¹ Oto ilulung fad ko wojuno ko kiyaruno Yesu diho Pilato. ² Manyu iciak icieng fad kidoro inyi ojo, “kirumu ohoi ene tungani itirijoro kof niyang. Itiho sofo lo mocoro diho Cesar manyu ilolongoro ake ake ojo inyi kristo kabu”. ³ Itifi Pilato inyi ojo “ira isi kabu lo cio kulo Judea?” Inyiahahi inyi ojo, “Ibo, ori iya na liteny isi”. ⁴ Oto Pilato ko rihohino kadwarak kuna hitoha ko ilulung ojo, “ida nan aumu lobo kipal na ngotum ifadarorihin ene tungani”. ⁵ Ati ifud icieng ojo, “Isusua lerok cio ene Judea fad to kitiyena nenge. Iciak many to Galilea olotunore many ene”. ⁶ Koloning Pilato jii itifi icieng kalara Yesu tungani lo Galilea. ⁷ Koloning ojo ara Yesu tungani lo kof na lolanyu Erod, na manyu lorumu ongon Jerusalem to kuna faritin, ocule inyi diho Erod. ⁸ Kolo deu Erod Yesu oto okwama bebe tonyio to faritin becek orumu inyi otahita deya Yesu. To kuna loning inyi iyo ticitici kulo Yesu, orumu inyi okodomo ojo ojir Yesu itii lobo tangu. ⁹ Itifi inyi kitifi becek ati ida Yesu ifotu. ¹⁰ Kadwarak kuna hitoha ko ktiyenak kulo cik orumu owoita ijia, ifudati kidoro inyi. ¹¹ Oto Erod ko asegere kunenge ingal ko kwenitare inyi. langun liticiefi inyi kyela na litibibila, ko kinyiaharoti inyi diho Pilato. ¹² Kiciaha many tona far ofwonu Erod ko Pilato ara morot orumu berien oswaati. ¹³ Ilolongu Pilato kadwarak kuna hitoha ko kalanyunok ko cio pili ¹⁴ ko jimitan diho icieng, “iyauno ite ene tungani diho nan ijo isusua cio lo beruno imiri. Latifi nan inyi to ketemoni ningi manyu ida arumu lobo kipal na ngotum ngotohinorehin inyi wei. ¹⁵ Ida kileng Erod orumu tonyio inyahu manyu inyi diho ohoi, iya na lideyare ite ida inyi itii lobotohi na ngotum kifadarore inyi ¹⁶ tona atilum ca nan inyi alahahi olo. ¹⁷ to faritin kulo karama ongonita afa ojo ojir olahahi tungani mabus lobito to icieng''. ¹⁸ To ogoro lobito igori, “todume ene tungani tolahahi Barabas diho ohoi!” ¹⁹ orumu Barabas otori to kisusua ko kifada lo tungani. ²⁰ Iya na lowahare Pilato lahahino Yesu, otan inyi icieng ari. ²¹ Ati itiring icieng kigorita, “togurohi iyo kuruce! Togurohi iyo kuruce!” ²² Lo kakeny uni oteny inyi diho icieng, “tonyio kipal nyio itii ene tungani? Ida nan arumu ken nenge lobo kipal ngocamare nan kifadaru inyi, tona, atilum nan inyi alahahi olo”. ²³ Ati to ogorohin kuna ikwati itiring kigorita ojo ojir inyi ogurohini iyo kuruce, olanyu dong icieng tona kigorita neicieng. ²⁴ Tona pilato ko kiruk kicwara icieng wahun neicieng. ²⁵ Olahahi inyi na tungani lotori to kisusua ko kifada lo tungani, iya na lilifare icieng ko lahahino Yesu iyo wahun neicieng. ²⁶ Kolorihoroti inyi, ko kiniefunoti Saimon lo Ciren na lolotu to kangite oloro katwa lo Jerusalem ko kifudahinoti inyi tingo kuruce to omot lo Yesu. ²⁷ Ilulung lo cio orumu ijifita inyi ko ngorwo kuna lorumu icira inyi. ²⁸ Ibelo Yesu orihohi icieng ojo, “tee kulo Jerusalem kecira nan, icirati kenite kuningi ko tee kuningi. ²⁹ Tonyio olotuno far na lijimitare ite, ‘ongon ko gum ngorwo kakorifok, koceheri kuna lida ifongu ko iki kuna lida itinak. ³⁰ Oto ojimi diho dongeco, kiurohinoohoi manyu diho locolongi kimuk ohoi!’ ³¹ Tonyio, kalitiyo cio kuno sangite kolocef ciani, oto ca itii aja kalotou?” ³² Cio are kuna kude kuna lara kabelak orumu iyaroti ko inyi lo fworo gurohino kuruce. ³³ Kolofwonuni lobo faji lobara “koite lo kwe”, kogurohinoti inyi ijia ko kuna kabelak ara lobito- lobito ngati lo iteten ko lobito ngati lo ikajong nenge. ³⁴ Ojo Yesu, “Apa tolau icieng tonyio ida oyeniti tohi na litiyo icieng”. Manyu ikokor icieng kyelani kunenge to kibiro lo gumar. ³⁵ Owoita cio odeya ko kalanyunok isiriati inyi ojimi, “Olwahu inyi kuna kude, ingohi to lwak ken nenge kalara inyi kristo lo Lobanga na lonyumuni.'' ³⁶ Ofwonu manyu asegere okwenitare inyi icori inyi vino na itatang ³⁷ ojimi diho inyi, “kalira isi kabu lo Judea, tolwahu ken nino”. ³⁸ Orumu ongon kigero na lofihi kai lo kuruce nenge na ligero ojo ene lara Kabu Lo Judea. ³⁹ Lobito diho kuladi kabelak logurohini ko inyi manyu omor inyi ojo, “Ira isi kristo tolwahu ken nino ko ohoi”. ⁴⁰ Ati irieng na kabelani bito inyi ojo, “ida isi ibang Lobanga, iya na lingonore isi ko inyi iyo kidak ara lobito? ⁴¹ Kicori ohoi niyang obehi, tonyio kirumuno ohoi tohi na locam to tic niyang. Ati ida ene tungani itii lobo tohi iroho.” ⁴² Oto ko jimitan, “Yesu kiiu nan kalilotu isi okabwe nino”. ⁴³ Ifotu Yesu inyi ojo, “Ahirihohi isi tenya lo dede ene far kingon ca isi ko nan Paradise." ⁴⁴ Orumu longon tik lo ile, oto lokimuyuk olotu imuk kof fad many ogoru tik lo mietangon. ⁴⁵ Tonyio oberu kolong nohun manyu kyela na lokor kaji lo Lobanga ocira are tokai many kof. ⁴⁶ Igore Yesu to ogoro na ikwat ojo, “Apa iyo kac kunino acorihi nan okorif nei”. Kalokeru jimitan jii, ko wirita lo lohicungi. ⁴⁷ Lahitok lo asegere deuno tohi na litiihino, omaj Lobanga ko jimitan, “dede tungani na ibir orumu ene”. ⁴⁸ Kolodeu cio pili kulafa longoni kiriria tohi na litiihino, ofwori iya kangite onangati locoloho. ⁴⁹ Ati cio pili kunafa loyen inyi ara lobito ko ngorwo kulafa lijifuno inyi many to Galilea, owoitati lolomaje iririarihin kuna tenyi tenyi. ⁵⁰ Tinya ongon afa lobo tungani lobara Josep, ara afa inyi tungani na longon kiji lo cio kulo lokiho ati ara inyi tungani na ijir, ⁵¹ obir na lida orumu iruk gulia lo tenya neicieng ko ticitici kuneicieng. Ara inyi lo lobo kang to Judea lobara Arimatea manyu orumu inyi itila lotuno lo okabwe lo Lobanga. ⁵² Olo diho Pilato kilifa ken lo Yesu. ⁵³ Oto ko kiticuluno kof, obubur to kyela iribi ko kitigetohino tula na lobohuni iyo moru na lorihe ara ngejuk ida lonuhahini lobo tungani. ⁵⁴ Orumu lafar ara far lo kikukumahino manyu lonyiha sabit icaha. ⁵⁵ Ngorwo kuna lilihu ko Yesu to Galilea, ijifari Josep manyu odeuni kwecere ko koditi na litigetohinorehin ken lo Yesu katwa nenge. Ko itooti ki kukuma iheru ⁵⁶ ko ngoronico kuna iuri. Ati iyoma icieng to sabit lo kijifita cihicihi.