¹ Arai nekyanita huna ahode jo, atulo al awak’to rahan eleittok klesya awak inyi egyama on oyyu. ² Tania oŋida eleittok klesya adaha ta abyaŋan ipali, oŋida owon inyi iko aŋotte abotye hama, oŋida inyi ara aherrirryani wahiti hutto hwan honyi, ahegigiloni ol obis, ahadahani ol obeŋ adaha asai asai, ahalwahani tamonok, bwo fe ahettiyanani ol oyyu. ³ Oŋida inyi ara atulo ol obeŋ’to oruma ta abalu, ol obeŋ’to abahyo laati ati anyalam inyi. Oŋida inyi obeŋ aŋalafai iko obo, bwo fe obeŋ igigilo ta agurusi. ⁴ Oŋida inyi irrirrya ahaŋ honyi on oyyu, bwo fe owon iko aduri hul oniŋye inyi ta abaŋi. ⁵ Nyo atulo ol obeŋ’to oremik irrirrya ahaŋ honyi, irrirrya adi inyi eklesya ono Hollum aŋai? ⁶ Oŋida inyi obeŋ ara atulo al hetek’to iruk, ŋadi inyi itadara bwo okwaharo liŋoco inya oŋocere Hollum etisyahani. ⁷ Bwo fe oŋida laati hutto let ikyanai on oyyu ta afure honyi, ŋadi emoriti itakwahari inyi ilofidik hetisyahani. ⁸ Ihwania oŋida egyamak klesya itoŋoi awati hul obiji hwattek, hotobyaŋahi owoni iko aŋadyefa arrihai, hotobyaŋahi amatai abalu bebe, bwo hotobyaŋahi igigiloi ta agurusi. ⁹ Bwo fe oŋida isi inefuni neruk an idimani itajya hosi hun olibori. ¹⁰ Oŋida okemye hulya ahosyere, bwo ihalu ijara isi igyamai ihwa egyamak klesya, kuyya obeŋi onyurani obo epali. ¹¹ Oŋida aŋorwo bwo fe itoŋoi awati hun obiji hwattek, hotobyaŋahi itisyahai, heterrirryahi ewahiti hutto hwattek hosi bwo fe hetehaniehe erre daŋ hun oyiji. ¹² Ijara egyamani klesya owon iko aŋotte abotye, heterrirryai aduri honyi iko ahaŋ honyi on oyyu. ¹³ Nyo laati hul ihanie’to egyama ono egyamak klesya on oyyu onyurani adi isi etahabuyo iko eŋere ta neruk on owon’to jyo Yesu Kristo. ¹⁴ Egyoro ni erre huna jihoi ati eyihi ni ifanyari jihoi ihalu kai. ¹⁵ Al elliŋya ni imijak adi iye oŋida laati igyamai aŋai ihiji wati Hollum hul arai’to eklesya Hollum leswoni. Ara eklesya ania attunani iko etamijani ono nelahode. ¹⁶ Bwo ahode obolo bebe eram ono amijana Hollum ninya idimani. Olyeo nya Kristo ta ahwan tulo, Itahutak Oloyiri ayiji honyi, Igonyuni anjelohyen inyi, Ittiyenie aati eram honyi ihiji paganohyen, Iruhi aati hutta fau eram honyi, Bwo ifwotuni inyi idou ta akwatan.