¹ Ainyong de hathi ejyo arimak ohohoyi lohothai Abramo ara othulo? ² Ainyong bai ojyo amanini? “Iruk Abramo d’Ojok, karik afonihini donyong ara abisan.” ³ Aca ara nya ethabisahini Abramo th’egyemathik, aang ira ithadara, ara hari dihithemi h’Ojok. ⁴ Thene, donyong lododoro, aang iherye aduma nanyong ara esorio. Ti, iherye ara aning nawon ara nanyong. ⁵ Ti, d’othulo laang igyema, ahibu inyong ti iruk ethabisio n’othulo laang otek Ojok, ofonjhini eruhon donyong ara abisan. ⁶ Ilecyo dang Davide othulo loboroye, afonik Ojok donyong abisan kwong egyema. ⁷ Ojyo, “ohothing hamiehini egyemathik hasong haang obis karik emuhohini eyatha hasong, thomunoi. ⁸ Othulo, laang Ohobu ofonik donyong eyau, thomunoi.” ⁹ Inyong na, owon ngona agu amuno najori ne ara n’ohothing habosye dia nohokabong obosye? Aca, ijyo ohoi, “Afonihni nya eruhon d’Abramo ara abisan.” ¹⁰ Angai nya ofonihini donyong? Ofonihini nya dihithemi dia diholu h’abosio? Ikara diholu, ti, dihithemi. ¹¹ Ifothu Abramo ethaithit n’abosio ara ethamijani n’abisan nanya orimak inyong th’eruhon kabong inyong obosye. ¹² Owoni nya arami hua ahanya, dowonerek inyong ara omonye l’ohothing bukulung hoiruk, ti, kabong inyong obosye, dofuni ifonihina dosong abisan. ¹³ Aca aang arami hanya iruhohini d’Abramo karik ohothifok honyong ara ohoindefak h’ahap ofuni th’oyalu, ti, ofuni thal’abisan n’eruhon. ¹⁴ Aca ara nya ohothing homanya th’oyalu ara ohoruthak, ira eruhon ithulo, karik aang arami hanya iruhohini irahi ihandyo aning nabo. ¹⁵ Aca, iyanu oyalu engere, ti, amaji naangarik oyalu, aang epal thiya ¹⁶ Inyong ne ahu najararik hijan, th’eruhon, dowonderek arami heruhohini h’alwahio karik dang eruhohini d’onyakwariak h’Abramo fodok, ikara howoni tholohop h’oyalu hamarik, ti, karik dang hongara eruhon n’Abramo. ¹⁷ Iring negerohinerek hijan, “Athuk nang iye esarahina ara omonye l’amisok olwarai.” Owon inya Abramo dihithemi honyong, leruk inyong arami hanyong, Ojok, lesarak esu d’ohoyak karik elongu asang hawang, diwonan. ¹⁸ Ditha heyihina, eyihi nya daangan n’eyihina, hijan oindu inyong de iwonan ara omonye l’amisok halwari, iring nanya athuhi inyong anyahina, “Inyong na, ahani de ofuni onyakwarya hohoi iwonan.” ¹⁹ Kwong aangan elihan bii dith’eruhon, engengelyo ahwan nanyong olefeng iring naye (anyo, arahi nya oyingathik honyong 100), karik aye n’ahohye no Sarah. ²⁰ Ti, anyo, th’arami thah’eruhon n’Ojok, kabong Abramo iririu aangan n’eruhon. Kombwo, ako inyong lo diruhon, karik ethaboloryo Ojok. ²¹ Atek inyong lo tuhudik, hijan arami hathuk Ojok eruhohina, ocohi donyong dihandyo. ²² Iring na, awon nya ahana, “Afonihini donyong ara abisan.” ²³ Ti, ocamitha, “Athuhi afonihina donyong,” ikara thonyong hamaring igerohini. ²⁴ Igerohini nya dang thohoi, karik ofuni de dang ifonihina dohoi, hoiruk donyong lonya ithadothu Yesu Ohobu lohothai th’ohoyak. ²⁵ Inyong lya lonya ithafothohini th’eminge thanahothai karik lonya ithadothuni d’ethabisahina nahothai.