¹ To kunu faritin ico Cesar Agusto cik ojo ojir ikeni cio fad to kof lo Roma. ² Ketemoni lo kikena ene lafa litiihino orumu Kwirino ara gavuna lo Siria. ³ Ofwo cio pili fajihit kulo kangite kuneiceng kigeroro. ⁴ Josep manyu ko loro to Nazaret na longon kof lo Galilea iya Judea, Betlem kang lo David tonyio ara inyi lo agwala lo kolo David. ⁵ Olo inyi ija kigero ko Meri na lorumu ociharu yemaru ko inyi orumu ligar. ⁶ kolongon iceng ija ogoru tik lo tomonun lo Meri. ⁷ Inyi ko tomonu okang nenge kito retoni. Obubur inyi idole nenge to kyelani ko kitigetohino iyo twol lo sang tonyio oru faji diho iceng to kaji lowelo. ⁸ Manyu ongoni orumu katibalak mwang onyihaha iboriati sang kuneiceng karwe. ⁹ Oboto malaika lo Lahitok diho iceng nyujon lo Lobanga ko kinwaha iceng, oto iceng obangi. ¹⁰ Ati ojo malaika diho iceng, “kebang, ayauno nan layomit na ijir diho ite lo kwama na hitok na lara lo cio fad. ¹¹ Ene karwe to kang lo David lo tomonuni kalwahani inyi Kristo Lahitok! ¹² Kitotorita ca ene diho ite; irumu ca ite idole obuburi to kyelani itigetihini twol lo sang. ¹³ Gaga olo hoi kulo jore lo kai ko moto ko na malaika ara lobito omajati Lobanga ojo, ¹⁴ “Deyo ongon kai diho Lobanga manyu ene kof kisiliban ongon diho cio kuna longon ko kisisio nenge. ¹⁵ Kolo ngerihi malaikahin iceng loitori kai, ojo katibalak ake ake, “Lolifwo ba Betelem deya kuno sangite litiihino lo hirihohi Lahitok ohoi”. ¹⁶ Iceng ko ki muriaru ofwori orumuni Meri ko Josep ko kito idole na logeto twol lo sang. ¹⁷ Langun lodeu iceng inyi, itisarihi iceng tenya na lorihohini iceng tone kito, ¹⁸ Oto cio pili kuna loning ipanyiti tohi na lorihohi katibalak iceng. ¹⁹ Ati oricahi Meri kuno sangite pili igigil iceng to tau nenge. ²⁰ Oite kaboriak itikwatati ko maja Lobanga to sangite fad kuna lo ning ko kuna lodeu iceng kuna manyu lobehi iya na lorihohinorihin iceng. ²¹ Kologoru far lo mietauni, kologoru tik lo ngoto lo kito, itibarahini inyi karana Yesu karana na lico malaika inyi many orihe ida lifonguni inyi. ²² Kolotumohino faritin kulo kitinyujo neiceng iya na ligerohini to cik lo Moses, iyaru Josep ko Meri inyi Jerusalem kicwara diho Lahitok. ²³ (iya na ligerore iyo cik lo Lobanga ojo, “tee rei okangi fad ojir iciori diho Lobnga). ²⁴ Ko kicwara kikum iya na ligerohini iyo cik lo Lahito; kurihin are kode amami are.'' ²⁵ Tinya ongon afa lobo tungani Jerusalem lobara Simeon na ibir manyu ico ken diho Lobanga. Itila afa inyi kitilaha lo Isirael manyu ongon okorif na inyu ko inyi. ²⁶ Lorihohi okorif na inyu inyi ojo ida inyi owei orihe ida odeu kristo lo Lahitok. ²⁷ Oculu okorif na inyu inyi kaji lo Lobanga. Kaliyauno katomonk kito Yesu kitiyo diho inyi tohi na lowak cik, ²⁸ otingu Simeon inyi komaja Lobanga ojo, ²⁹ Lahitok na lilanyu fad iya na licihare isi to lahahi dong karwaani nino olo to kisiliban. ³⁰ tonyio lodeu konyeha kunei lwaha nino, ³¹ na likukumahi isi to konyeha kulo cio pili. ³² Wangun na litikweny misiok ko deyo diho cio kunino Isirael. ³³ Ipany monye lo kito ko ngotenge tenyi tenyi kuna loteny na tungani to inyi. ³⁴ Simeon ko lifahino iceng gum ko jimitan diho Meri ngotenge; “Onyumuni ene kito ara lo kiyauno uroro ko wojuno lo cio becek to Isirael ko rahun kitotorita na lifita cio. ³⁵ lo kitibotuno kigigilo lo taulo kulo cio kuna iborengi. Manyu ocuk ca latubot tau nino token. ³⁶ Orumu ongon manyu lobo kamocani ngorwani na lobara Anna kito lo Panuel lo imanit lo Aser. Longoroyon orumu inyi noo, itong inyi ko retoni nenge karihin mietare to kifwongi lo yemaro nenge, ³⁷ ko rahun lafuserito many ogoru karihin kunenge keek mietauni ko ongon. Ida afa inyi ingohi kaji lo Lobanga ati orima Lobanga karwe ko far illifa ko faranun kinga. ³⁸ Lotuno diho iceng na tik, ico lobanga kwama ko tenya tenyi tenyi ken lo kito diho cio pili kuna litila lwahuno lo Jerusalem. ³⁹ Koloderu Josep ko Meri kitiyo sangite fad iya na lowahare cik lo Lobanga, oitori galileya kang neiceng na longon Nazaret. ⁴⁰ Manyu kito ko bolojun, ogol ifut ko genyun manyu kisa lo Lobanga ongon ken nenge. ⁴¹ Karihin fad ofworita katomonok kulo Yesu Jerusalem daha karama lo Paska. ⁴² Kologoru karihin kunenge tomon, ilihe iceng ko inyi iya Jerusalem iya na longonore iyo itidwar. ⁴³ Langun loru karama, koloitoro katomonok kunenge kang, otong kito Yesu Jerusalem, ati ida iceng oyen. ⁴⁴ To kibuha jimitan ongon lofe kiji lo cio, ofwo iceng owele lo far lobito. Oto iciahi tahita inyi kiji lo kajeba kuneiceng ko morot. ⁴⁵ Ojo ida orumuni inyi oitori Jerusalem tahita inyi. ⁴⁶ kifwongi lo faritin uni orumahi iceng inyi kaji lo Lobanga itongo kiji lo katiyenak ningo iceng ko kitifia iceng kitifiti. ⁴⁷ Cio fad kuna loning inyi ipanyiti ki niang nenge ko kitirangita kunenge. ⁴⁸ Kolodeu katomonok kunenge inyi, ipanyiti, ojo ngotengediho inyi, “Kito, nyio kitii isi ohoi ji? Munyi ko nan kingon orumu tahita isi to kiudo”. ⁴⁹ Itifi inyi iceng ojo “Nyio itahita ite nan? Ida ite iyen jimitan ocam nan ngonun kaji lo apa nei? ⁵⁰ Ati ida iceng iniang tohi na lotenya inyi diho iceng. ⁵¹ Oto inyi ko loro iya Nazaret ko iceng. Ati oricahi ngotenge kuno sangite pili tau nenge. ⁵² Manyu obolo Yesu to genyun ko jiran manyu orumu kisisio to ngati lo Lobanga ko.