¹ Paulo, Sailas ko Timoti. Diho kanisa lo cio kulo Tesolonika kuna longoni iyo Lobanga Apa niyang ko Lahitok Yesu Kristo. ² Kisa ko kisiliban diho Lobanga Apa ko Lahitok Yesu Kristo kingon kote. ³ Kicam kwama Lobanga tik tik tote recera manyu otumohino tonyio omoloro kiruk ningi osodoro iya ketemoni, manyu osodoro kimaruno ningi to kenite iya ketemoni . ⁴ Tona to kanisahin kulo Lobanga fad kipufare ohoi dihan ko kiruk ningi iyo kitigema fad na lingon ite diha. ⁵ Itotoro kuna fad jimitan obehi ngoto lo tenya lo Lobanga manyu iyo kuna fad kikeni ite ara cio kuna locam to okabwe lo Lobanga na lingon ite dihare kidak. ⁶ Obir Lobanga, odumahi mute inyi kidak iyo cio kuna lohicwara ite kidak. ⁷ kicio ite kuna lirumu kidak jijia kiyoma kohoi fad. Itiihino mute ene kaloboto Yesu to kai to kima na iyarat ko malaikahin kunenge kuna igoli. ⁸ Itigem mute inyi cio kuna lida oyen Lobanga ko kuna loberu ningo layomit lo Lahitok niyang Yesu Kristo. ⁹ Itigemi mute icieng to wei na lida icung manyu igenori oleng to ketemoni lo Lobanga ko to golun lo obolore nenge. ¹⁰ To far na mute lolotunore inyi kitotoro deyo nenge to ketemoni lo cio kunenge kuna inyuji ojir cio pili kuna liruk odeu. Ara ene ko ite ara Lobito tonyio ite afa liruk kisaden na lohitul ohoi dihote. ¹¹ Ko kuno tenyi tenyi to taulo kuniyang, kilifa ohoi tote tiktik jimitan ojir Lobanga niyang kiken ite ara cio kuna locam to kilolongo, manyu to golun nenge itifut tenyi tenyi kuna ijiri fad tote ko ticitici fad kuna lofwonu to kiruk ningi. ¹² Kilifa ohoi jii ojir karana lo Lahitok niyang Yesu itikwati iyo ite manyu ite iyo inyi iya na longonore kisa lo Lobanga niyang ko Lahitok Yesu Kristo.