¹ Lohicungi recera ilifati tohoi jimitan ojir tenya lo Lahitok isarihi deu deu to rima iya lafa litiihinore iyo ite. ² Manyu ilifati jimitan ojir kilwahuni ohoi iyo cio kasaruok, cio kuna irohori tonyio ida cio fad iruk. ³ Ati igenoro Lahitok manyu kitigol cia ite manyu kiric iyo karohojani. ⁴ Kingoni ohoi ko kigeno iyo Lahitok jimitan itiyo ite manyu isodoro cia kitiyo kunafa sangite lohicik ohoi. ⁵ Ingohi Lahitok torihe taulo kuningi iyo kimaruno lo Lobanga ko ketemoni lo Kristo. ⁶ To karana lo Lahitok Yesu Kristo kiciha ohoi ite recera jimitan ingadata to ken lo tungani na lojo inyi rece okaru hati ida hati omanya ijifita tenyi tenyi kulafa lohitiyenare ohoi ite. ⁷ Tonyio iyen ite tokenite koditi na ngijifitare ite manya na lohitotor ohoi. Ida afa ohoi kikaruha lafar lohimanyare ohoi kote. ⁸ Manyu ida afa ohoi kinyia daha lo lobo tungani ida kidum. Ati kitiyo afa ohoi karwe ko far kitiyo to kirunga fad ojir ida kiticun lobo tungani to kiji ningi, ⁹ kitiyore ohoi jii ida ara jimitan ida orumu ohoi kicam to lwaha ati kiwak ohoi kitotorohi ite kikoi na ngijif ite. ¹⁰ Tonyio kileng afa lohingoni ohoi kote kicio afa ohoi ite ene cik jimitan, “kalida tungani itiyo ojir ida odaha”. ¹¹ Kining ohoi ojo isabita kude to kiji ningi. Ida icieng ara katiyok ara icieng kasabitak. ¹² Kiciha ohoi kuna cio to kilelia diho icieng to Yesu Kristo ojir itongohinoti itiyoti orumunorehin daha na lodaha icieng. ¹³ Dong to ite recera keniama kitiyo ticitici kuna ijiri. ¹⁴ Kalida lobo tungani oning kisinga niyang iyo ene waraga itode inyi otoc. Kelihita konyi ojir riri odahahi. ¹⁵ Ati ketirak inyi ara meroni ati itisony inyi iya rece. ¹⁶ Jijia ingohi Lahitok lo kisiliban to ken nenge kicio ite kisiliban faritin fad manyu to kikohin fad. Ingohi Lahitok kingon kote fad. ¹⁷ Nan Paul token lagero ene fonyo diho ite to kana nei, na lara kiyenita lo waragahin kunei. Koditi lo kigero nei ene. ¹⁸ Kisa lo Lahitok niyang Yesu Kristo kingon kote fad.