¹ Ahosyere elolyahi ni jihatai jo oŋida imojoti, ifiyete, ogyatati, bwo isyatta ahumo jyo Hollum ta laati daŋ. ² Omojoti to hobwok iko eleittaha daŋ, jo oŋida hohoi emanya ta abyaŋan’rem bwo ta nelik tajya, ta amijana Hollum, iko ta abisan daŋ. ³ Oyyu amojo ihwa ana bebe, nyo itamuno inyi Hollum Etalahani hohoi, ⁴ al awak’to laati daŋ italahunie bwo fe imijaniere nelahode. ⁵ Nyo owon Hollum abotye bwo fe etimwarani abotye ihiji Hollum iko aati, atulo alya inyi Yesu Kristo. ⁶ Inyi alya al isyo ahwan honyi ta aduma ta laati daŋ. Oleyo nya etamijani ania to oloŋ on osiru’to. ⁷ Te eram ana ihanani ani ahettiyanani iko alefahata ittiyeniere paganohyen ta neruk iko nelahode. Ekyana ni nelahode, abeŋ ni agesem. ⁸ Tania awak ni alyawa akafatye ahas hun olibori ta amojo imasik daŋ, ta abyaŋan ijorya iko ta abyaŋan itarisa. ⁹ Oŋida bwo fe aŋorwo iyyafatye aboŋojin hun oyiji bwo itoŋoi dee te errirriyo hwattek, obyaŋara ta ayyeo hofir, kuyya aŋata ta ayyel, kuyya onoroi hun obwori’to, ara dwo bu aboŋojin hun ogoli te enyyaŋa. ¹⁰ Ati oŋida isi ihanie egyamita hun oyiji, nyo obis ana jyo aŋorwo hun ojori ebaŋ isi Hollum. ¹¹ Ijara aŋotte itaniŋu ettiyenita ta anyalami iko ta aniŋyo. ¹² Abeŋ ni awak aŋotte ittiyenio ara dwo bu irari eneittok ono alle, ati oyyu kuyya itoŋo inyi dee. ¹³ Nyo oyyeuni nya Adam ahosyere, bwo ihalu Eva. ¹⁴ Bwo fe obeŋi nya inyobye Adam, ati inyobye nya aŋotte bwo okwahino inyi iyyau. ¹⁵ Ati italahuno aŋotte te esiuna ono eito, al itoŋo inyi ta neruk iko namuno bwo alibori iko errirriyo hwan.