¹ To tenya lo lotuno lo Lahitok Yesu Kristo ko tubaru niyang diho inyi recera kirihohi ohoi ite jimitan. ² kerienya to kude tenyi tenyi kulo kimoca kode lobo waraga lojimi ohoi lohiger ojo lolotu far lo Lahitok. ³ Kecio lobo tungani kitinonong ite to lobo kikoi keken tonyio ida mute nafar olotu many kaliciaha kijoria manyu langun loboto tungani kagilani lo cik, tungani na lifadaroti mute. ⁴ Itongo mute inyi ara na litiboloro ken nenge manyu itipeha lobo tohi ijir keken manyu ofik ken nenge ojo inyi lobanga ida oyen Lobanga manyu ofik ken jimitan ojir kiworati inyi ara Lobanga. ⁵ Ida ite ibuhu jimitan lafa langonore nan kote ahirihohi afa nan ite kuno tenyi tenyi? ⁶ Manyu jijia iyen ite tohi na lorihe itiho inyi, ara jimitan ojir itibotunorihin mute inyi to tik na locam. ⁷ Tonyio ilitit lo golun lo gila lo cik jijia longon kitiyo ati orihe katihoni nenge ongon many mute kolodumari inyi to ketemoni nenge. ⁸ Oto dong kagilani lo cik ko boto na mute lolotu Lahitok Yesu ifade to ofuu lo kutuk nenge ko to kimedek lo lotuno nenge. ⁹ Ongon mute lotuno lo kagilani lo cik ara Lobito ko tic lo sitan na cia loboto iyo tanguhin kulo talerun ko sangite kulo ticitici kuna litirima. ¹⁰ ko sangite kuna irohori kode kuna litinonongarihin cio kuna lorijoro. Ori icieng tonyio ida icieng owak kimaruno tenya lo dede na ngorumunore icieng lwaharu. ¹¹ Tona tenya oculahi Lobanga icing tau lo talerun ojir iruhi kitinononga ¹² ojir ongotohinorehin icieng fad wei icieng cio kuna lida iruk tenya lo dede kuna lokwama tenyi tenyi kuna irohori. ¹³ Ati kiwak kwama Lobanga tote recera kuna lohimaru Lahitok tonyio many to lohiciahi kinyumu Lobanga ite ojir ilwaharu to tic lo kitinyujo lo Okorif manyu to kiruk ningi tenya lo dede. ¹⁴ Kilolongu inyi ite to layomit na ijir niyang ojo ojir ingar deyo lo Lahitok niyang Yesu Kristo. ¹⁵ Dong jijia recera itiwoitati igoli manyu iniefata kitiyena lafa lohicio ohoi ite kode to tenya lo kutuk kode waraga. ¹⁶ Ingohi Lahitok niyang Yesu Kristo to ken ko Lobanga Apa niyang na lohimaru ohoi na lohicio ohoi kitigolo lo tau na isio ko kigeno na ijir to kisa nenge. ¹⁷ itigol taulo kuningi manyu itigol ite iyo kikohin kuna ijiri ko tenyi tenyi kuna ijiri.