¹ Ijara laati daŋ ifahai okuma hosi nyo obeŋ obo iko adwaran arari al isyo Hollum jihonyi bwo Hollum ihanak okumahyen daŋ. ² Tania lya al iha’to efaha okuma iha inyi Hollum. Bwo hul ihari’to, ifwotuni adi abahyo. ³ Nyo obeŋi okuma itabaŋye aati hul ihanie’to on oyyu ati itabaŋye isi aati hul ihanie’to on orroho. Ibaŋata tai okuma? Ihaniete on oyyu bwo irumana adi itai amuno hosi. ⁴ Nyo arai isi apiti hulo Hollum ihaniere jihatai on oyyu. Ati al ihaniete tai on orroho, abaŋata, nyo obeŋ adwaran hosi ara asai, nyo isi apiti hulo Hollum inienuniere leyyani. ⁵ Tania oŋida dwo aati daŋ ifahai isi obyaŋara irisari abahyo hama ati itilihyere atajya. ⁶ Te eram ana oŋida dwo itai idumati amusuru nyo arai okuma ahegyamak hulo Hollum igyamari egyama hosi. ⁷ Isyatta jyo okuma erre hun osiruni jihosi. Isyatta amusuru jyo lamojok musuru. Abaŋata eleittaha hulo okuma bwo fe itahabuyete isi. ⁸ Herata awati horos hulo omuk aati ati omunoti illarak hatai, nyo lya ol omuno’to otto lonyihari honyi itasiru inyi efahi. ⁹ Nyo ojori efahita, “Hehaniete erre somon, hettohoro, hehoholyete, hewahata asaŋ huno obo,” kuyya owoni omuk efahita ottubanie isi jyo efahi ana ojo, “Omunoti hutto lonyihari hatai ihwa ahwattek hatai.” ¹⁰ Obeŋ atulo ol omuno hutto lonyihari honyi ihanio on orroho jihosi, tania itasiru amuno efahita. ¹¹ Ihwa imijana tai ilyahai oŋitek attuba, tania ohenyuna to jotori, nyo ilyaha attuna ono Hobu agalik ninya heruk hohoi. ¹² Atuhuno arwe ilyaha ataŋatye motye. Hettaŋara addi egyamita huno edumele, bwo fe heduhuna erremiti huno afaŋan. ¹³ Hadahati on oyyu ihwa laati hulo afaŋan. Hedahati te ecaforo iko ta aruma. Hedahati te ewahiti huno ahwattek iko erre somon, kuyya bu ta aŋalafa iko ahaini. ¹⁴ Ati iduhuna erremiti huno Hobu Yesu Kristo bwo fe hesyata ahwattek hatai obo ekoi ihaniere ewahiti hosi.