¹ Thiya nang atehu ahide karik ahap angejuho, ara ahide karik ahap ehethemok hathuhi afwan adi; ara ahari nahittok alitho thiya. ² Nang atehu abore nadwa, Yerusalem angejuk, naindu adi dihap th’ahide n’Ojok, nehuhuma iring ahodwothi nethaliborye d’onde. ³ Ethaningu nang omurut lohittok loindu th’okara, ajyo, “Otiha! Amaji nesukarik Ojok, owon h’ohothing; oindu de isika hosong. Ofuni de iwonan ara ohothing karik Ojok th’ahwan aindu iwonan hosong; aindu iwonan ara Ojok losong. ⁴ Oindu de ifyeuna ehiyo thohonde hosong; aang aye, athariha, ekor dia adihari hofuni iwonan diya. Athuhi asang hanya hua afwan adi. ⁵ Lonya owoni di kara lo ajyo, “Idoro! Ayeyo nang asang bukulung ara angejuho.” Inyong ajyo, “Igerok arami huna dihap, anyo, olwahuni ocamitha hulo karik owoni ara hadiri.” ⁶ Inyong ajyo donang, “Athuho asang huna! Nang Alpha karik Omega, aculwe karik ecuhit. Doloibotho ahibothit, esarak nang de isong ahari hoija th’ologugudut l’ahari h’esu. ⁷ Oindu de ohoteluni iruthahina asang hune ara hanyong. Nang aindu iwonan ara Ojok lonyong, ara inyong aindu iwonan ara olonyi hindang. ⁸ Ti, ara d’obangak, ohothing haang iruhi, ohothing hoidari, ohottohok, oilerujok, oibwana, ohothing hoiruhi d’ajohi karik odwalak bukulung, amaji nasong de ajor nawulo ara ahimang. Aye nya de etharehe. ⁹ Lobo th’anjelohio cofa hulo aindu donang, inyong lowon h’atafuna cofa hefut bee h’adihathik cofa eholuha, ajyo donang, “Iwong dini, ethaithak nang iye de ahodwothi namuthaye de na, afure n’Oker.” ¹⁰ Thiya eyaru nang adi ditha Ohoile d’odonge lohittok, ohodorani, ethaithak nang abore nadwa, Yerusalem, oindu dihap thohide th’Ojok. ¹¹ Owon Yerusalem h’abolori n’Ojok karik awulo nanyong ajahitha ofaho oyeli karik iring omorik hotehunerek thele. ¹² Owon h’agorom n’oyihethik tomon larehai, karik anjelohio hoisuka diyihethik tomon larehai. Dihide h’oyihethik igeroi ofuretho h’amukoko tomon larehai h’olonyirok ho Israele. ¹³ Tholo moithe arahi nya oyihethik hohittwak aunihoi, thololumi h’oholong aunihoi, tholowor aunihoi karik tholohide aunihoi. ¹⁴ Owon nya agorom n’abore hasihothik tomon lareha; dihide hosong, owoni nya ofuretho tomon larehai h’ohoifahak tomon larehai h’Oker. ¹⁵ Locama honang lya owon h’ebindang ethemit ayelithi nathemyerek abore, oyihethik hohittwak karik agorom. ¹⁶ Othema nya abore oyirihi arangwan horijoro. Othemyo nya inyong abore th’ethemit ebindang, stadia esihe tomon larehai th’ahodori. ¹⁷ Athemyo dang agorom, aindu 144 cm th’erosi, th’athemio thon’othulo (karik dang n’anjelo). ¹⁸ Oduhoi nya agorom th’eduhit thana ilongoi ara “Jasper” ara abore aduhoi th’ayel tororo karik eduhet nengelunerek thele (glass). ¹⁹ Ethaliborye nya asihothihio h’abore th’omorik thohoko: Jasper nya ohoithemoni, Sapphire oitharehe, agate oitharehe, emerald oitharangwane, ²⁰ onyx, oithamiyete, Camelian oithainde, chrysolite oithacofe, beryl oithatisathe, topax oithasahale, Chrysosprase oithatomone, Jachinth oithatomone loboithe, omethyst oithatomone larehai. ²¹ Oyihethik tomon larehai hulya nya, ihuhumuni nya aboithe th’onyahuthong lobolo ayiji nanyong. ihuhumuni nya oyihothik h’abore fodok th’ayel, iring eduhet natehuni thele. ²² Kabong nang atehu atemplo di bore, aca, Ohobu Ojok Lamolo karik Oker, owoni ara Atemplo nanyong. ²³ Aang nya abore owak oholong dia oyefa diwulo dihide honyong, anyo, abolori n’Ojok owulo dihide honyong, karik Oker awon ara ahiriyai nawulo. ²⁴ Odaha de amisok th’afangan than’abore. Iyanu de ohobusi abolori nasong ditha honyong. ²⁵ aang de ihyenie oiyihethik honyong th’afaning karik aang de dang aharie thiya. ²⁶ Iyanai de abolori karik ethahabuyo n’amisok dtha honyong. ²⁷ ti, aang de aning nebot dia othulo loidairi, ohodwalani lojingak ditha honyong, araharik ohothing hoigero ofuretho hosong dith’amanini n’esu n’Oker.