¹ To far kiteri lo sabit, kiwanyi berien, odumu ngorwo cianitok kuna likukum icieng ko fworoti kwecere. ² Orumu icieng moru litiboborori to kutuk lo tula. ³ Ati ojo icieng orute, ida icieng orumu ken lo Lahitok Yesu. ⁴ Kolorihe icieng ibuha kuno, deu deu cio are kuna licefita kyelani kuna imedehi iya hila ko boto owoitati ko icieng. ⁵ Iyo bangun neicieng ogung ngorwo ko komoma kuneicieng many kof ati ojo kuna cio diho icieng; “Nyio itahita ite kawarani to kiji lo kaweyak? ⁶ Oru inyi ten. Libuhu inyi! iiyoto kulafa tenyi tenyi lohirihohi inyi ite to Galilea ojo; ⁷ “Ojir icori kito lo tungani kac kulo cio kapalak, ogurohini kuruce manyu to far lo uni ibuhu ari.” ⁸ Oto icieng ko kiiuno tenyi tenyi kunenge. ⁹ Koloitu icieng to kwecere, ko rihohinoti ene tenya diho kuna tomon ko lobito ko kuna kude fad. ¹⁰ Orumu ara icieng Meri Magdelena, Joanna, Meri ngoto Jemes ko kuna kude kuna lilihita ko icieng, icieng lorihohi ene tenya diho jayona. ¹¹ Ati ida icieng iruk tenya lo ngorwo tonyio ori tenya neicieng diho icieng mejo tenya lo talerun. ¹² Petero ko wojuno ko kifejaru kwecere. Igigil katwa odeu kigwahiti kulo kyela iribi ofeta jia okabahi ko loro ibuha ake ake jimitan nyio ba litiihino. ¹³ Dong inyi na far bito kude kuneicieng are orumu ofworoti lobo kang lobara Emaus na lotum maili mietare to Jerusalem, ¹⁴ orumu icieng oforo kuno tenyi tenyi litiihino fad. ¹⁵ Kolotenya icieng oforoti kuno tenyi tenyi, Yesu to ken ko lotuno ko lotita ko icieng ara lobito. ¹⁶ Ati itihi icieng yenun inyi. ¹⁷ Itifi inyi icieng ojo, “Nyio itenya ite ara lobito tone lotita ningi?” Icieng ko woita, idisi komoma. ¹⁸ Lobito to kiji neicieng na lobara Kleopas ko kitifia ojo, “ira isi weloni Jerusalem na lida iyen sangite kuna litiihino ija kuno ngole faritin?” ¹⁹ Itifi inyi ojo’ “Akuni sangite?” Inyiahahi icieng ojo, “Tenya lo Yesu lo Nazaret. Ara ngole afa inyi kamocani na igol iyo tic ko tenya nenge to ketemoni lo Lobanga ko cio fad, ²⁰ kadwarak kuna hitoha ko kalanyunok kuniyang ko kicwarati inyi ifadari ico ogurohini inyi iyo kuruce. ²¹ ati orumu ohoi ki kodomo jimitan inyi ca lo lotu lahuno Isirael. Manyu iyo kuna fad, liyaru jija faritin uni many to wei nenge. ²² Losodo kuna, kude iyo ngorwo kuniyang ofwonu kipany ohoi noo. Ofwori kwecere adi kiwanyi berien ²³ ati ida orumahini ken nenge. Ofwonuni kirihohini ohoi ojo kideu icieng malaikahin kuna lohiihohi icieng ojo libuhu inyi. ²⁴ Kude to kiji niyang manyu ko fworo kwecere orumahi sangite ori iya na loteny ngorwo ati inyi ida icieng odeu. ²⁵ Ojo inyi diho icieng, “idataruha ite manyu ikaruha kiniang tenya lafa loteny kamocak! ²⁶ Ida orumu kristo ojir orumu kidak lo kuno sangite fad orutorore iyo deyo nenge?” ²⁷ Icak inyi many to Moses ko kamocak fad ititimahi icieng tohi na lorumu igeri ojir itiihino diho inyi. ²⁸ kolonyiharu icieng kang na lorumu icieng ofworo, otem Yesu mejo oringaru ketemoni. ²⁹ Oto otani inyi to naigol ojo, “kitongo ko ohoi tonyio lobolo kurou, loloro kof mutohun, oto inyi ko kiliharu ko icieng. ³⁰ Langun litongohino inyi iyo meja ko icieng odumu inyi mugati ico kwama obeny icak kicwara icieng ³¹ konyeha kuneicieng ko ngaja icieng ko heruno inyi, inyi ko rijoro to konyeha kuneicieng. ³² Itifi icieng kenite ake ake ojo, “ ida adi taulo kuniyang ocura kalititima inyi diho ohoi to kikoi tenyi tenyi kuna ligero?'' ³³ Icieng ko wojunoti deu deu ko itoroti iya Jerusalem. Ofwo icieng orumahi kunu tomon ko lobito ko kuna longon ko icieng ifuroti lobito faji. ³⁴ Manyu ojimi, “Ara dede!” Lowaru lahitok oboto diho Saimon. ³⁵ kuna are ko kititimahino icieng tohi na litiihino kikoi ko koditi na loherunore icieng Yesu na tik lobenyare mugati. ³⁶ Kolorihe icieng otenya kuna, Yesu token ko woita kiji neicieng ko jimitan diho icieng, “kisiliban kingon ko ite!” ³⁷ Oto icieng ko ryenya manyu obangiha iiyoti ojo kideya icieng okorif. ³⁸ Ojo inyi diho icieng, “Nyio iudo ite manyu nyio ikukuya ite to taulo? ³⁹ Itide kac kunei ko kejuha kunei. Ara nan token ene. Kitir nan manyu ide ida okorif otehita ken ko koi iya na lideyare ite nan atehita”. ⁴⁰ Langun ko lojo inyi ji, itotorohi icieng kac ko kejuha kunenge. ⁴¹ Manyu orihe icieng ida iruk to bolojun lo kwama ko kipany, itifi inyi icieng ojo, “Ingon haba ite ko lobo tohi lo daha ene?” ⁴² Icori inyi angati lo kayamiti na itohoro ⁴³ inyi ko kilifuno ko daha to ketemoni neicieng. ⁴⁴ Ojo inyi diho icieng, “Lafa tenya lateny nan diho ite ene orihe nan kingon ko ite. Sangite fad kuna ligero to nan iyo cik lo Moses, kamocak ko Jabuli itifuti fad to ken nei”. ⁴⁵ Oto onga kweci kuneicieng itiniang icieng kigeriti. ⁴⁶ Orihohi icieng ojo, “tohi na ligero inyi ene; Orumu ca kristo kidak ati ibuhu to wei far lo uni ⁴⁷ manyu kirwo ko laa lo kipali pali ititimi ca to karana nenge iyo kofi kofi fad kicaha to Jerusalem. ⁴⁸ Ite lira sadeni kulo kuno sangite. ⁴⁹ Aloro nan culahino ite tohi na locik Apa nei ati itongoti Jerusalem many kolohiticiefi ite golun to kai”. ⁵⁰ Kolorihe icieng tang ko Beteni, oting kac kunenge kai igatahi icieng. ⁵¹ Orihe inyi igatahino icieng, ongerihi icieng otingori inyi iya kai. ⁵² Tinyia iwor icieng inyi ko itoroti iya Jerusalem ko kwama nahitok. ⁵³ Itongoti farihin fad kaji lo Lobanga omajati inyi.