¹ Inyong na, aang iye idehini, iye othulo, iye ohokanyani, aca, dith’asang hehandyo iye hune, ida iye arami hahoi hamaring. ² Ti, etek hijan akanyo n’Ojok owon ara nadiri, ara odohi d’ohothing hoihandyo asang hune. ³ Ti, idoro dini, iye othulo loikanyo asang hehandyo ohothing hulya hune, juk iye ihandyo inyong aning ne aboithe. Ingero iye de adi th’akanyo n’Ojok? ⁴ Dia igigilo iye tiibai th’ebarithi ‘hayiji nanyong. asario nanyong netharahini, karik angongohina nanyong? Aang iye itek hijan ayiji nayong iyaru iye diburunu? ⁵ Ti, inyong na th’othaji tholohoi tholoko karik leda aburunu, inyong isarak iye ethuhyo di koro d’ahwan nahoi holefeng, engere d’ofaning l’engere, nanyahi hijan, ofaning l’ethalyehini akanyo n’Ojok nabis. ⁶ Oindu de iduma d’othulo lowon iring nehadyerek inyong, ⁷ hofwo ahithemi dirimahina egyemathik hayyu, arimahina abolori, ethahuyo karik aangan namuyahi, isarak de dosong amanya no mak. ⁸ Ti, d’ohothing hohuro ahuthuhye hasong, aang hoithaningye arami hadiri, ti, eruhi aangan nabisan, oindu de engere, engere nako bebe. ⁹ Oindu de Ojok iyanu ethathaciana karik amiehunu d’ohoile l’othulo, lathuk ehandye imonyoroi, d’othulo l’Ojudei dodo, karik hathi d’Ogriki. ¹⁰ Ti, abolori, ethahabuyo karik elik n’ahap d’ohothing bukulung hoihandyo ara anayyu, d’Ojudei, ahithemi karik d’Ogriki diholu. ¹¹ Aca, awang ekekela th’Ojok. ¹² Aring athuhi ohothing holwai eyauna kwong oyalu, ingohunai de dang kwong oyalu, karik iring neyaunerek holwa d’oyalu, ofuni de dang ikanyo isong th’oyalu. ¹³ Aca, ikara ohoithairak h’oyalu howoni ara obisak dihithemi h’Ojok, ti, ohothing ohoihandak h’oyalu isong de ithabisunu. ¹⁴ Aca, ara ohothing hoikela th’Ojudei, ohothing haang owoni h’oyalu, hehandyo arami h’oyalu iring nayeunerek isong, owoni h’oyalu dihandek hosong, juk aang howoni h’oyalu. ¹⁵ Th’arami thohune, ithaithak isong egyemathik hawak oyalu egeroi di thaja. Onyahini dang arami hotho thaji, ohothing hoingengelak, ara arami hawoni di hosi hosong anyahi dia ekayo isong d’ofaning, ¹⁶ D’ofaning loindunerek Ojok, ikanyerek arami h’edima hothulo, iring evajelio hundang. ¹⁷ Ti, ara ijyo iye, iye l’Ojudei, katik ohothing fodok ara h’oyano karik ethadarai ditha Ojok, ¹⁸ karik etehi awahan nanyong karik eruhohini bebe, anyo, athuhi ithai nya anyahina th’oyalu, ¹⁹ karik ara itek iye th’ahwan thanahoi hijan iye iyohoitho ongodoni, afangan d’ohothing howoni ditha omudwe, ²⁰ Othulo loityenio ohothing honanga, okalifonik lottik karik ara iye iwon h’oyalu lowopn ara atehan karik l’arami hadiri, angai othin arami hune oyihoi lemanyarik iye? ²¹ Iye letyenio ahwan nahoi, hoityenio homok. Ara iye letyenio homok hoityenio ahwan nahoi. Iye lecama aangan n’ahoholio, hoihoholyo? ²² Iye lejyo hoiyau h’afure n’othulo, hoiyau h’afure n’othulo? Iye lengicya h’ajohi, hoihoroitho a Templohio? ²³ Iye lethadara ditha h’oyalu, omoryo iye Ojok thaangan athifoitho oyalu? ²⁴ Aca, “ofure l’Ojok lomorye dihiji h’ohthing hoikela th’Ojudei, anyo, tho iye, iring nathuhi egerohinerek, ²⁵ Olwahu iye abosyo, ara ithifoitho iye oyalu, ti, ara aang iye ithifoitho oyalu, orasa obosyo nahoi ara iring aangan nabosyo. ²⁶ Ara ti othifoitho othulo lakaang obosye oyalu, aang awangan nabosyo nanyong owon ara abosyo? ²⁷ Karik aang othulo lakaang obosye ida arami hahoi, ara othifoitho oyalu? Owon ahani anyo, oyalu loigero karik abosyo, ti, aang iye ithifoitho oyalu. ²⁸ Aca, ikara inyong l’Ojudei tholondak karik abosyo, aang dang howon tholoingwai n’othulo. ²⁹ Ti, inyong lo, l’Ojudei, tholothwa karik abosyo n’othothaji, ditha Ohoile, ikara dith’amanini. Ethahuyo n’othulo lojak ahani, ikara th’othulo oindu, ti, th’Ojok oindu.