¹ Koloru karihin tomon ko ongon aite nan Jerusalem kilik ko Barnabas kiyaru ohoi ko Tito. ² Tohi na licio nana lo, tonyio kitotorohi Lobanga nan ojo ojir alo, kalagoru nan ijia ayauno nan ketemoni neicieng tenya lo layomit na ijir na latitima nan diho misiok. Ati atii nan lo lit diho kuna lara kabolorok to bangun jimitan ojir ida itifiahi tic nei na latii nan. ³ Ati ida afa ifudahini kileng Tito na lohilihita ko nan kiliraru kileng lara inyi Girihoni. ⁴ Owoju ene tenya diho kude recera katalerok lorutu kiji niyang lofwonuno sifa warun lo lanyuno lo kenite na lohingonore ohoi iyo Kristo Yesu lo wahun kitiraha ohoi opi. ⁵ Ida ohoi kilahahi kileng tik lobo sidi diho icieng ojir tenya lo dede lo layomit na Ijir iwasihi diho ite. ⁶ Kalara to cio kuna lojo kiboroho icieng ida na borohojun neicieng ara kude saye diho nan. Ida Lobanga kideya ohoi to koditi na lohibotore ohoi toleng, ida kunu cio osodohi lobo tohi iyo tenya nei. ⁷ Ati lofwonu icieng iniang jimitan kiciori nan tic lo kititima layomit na ijir diho misiok iya na lititimare Petero diho Judeahin. ⁸ Tonyio Lobanga na litiyore Petero ara jayo kiji lo Judeahin inyi manyu lohitiyore nan ara jayo kiji lo misiok. ⁹ Ofwonu kuno cio lara wiri kulo kiruk Jems, Petero ko Jon kicio ohoi ko Barnabas kigeno ko mohoro no kolodeuni kisa na lohicio Lobanga nan. Ofwonu icieng iruk jimitan ojir ohoi kifwo diho misiok icieng diho Judeahin. ¹⁰ Tohi na locik icieng diho inyi jimitan ojir ohoi ida kiluluhi kakidahak kuna longoni kiji lo cio kulo Lobanga, tohi na manyu lorumu ongon tau nei lo kitiyo. ¹¹ Lafar kololotu Petero Antiok, alotu nan aberu tic nenge manyu arihohi inyi komom nenge, tonyio orumu inyi ipal. ¹² Orihe kude cio lofwonu to diho Jems oru, orumu Petero odaha ara lobito ko misiok. Ojo langun lofwonu kuna cio, iciak Petero kingadaru kalele to kiji lo misiok tonyio obang inyi kuna lojio ojir cio iliraru ¹³ Ofwonu manyu Judeahin kuna kude itetema inyi iyo na kitinononga nenge tona tic neicieng, itigerari kileng Barnabas. ¹⁴ Kaladeu nan jimitan ida na tic neicieng ilihita ko tenya lo dede lo layomit na ijir, oto nan ajo diho Petero, to ketemoni neicieng fad, “Ira isi Judeani ati itongo iya misiohoni ida ara Judeani. Aja hati ifuda isi ijio ojir misiok ijifita itidwari kulo Judeahin? ¹⁵ Dong ohoi kuna lohira Judeahin ida ara misiok ¹⁶ kiyen jimitan ida cik otum kitibira tungani ati ara kiruk iyo Yesu Kristo. Tona kileng ohoi lohifik kiruk niyang iyo Kristo Yesu ojir kirumu kitibira to kiruk iyo Kristo ida ara to kijifita lo cik, tonyio to kijifita lo cik ida tungani otum rumuno kitibira. ¹⁷ Kolohitahita ohoi jimitan ojir kirumu biran to kiruk Kristo, kito manyu kirihe kideya kenite kuniyang ara kapalak, itotoro na jimitan osodo Kristo kipal? Ida otum ara jii! ¹⁸ Kalatiwoju nan tohi lafa lapale nan inyi jimitan ara nan kagilani lo cik. ¹⁹ Tonyio lawei afa nan iyo cik ojir awar iyo Lobanga. ²⁰ Tonyio lohigurohini afa nan ko Kristo tona ida orihe ara nan lawar ati ara Kristo lowar katwa nei. Ene warun lawar nan to ken nei, awar nan to kiruk iyo kito lo Lobanga na lohimaru nan manyu icio warun nenge to nan. ²¹ Ida nan atingade kisa lo Lobanga kalele tonyio kolorumuno kitibira to kijifita lo cik, inyi jimitan owei Kristo arus”.