia hijo owana hiro inafa ewak isia. Man ebusak isia bileta to hifioŋ ata isia efie a Krit no onyik iko otifor.
14
Ati ta halu kai, odyoto oyami no obolo bino no ogol, no eliloŋo isia hijo Herikan, ata hitiara hutan to hide.
15
Nafa ekolok oyami babur man obe enyak eno ahosiere, ata iyohoi ebusak oyami heno man eyari iyohoi alamarai.
16
Ata iyohoi efie aŋati ho nobo fau letiŋ ne eliloŋo hiyo Kauda, to hitigiama ata iyohoi ettalini ade.
17
Nafa ehaf isia boŋo ne etuluaha togoli ahide, ata isia hifit wan ino babur hijo hotobiaŋa oyami oguas babur. Abaŋ ifa isia hijo efi isia huruat man a Sirtis, ata isia ebusak bileta no babur ahatwai hari man owu babur bolioŋ.
18
Ehum ifa oyami no oru hihut iyohoi, ifa motie nohonye, ata iyohoi hitiara enyahak hiro ahatwai babur.
19
To hitahunihi no holoŋ, ata hayirok ilobabur ebire higiemita inohosie ta has inohosie.
20
Ifa enyie holoŋ iko haher he edia holoŋitek ariaii, ojo oyami no obolo odule hutan te iyohoi, ebusak ifa iyohoi heyik hijo ewuar iso iyohoi.
21
Ifa owana isia daŋ holoŋitek ariaii obe anya ilak hiro, ata Paulo diote ahide to hiji ho hegiamak ilo babur ata hijo, "Itai hiyo huloŋ, anyar etira itai ta nanaŋ, nobe itai efanu to Krit, hijo hotobiaŋa itai erumu eriafai ina iko ye.
22
Iyania, esiŋa naya itai hijo anyar egol itai, obe iso lobo lahatai lo oye, ati oru iso babur inna.
23
Iŋole tari, oweta anjilo lo Hollum ile ara naya lohosie, ajo etihabuo aŋati hanaŋ
24
ata hijo, "Baŋa abaŋ, Paulo. Anyar ewetaiye to hosiere ho Kesari, ataiye hiwolo, Hollum ta nyalami nohonye esio tohoi hiyo ilia elotiye daŋ he isia.'
25
Ati iyania, itigolo, itai liawa! Eruk naya to Hollum hijo ofu iso wuana iya elimahini ifa ta nanaŋ.
26
Ati efu iso arumu hitigiama to nobo otifor.''
27
Ifa era hari inafa niya tomon ha aŋwan, ta nafa owutari oyami iyohoi hikoi nya to hari na Adriatiko, ifa era tiŋ na harie ata hegiamak ilobabur higigilo hijo eliaha mahu isia to nobo fau.
28
Ata isia adumu hitirita inohosie, ata isia arumu hijo hara hada iwudo na hari hinyahita tomwana arik, ta halu ata isia hiciem, enyak ofe arumu ho oudo bino man hinyahita tomon ho miet.
29
Abaŋ ifa isia hijo efu iyohoi ahuyik to moru ariaii, ata isia etidek bileta aŋwan ahatwai hari anyar enief, ata isia mojo hijo anyar Otu motie kokwak.
30
Ata hegiama liya siaha nobo hikoi hijo ewak isia ebusak babur nya man ebusak hituluahita ina ahafita babur ahatwai hari, ata wahan hinyab hijo ewak isia ebirok bileta ahatwai.
31
Atati Paulo hijo to curukal iko to oseŋer, "Lo odule hiyo hulo ta babur, obe iso itai ewuar.''
32
Ata oseŋer huŋut hofi ino babur ata ebusak inya hotorutari ahosiere.
33
Nafa awoŋ motie, ata Paulo elimak isia hijo heyari nobo ŋiria daŋ he isia. Ata inya hijo, "Era hitatomoni ha aŋwan ena iyania, ino etilari itai ejo hidofe ebe edaha ŋiria; holobe itai enya nobo sihin.
34
Awak naya anyar ehor itai lobo ŋiria olibo nia ta hatai ha amanyari. Obe iso lobo lahatai oremik etilitek hofiti nohonye to hoo honye.''
35
Ifa ejo inya ania, ata inya adumu imune ata hisio humo to Hollum to hosiere hosie bi daŋ. Ata inya hibun imune ata hitiara daha.
36
Ogolon ifa isia wati daŋ ta mai man odumu imune ata daha.
37
Era ifa iyohoi daŋ 276 hiyo to hotwe babur.
38
Ifa enya isia man ofoŋi, etibwot ifa isia babur to hibiro nohosie geme ahatwai hari.
39
Ifa era far, obe ifa isia oremik aheru fau, ati egonyu ifa isia iwetit na baburi iko otifor nohonye, man ero isia ta wati inohosie hijo heyari iso babur adia.
40
Oŋut ifa isia bileta ino babur ata ebusak isia to hotwe hari. ojo hidofe oho hofi ata ebusak isia to oyyami; ata isia efie otifor. Ati afanu isia ta mai nobo ne eboŋohini hifoliaha no hifioŋ arik, ata babur hinyior amai no ogol.
41
Ata raŋ no babur hidiho dia man obe enyak heno, man ata horuoŋ no babur wuro to hifiriwa no oyami iko hifoliaha no hifioŋ.
42
Ara ifa higigilo no oseŋer hijo ewak isia attohe hiyo ile efita, hijo hotobiaŋa lobo lohosie eruat ade.
43
Ati awak ifa curukal etuluahu Paulo, ata inya hituwet higigilo nohosie; ata inya elimak ilafa oremik hirriŋ anyar olluai to hosiere anyar esurok ta fau.
44
Isiara ilakhejufari inya, ilakto bauhien ojo ilakto hiro ino babur. To hikoi nia ata iyohoi daŋ etuluahini ejo hidofe ellik ta fau bolioŋ.