¹ Ifwotuna atulo ol omuta neruk honyi ati obyaŋara te etarisa. ² Igigilo obo jo oremik inyi ŋiyo erre daŋ, ati lya ol omuta neruk honyi oŋiyo ajasi hama. ³ Helaha ol oŋiyo’to omyana ol obeŋ’to oŋiyo, bwo fe helaha ol obeŋ’to oŋiyo oŋot ol oŋiyo’to, nyo ifwotu Hollum inyi. ⁴ Ŋai iye al iremik’to ŋot egyamani olo obo? Ara eram ono eleittok honyi iŋocere inyi. Itadetuni adi inyi nyo Hobu oremik itadet inyi. ⁵ Owoni omuk hul itadwarai oloŋ abotye bwo omuk hul itadwarai oŋitek daŋ. Ijara aati daŋ oŋoti ihwa obisi jihosi. ⁶ Alya al itadwara’to oloŋ abotye ihanio inyi itahabuyere Hobu; bwo lya ol oŋiyo’to erre daŋ oŋiyo inyi itahabuyere Hobu ette isyo ahumo jyo Hollum. Alya al iha’to obo aŋiyo ihanio inyi itahabuyere Hobu ette isyo ahumo jyo Hollum. ⁷ Nyo obeŋ obo amanya inyi hama, bwo obeŋ obo oye inyi hama. ⁸ Nyo hesu hohoi esu hohoi to Hobu bwo al eye hohoi eye hohoi to Hobu. Tania al esu hohoi, dwadi bu eye, era hohoi ahulo Hobu. ⁹ Nyo oye Kristo bwo inyyak ibuhuna, te eram ana oŋida inyi ara a Hobu olo eswok iko ayak. ¹⁰ Nyo iŋot iye illa hoi? Bwo fe nyo imyana iye illa hoi? Nyo ewotya adi hohoi daŋ ilokiko ono Hollum. ¹¹ Ihwa igyoroni jo, “Ojo Hobu, Ahode origoŋi adi laati daŋ ihosyere hoŋ. Bwo itahabuye adi isi daŋ jo, ani Hollum.” ¹² Tania ewotya adi hohoi daŋ ihosyere Hollum ikyanari arami hohoi. ¹³ Tania helaha hohoi eŋot obo ati ihaniete ihwania, oŋida obo obeŋ itafoyoŋyo illanyi itipalyere inyi liyyata. ¹⁴ Nyo amijak ni ahode to Hobu Yesu, jo obeŋ obo ariŋ ta ahwan honyi odwa ati jyo lya al igigilo’to jo odwa inyi, odwa jihonyi ahode. ¹⁵ Ati kuyya itajiriŋ iye illa hoi ta aŋiyo hoi ibeŋ iye idaha ta amuno. Helaha ariŋ an iŋiyo iye itarroho obo atulo nyo oye nya Kristo tenyi. ¹⁶ Hesyo obo ekoi jyo laati ikyanari on orroho ta ayiji ehanita hoi. ¹⁷ Nyo obeŋ olobye ono Hollum ara ta aŋiyo kuyya ta amata ati ara ta alibori iko nelik taji bwo amuno to Oloyiri ol Olibo. ¹⁸ Alya al igyama’to to Kristo ihwa ania itamuno inyi Hollum bwo fe omunoi laati inyi. ¹⁹ Tania hejifatyete erre hun iyaŋunie’to nelik taji iko hun itaboloruni’to illarak. ²⁰ Hetarrohojata egyama ono Hollum ta aŋiyo asai. Oyiji aŋiyo daŋ ati orroho bebe jyo lya al itipalyo’to aati te erre hun oŋiyo inyi. ²¹ Oyyu bebe ibyaŋari honyari eriŋo, ibyaŋari matari abalu kuyya ihaniere obo ariŋ an itipal illa hoi. ²² Ijara egigilo hoi te eram ana hatawana ihiji hoi iko Hollum. Hotomunoi lya ol obeŋ’to ikuyya ta ahwan honyi te erre hun awak inyi ihanio. ²³ Ati oŋot adi Hollum lya al ikuyya’to ta aŋiyo honyi nyo obeŋi ehanita honyi arai ta neruk. Nyo ariŋ on obeŋ’to ottu to hiruk ara eyyau.