¹ Waraga na lager nan Paul jayo na lida ara cio kode tungani loculu ati Yesu Kristo ko Lobanga monye na litiwaru inyi to kiji lo kaweyak ² ko recera fad kuna lohingoni ko nan ³ Kisa ongon ko ite ko kisiliban diho Lobanga Apa niyang ko Lahitok Yesu Kristo ⁴ lafa licio ken nenge to kipalipali kuniyang lo lwahuno ohoi iyo kuno faritin irohori to wahun lo Lobanga Apa niyang ⁵ ingohi deyo tongon diho inyi karihin ko karihin. Amen. ⁶ Apany nan bebe jimitan deu deu libeloro ite to ketemoni lo lafa lohilolongu ite to kisa Kristo ibeloro iyo layomit na inyu lobo ake ⁷ na manyu lida ara layomit na inyu tur. Itotoro ene jimitan ongoni kude cio kitibahasa kweci kuningi to kitigeraru layomit na inyu lo Kristo. ⁸ Ati kololotu tungani kileng ngara ohoi kode malaika lolotu to kai, ititima layomit na inyu lobo ake kona afa lohititimahi ohoi ite, ingohi inyi tolo iyo wei na lida oru! ⁹ Iya na lohitenyare ohoi ketemoni orihe manyu nan anyiahata ajo, kalititima lobo tungani layomit lobo ake kona afa lohititim ohoi, ingohi inyi tolo iyo wei nalida oru! ¹⁰ Angon jijia nan tahita kisisio lo cio kode lo Lobanga? Kode angon nan tema kitikwama cio? Ngara arihe nan atahita kitikwama cio ngida jija nan ara karwaani lo Kristo. ¹¹ Awak nan ite iyen recera jimitan ene layomit Inyu latitima nan, ida ara tohi na likukum tungani. ¹² Ida nan arumu diho tungani kode ida kitiyeni nan. Arumu nan diho Yesu Kristo lafar lomotore inyi diho nan. ¹³ Aiiyo nan lining ja ite koditi lafa latongore nan iyo warun nei ongore to Jerusalem koditi na afa ladorahinore nan kitigema kanisa lo Lobanga awak keruno. ¹⁴ Angon afa nan kitemita to dini lo Judeahin alany kaletok kunei manyu atehita lairan lo tic to kitidwari kulo fafaico kunei. ¹⁵ Ati kololotu Lobanga lafa lohitingade nan many to otomone manyu kilolong nan to kisa nenge okwama ¹⁶ kitotoruno kito nenge diho nan, ojir nan atitim tenya nenge diho misiok, ida afa nan atifi lobo tungani ¹⁷ kode alo iya Jerusalem deya kunu jayona litemita diho nan ati alo afa nan deu deu iya Arabia alotu afa aitu Damaskas to kifwongi. ¹⁸ Ojo F to kifwongi lo karihin uni alotu alo iya Jerusalem kitimohoro ken ko Petero atong nan ko inyi to faritin tomon ko miet. ¹⁹ Ida afa nan adeu jayona kuna kude ara afa Jems rece lo Lahitok keken. 2 ²⁰ Ahirihohi nan ite ketemoni lo Lobanga jimitan ene tenya lagero nan diho ite ida ara talerun. ²¹ 21 To kifwongi alotu nana lo Siria ko Cilicia. ²² Ida orumu kiyeniti nan to kanisahin kulo Judea kuna longoni iyo Kristo ²³ oningo icieng ara tenya keken ojo lafa tungani lohitigema ohoi lolotu ara katitimani lo lafa kiruk lotem inyi kifadaru. ²⁴ Manyu omaja icieng Lobanga to nan.